Oeuvres complètes. Tome 2.  
Par Rutebeuf. (1230-1285)
 
Tome 2 (Ancien français)

 

Ci commence le miracle de Théophile 

Theophiles
Ahi! Ahi! Diex, rois de gloire,
Tant vous ai eü en memoire
Tout ai doné et despendu
Et tout ai aus povres tendu:
Ne m'est remez vaillant un sac.
Bien m'a dit li evesque "Eschac"!
Et m'a rendu maté en l'angle.
Sanz avoir m'a lessié tout sangle.
Or m'estuet il morir de fain,
Se je n'envoi ma robe au pain.
Et ma mesnie que fera?
Ne sai se Diex les pestera...
Diex? Oïl! qu'en a il a fere?
En autre lieu les covient trere,
Ou il me fet l'oreille sorde,
Qu'il n'a cure de ma falorde.
Et je li referai la moe:
Honiz soit qui de lui se loe!
N'est riens c'on por avoir ne face:
Ne pris riens Dieu ne sa manace.

Irai je me noier ou pendre?
Je ne m'en puis pas a Dieu prendre,
C'on ne puet a lui avenir.
Ha! qui or le porroit tenir
Et bien batre a la retornee,
Molt avroit fet bone jornee!
Mes il s'est en si haut leu mis
Por eschiver ses anemis
C'on n'i puet trere ne lancier.
Se or pooie a lui tancier,
Et combatrë et escremir,
La char li feroie fremir.
Or est lasus en son solaz;
Laz, chetis! et je sui es laz
De Povreté et de Soufrete.
Or est bien ma vïele frete,
Or dira l'en que je rasote:
De ce sera mes la riote.
Je n'oserai nului veoir,
Entre gent ne devrai seoir,
Que l'en m'i mousterroit au doi.
Or ne sai je que fere doi:
Or m'a bien Diex servi de guile!


Ici vient Theophiles a Salatin qui parloit au deable quant il voloit.
Salatins
Qu'est ce? qu'avez vous, Theophile?
Por le grant Dé, quel mautalent

Vous a fet estre si dolent?

Vous soliiez si joiant estre!
Theophiles parole
C'on m'apeloit seignor et mestre
De cest païs, ce sez tu bien:
Or ne me lesse on nule rien.
S'en sui plus dolenz, Salatin,
Quar en françois ne en latin
Ne finai onques de proier
Celui c'or me veut asproier,
Et qui me fet lessier si monde
Qu'il ne m'est remez riens el monde.
Or n'est nule chose si fiere
Ne de si diverse maniere
Que volentiers ne la feïsse,
Par tel qu'a m'onor revenisse:
Li perdres m'est honte et domages.

Ici parole Salatins
Biaus sire, vous dites que sages;
Quar qui a apris la richece,
Molt i a dolor et destrece
Quant l'en chiet en autrui dangier
Por son boivre et por son mengier:
Trop i covient gros mos oïr!
Theophiles
C'est ce qui me fet esbahir,
Salatin, biau tres douz amis.
Quant en autrui dangier sui mis,
Par pou que li cuers ne m'en crieve.
Salatins
Je sai or bien que molt vous grieve
Et molt en estes entrepris,
Com hom qui est de si grant pris.
Molt en estes mas et penssis.
Theophiles
Salatin frere, or est ensis:
Se tu riens pooies savoir
Par quoi je peüsse ravoir
M'onor, ma baillie et ma grace,

Il n'est chose que je n'en face.
Salatins

Voudriiez vous Dieu renoier,
Celui que tant solez proier,
Toz ses sainz et toutes ses saintes,
Et si devenissiez, mains jointes,
Hom a celui qui ce feroit,
Qui vostre honor vous renderoit,
Et plus honorez seriiez,
S'a lui servir demoriiez,
C'onques jor ne peüstes estre.
Creez moi, lessiez vostre mestre.
Qu'en avez vous entalenté?
Theophiles
J'en ai trop vone volenté.
Tout ton plesir ferai briefment.
Salatins
Alez vous en seürement:
Maugrez qu'il en puissent avoir,

Vous ferai vostre honor ravoir.
Revenez demain au matin.
Theophiles

Volentiers, frere Salatin.
Cil Diex que tu croiz et aeures
Te gart, s'en ce propos demeures!
Or se depart Theophiles de Salatin

et si pensse que trop a grant chose en Dieu renoter et dist:
Ha! laz, que porrai devenir?
Bien me doit li cors dessenir
Quant il m'estuet a ce venir.
Que ferai, las?
Se je reni saint Nicholas
Et saint Jehan et saint Thomas
Et Nostre Dame,
Que fera ma chetive d'ame?
Ele sera arse en la flame
D'enfer le noir.
La la covendra remanoir:
Ci avra trop hideus manoir,
Ce n'est pas fable.
En cele flambe pardurable
N'i a nule gent amiable,
Ainçois sont mal, qu'il sont deable:
C'est lor nature.
Et lor mesons rest si obscure
C'on ni verra ja soleil luire;
Ainz est un puis toz plains d'ordure.
La irai gié!
Bien me seront li dé changié
Quant, por ce que j'avrai mengié,
M'avra Diez issi estrangié
De sa meson,
Et ci avra bone reson.
Si esbahiz ne fu mes hom
Com je sui, voir.
Or dit qu'il me fera ravoir
Et ma richesse et mon avoir.
Ja nus n'en porra riens savoir:
Je le ferai!
Diex m'a grevé: jel greverai,
Ja més jor ne le servirai!
Je li ennui.
Riches serai, se povres sui!
Se il me het, je harrai lui:
Preingne ses erres,
Ou il face movoir ses guerres!
Tout a en main et ciel et terres:
Je li claim cuite,
Se Salatins tout ce m'acuite
Qu'il m'a pramis.

Ici parole Salatins au deable et dist:
Uns crestiens s'est sor moi mis,
Et je m'en sui molt antremis,
Quar tu n'es pas mes anemis.
Os tu, Sathanz?
Demain vendra, se tu l'atans.
Je li ai promis quatre tans:
Aten le don,
Qu'il a esté molt grant preudon;
Por ce si a plus riche don.
Met li ta richece a bandon...
Ne m'os tu pas?
Je te ferai plus que le pas

Venir, je cuit!
Et si vendras encore anuit,
Quar ta demoree me nuit,
Si ai beé.
Ci conjure Salatins le deable.
Bagahi laca bachaé
Lamac cahi achabahé
Karrelyos
Lamac lamec bachalyos
Cabahagi sabalyos
Baryolas
Lagozatha cabyolas
Samahac et famyolas
Harrahya.

Or vient li deables qui est conjuré et dist:
Tu as bien dit ce qu'il i a:
Cil qui t'aprist riens n'oublia.
Molt me travailles!
Salatins
Qu'il n'est pas droiz que tu me failles
Ne que tu encontre moi ailles
Quant je t'apel.
Je te faz bien suer ta pel!

Veus tu oïr un geu novel?
Un clerc avons
De tel gaaing com nous savons:
Souventes foiz nous en grevons
Por nosre afere.
Que loez vous du clerc a fere
Qui se voudra ja vers ça trere?
Li deables
Comment a non?
Salatins
Theophiles par son droit non.
Molt a esté de grant renon
En ceste terre.
Li deables
J'ai toz jors eü a lui guerre
C'onques jor ne le poi conquerre.
Puis qu'il se veut a nous offerre,

Viengne en cel val,
Sanz compaignie et sanz cheval.
N'i avra gueres de travail:
C'est prés de ci.
Molt avra bien de lui merci
Sathan et li autre nerci.
Mes n'apiaut mie
Jhesu, le fil sainte Marie:
Ne li ferïons point d'aïe.
De ci m'en vois.
Or soiez vers moi plus cortois:
Ne me traveillier més des mois,

Va, Salatin,
Ne en ebrieu ne en latin.
Or revient Theophiles a Salatin.
Or sui je venuz trop matin?
As tu rien fet?
Salatins
Je t'ai basti si bien ton plet,
Quanques tes sires t'a mesfet
T'amendera,
Et plus forment t'onorera
Et plus grant seignor te fera
C'onques ne fus.
Tu n'es or pas si du refus
Com tu seras encor du plus.
Ne t'esmaier:

Va la aval sanz delaier.
Ne t'i covient pas Dieu proier
Ne reclamer
Se tu veus ta besoingne amer.
Tu l'as trop trové a amer,
Qu'il t'a failli.
Mauvesement as or sailli;
Bien t'eüst ore mal bailli
Se ne t'aidaisse.

Va t'en, que il t'atendent; passe
Grant aleüre.
De Dieu reclamer n'aies cure.
Theophiles
Je m'en vois. Diex ne m'i puet nuire
Ne riens aidier,
Ne je ne puis a lui plaidier.


Ici va Theophiles au deable, si a trop grant paor; et li déables li dist:

Venez avant, passez grant pas.
Gardez que ne resamblez pas

Vilain qui va a offerande.
Que vous veut ne que vous demande

Vostre sires? Il est molt fiers!
Theophile

Voire, sire. Il fu chanceliers
Si me cuide chacier pain querre.
Or vous vieng proier et requerre
Que vous m'aidiez a cest besoing.
Li Deables
Requiers m'en tu?
Theophiles
Oïl.
Li Deables
Or joing
Tes mains, et si devien mes hon.
Je t'aiderai outre reson.
Theophiles

Vez ci que je vous faz hommage,
Més que je raie mon domage,
Biaus sire, dés or en avant.
Li Deables
Et je te refaz un couvant
Que te ferai si grant seignor
C'on ne te vit onques greignor.
Et qui que ainsinques avient,
Saches de voir qu'il te covient
De toi aie lettres pendanz
Bien dites et bien entendanz;
Quar maintes genz m'en ont sorpris
Por ce que lor lettres n'en pris.
Por ce les vueil avoir bien dites.
Theophiles

Vez le ci: je les ai escrites.


Or baille Theophiles les lettres au deable et li deables li commande a ouvrer 
ainsi:
Theophile, biaus douz amis,
Puis que tu t'es en mes mains mis,
Je te dirai que tu feras.
Ja més povre homme n'ameras.
Se povres hom sorpris te proie,
Torne l'oreille, va ta voie.
S'aucuns envers toi s'umelie,
Respon orgueil et felonie.
Se povres demande a ta porte,
Si garde qu'aumosne n'en porte.
Douçor, humilitez, pitiez
Et charitez et amistiez,
Jeüne fere, penitance,
Me metent grant duel en la pance.
Aumosne fere et Dieu proier,
Ce me repuet trop anoier.
Dieu amer et chastement vivre,
Lors me samble serpent et guivre
Me menjue le cuer el ventre.
Quant l'en en la meson Dieu entre
Por regarder aucun malade,
Lors ai le cuer si mort et fade

Qu'il m'est avis que point n'en sente,
Cil qui fet bien si me tormente.

Va t'en, tu seras seneschaus.
Lai les biens et si fai les maus.
Ne jugier ja bien en ta vie,
Que tu feroies grant folie
Et si feroies contre moi.
Theophiles
Je ferai ce que fere doi.
Bien est droit vostre plesir face,
Puis que j'en doi ravoir ma grace.
Or envoie l'evesque querre Theophile.
Or tost! lieve sus, Pinceguerre,
Si me va Theophile querre,
Se li renderai sa baillie.
J'avoie fet molt grant folie
Quant je tolue li avoie,
Que c'est li mieudres que je voie:

Ice puis je bien por voir dire.
Or respont Pinceguerre:

Vous dites voir, biaus trés douz sire.


Or parole Pinceguerre a Theophile et Theophiles respont:
Qui est ceenz?
- Et vous qui estes?
- Je sui uns clers.
- Et je sui prestres.
- Theophiles, biaus sire chiers,
Or ne soiez vers moi si fiers.
Mes sires un pou vous demande,
Si ravrez ja vostre provande,

Vostre baillie toute entiere.
Soiez liez, fetes bele chiere,
Si ferez et sens et savoir.
Theophiles
Deable i puissent part avoir!
J'eüsse eüe l'eveschié,
Et je l'i mis, si fis pechié.
Quant il i fu, s'oi a lui guerre
Si me cuida chacier pain querre.
Tripot lirot por sa haïne
Et por sa tençon qui ne fine!
G'i irai, s'orrai qu'il dira.
Pinceguerre
Quant il vous verra, si rira
Et dira por vous essaier
Le fist. Or vous reveut paier
Et serez ami com devant.
Theophiles
Or disoient assez souvant
Li chanoine de moi granz fables:
Je les rent a toz les deables!


Or se lieve l'evesque contre Theophile et li rent sa dignité, et dist:
Sire, bien puissiez vous venir!
Theophiles
Si sui je! Bien me soi tenir,
Je ne sui pas cheüs par voie!
Li evesques
Biaus sire, de ce que j'avoie

Vers vous mespris, jel vous ament
Et si vous rent molt bonement

Vostre baillie. Or la prenez,
Quar preudom estes et senez,
Et quanques j'ai si sera vostre.
Theophiles
Ci a molt bone patrenostre,
Mieudre assez c'onques més ne dis!
Dés or més vendront dis et dis
Li vilain por moi aorer,
Et je les ferai laborer.

Il ne vaut rien que l'en ne doute.
Cuident il je n'i voie goute?
Je lor serai fel et irous.
Li Evesques
Theophile, ou entendez vous?
Biaus amis, penssez de bien fere.

Vez vous ceenz vostre repere;

Vez ci vostre ostel et le mien.
Nos richeces et nostre bien
Si seront dés or més ensamble.
Bon ami serons, ce me samble;
Tout sera vostre et tout ert mien.
Theophiles
Par foi, sire, je le vueil bien.


Ici va Theophiles a ses compaignons tencier, premierement a un qui avoit non 
Pierres:
Pierres, veus tu oïr novele?
Or est tornee ta rouele,
Or t'est il cheü ambes as.
Or te tien a ce que tu as,
Qu'a ma baillie as tu failli.
L'evesque m'en a fet bailli,
Si ne t'en sai ne gré ne graces.
Pierre respont:
Theophiles, sont ce manaces?
Dés ier priai je mon seignor
Que il vous rendist vostre honor,
Et bien estoit droiz et resons.
Theophiles
Ci avoit dures faoisons
Quant vous m'aviiez forjugié.
Maugré vostres, or le rai gié.
Oublié aviiez le duel!
Pierres
Certes, biaus chiers sire, a mon vuel
Fussiez vous evesques eüs
Quant nostre evesques fu feüs.
Més vous ne le vousistes estre
Tant doutiiez le roi celestre.
Or tence Theophiles a un autre:
Thomas, Thomas, or te chiet mal
Quant l'en me ra fet seneschal.
Or leras tu le regiber
Et le combatre et le riber.
N'avras pior voisin de moi.
Thomas
Theophile, foi que vous doi,

Il samble que vous soiez yvres.
Theophiles
Or en serai demain delivres,
Maugrez en ait vostre visages.
Thomas
Par Dieu! Vous n'estes pas bien sages:
Je vous aim tant et tant vous pris!
Theophiles
Thomas, Thomas, ne sui pas pris:
Encor pourrai nuire et aidier!
Thomas

Il samble vous volez plaidier.
Theophile, lessiez me en pais!
Theophiles
Thomas, Thomas, je que vous fais?
Encor vous plaindrez bien a tens
Si com je cuit et com je pens.


Ici se repent Theophiles et vient a une chapele de Nostre Dame et dist:
Hé! laz, chetis, dolenz, que porrai devenir?
Terre, comment me pués porter ne soustenir
Quant j'ai Dieu renoié et celui voil tenir
A seignor et a mestre qui toz mauz fet venir?
Or ai Dieu renoié, ne puet estre teü.
Si ai lessié le basme, pris me sui au seü.
De moi a pris la chartre et le brief receü
Maufez, se li rendrai de m'ame le treü.
Hé! Diex, que feras tu de cest chetif dolent
De qui l'ame en ira en enfer le boillant
Et li maufez l'iront a leur piez defoulant?
Ahi! terre, quar oevre, si me va engloutant!
Sire Diex, que fera cist dolenz esbahis
Qui de Dieu et du monde est hüez et haïs
Et des maufez d'enfer engingniez et trahis?
Dont sui je de trestoz chaciez et envaïs?
Hé! las, com j'ai esté plains de grant nonsavoir
Quant j'ai Dieu renoié por un petit d'avoir!
Les richeces du monde que je voloie avoir
M'ont geté en tel leu dont ne me puis ravoir.
Sathan, plus de set anz ai tenu ton sentier.
Maus chans m'ont fet chanter li vin de mon chantier.
Molt felonesse rente m'en rendront mi rentier.
Ma char charpenteront li felon charpentier.
Ame doit l'en amer: m'ame n'ert pas amee,
N'os demander la Dame qu'ele ne soit dampnee.
Trop a male semence en semoisons semee
De qui l'ame sera en enfer sorsemee.
Ha! las, com fol bailli et com fole baillie!
Or sui je mal baillis et m'ame mal baillie.
S'or m'osoie baillier a la douce baillie,
G'i seroie bailliez et m'ame ja baillie.
Ors sui, et ordoiez doit aler en ordure.
Ordement ai ouvré, ce set Cil qui or dure
Et qui toz jours durra, s'en avrai la mort dure.
Maufez, com m'avez mors de mauvese morsure!
Or n'ai je remanance ne en ciel ne en terre.
Ha! las, ou est li lieux qui me puisse soufferre?
Enfers ne me plest pas ou je me voil offerre;
Paradis n'est pas miens, que j'ai au Seignor guerre.
Je n'os Dieu reclamer ne ses sainz ne ses saintes,
Las, que j'ai fet hommage au deable mains jointes.
Li Maufez en a lettres de mon anel empraintes.
Richece, mar te vi! J'en avrai dolors maintes.
Je n'os Dieu ne ses saintes ne ses sainz reclamer,
Ne la tres douce Dame que chascuns doit amer.
Més por ce qu'en li n'a felonie n'amer,
Se je li cri merci nus ne m'en doit blasmer.


C'est la proiere que Theophiles dist devant Nostre Dame
Sainte roïne bele,
Glorieuse pucele,
Dame de grace plaine
Par qui toz biens revele,
Qu'au besoing vous apele
Delivres est de paine;
Qu'a vous son cuer amaine
Ou pardurable raine
Avra joie novele.
Arousable fontaine
Et delitable et saine,
A ton Filz me rapele!
En vostre douz servise
Fu ja m'entente mise,
Mes trop tost fui temptez.
Par celui qui atise
Le mal, et le bien brise,
Sui trop fort enchantez.
Car me desenchantez,
Que vostre volentez
Est plaine de franchise,
Ou de granz orfentez
Sera mes cors rentez
Devant la fort justice.
Dame sainte Marie,
Mon corage varie
Ainsi que il te serve,
Ou ja mes n'ert tarie
Ma dolors ne garie,
Ains sera m'ame serve.
Ci avra dure verve
S'ainz que la mors m'enerve
En vous ne se marie
M'ame qui vous enterve.
Souffrez li cors deserve
L'ame ne soit perie.
Dame de charité
Qui par humilité
Portas nostre salu,
Qui toz nous a geté
De duel et de vilté
Et d'enferne palu,
Dame, je te salu!
Ton salu m'a valu,
Jel sai de verité.

Gar qu'avoec Tentalu
En enfer le jalu
Ne praingne m'erité.
En enfer ert offerte,
Dont la porte est ouverte,
M'ame par mon outrage.
Ci avra dure perte
Et grant folie aperte,
Se la praing herbregage.
Dame, or te faz hommage:
Torne ton douz visage.
Por ma dure deserte,
El non ton Filz le sage,
Ne soffrir que mi gage

Voisent a tel poverte!
Si comme en la verriere
Entre et reva arriere
Li solaus que n'entame,
Ainsinc fus virge entiere
Quant Diex, qui es ciex iere,
Fist de toi mere et dame.
Ha! resplendissant jame,
Tendre et piteuse fame,
Car entent ma proiere,
Que mon vil cors et m'ame
De pardurable flame
Rapelaisses arriere.
Roïne debonaire,
Les iex du cuer m'esclaire
Et l'obscurté m'esface,
Si qu'a toi puisse plaire
Et ta volenté faire:
Car m'en done la grace.
Trop ai eü espace
D'estre en obscure trace;
Encor m'i cuident traire
Li serf de pute estrace.
Dame, ja toi ne place
Qu'il facent tel contraire!
En vilté, en ordure,
En vie trop obscure
Ai esté lonc termine:
Roïne nete et pure,
Quar me pren en ta cure
Et si me medecine.
Par ta vertu devine
Qu'adés est enterine,
Fai dedenz mon cuer luire
La clarté pure et fine,
Et les iex m'enlumine,
Que ne m'en voi conduire.
Li proieres qui proie
M'a ja mis en sa proie:
Pris serai et preez,
Trop asprement m'asproie.
Dame, ton chier Filz proie
Que soie despreez.
Dame, car leur veez,
Qui mes mesfez veez,
Que n'avoie a leur voie.

Vous qui lasus seez,
M'ame leur deveez,
Que nus d'aus ne la voie.


Ici parole Nostre Dame a Theophile et dist:
Qui es tu, va, qui vas par ci?
Theophiles
Ha! Dame, aiez de moi merci!
C'est li chetis

Theophiles, li entrepris,
Que maufé ont loié et pris.
Or vieng proier
A vous, Dame, et merci crier,
Que ne gart l'eure qu'asproier
Me viengne cil
Qui m'a mis a si grant escil.
Tu me tenis ja por ton fil,
Roïne bele.
Nostre Dame parole:
Je n'ai cure de ta favele.

Va t'en, is fors de ma chapele.
Theophiles parole:
Dame, je n'ose.
Flors d'aiglentier et lis et rose,
En qui li Filz Dieu se repose,
Que ferai gié?
Malement me sent engagié
Envers le Maufé enragié.
Ne sai que faire:
Ja més ne finirai de brere.

Virge, pucele debonere,
Dame honoree,
Bien sera m'ame devoree,
Qu'en enfer fera demoree
Avoec Cahu.
Nostre Dame
Theophiles, je t'ai seü
Ca en arriere a moi eü.
Saches de voir,
Ta chartre te ferai ravoir
Que tu baillas par nonsavoir.
Je la vois querre.


Ici va Nostre Dame por la chartre Theophile.
Sathan! Sathan! es tu en serre?
S'es or venuz en ceste terre
Por commencier a mon clerc guerre,
Mar le penssas.
Rent la chartre que du clerc as,
Quar tu as fet trop vilain cas.
Sathan parole:
Je vous la rande!
J'aim miex assez que l'en me pende!
Ja li rendi je sa provande,
Et il me fist de lui offrande
Sanz demorance,
De cors et d'ame et de sustance.
Nostre Dame
Et je te foulerai la pance!


Ici aporte Nostre Dame la chartre a Theophile.
Amis, ta chartre te raport.
Arivez fusses a mal port
Ou il n'a solaz ne deport.
A moi entent:

Va a l'evesque et plus n'atent;
De la chartre li fait present
Et qu'il la lise
Devant le pueple en sainte yglise,
Que bone gent n'en soit sorprise
Par tel barate.
Trop aime avoir qui si l'achate:
L'ame en est et honteuse et mate.
Theophile

Volentiers, Dame!
Bien fusse mors de cors et d'ame.
Sa paine pert qui ainsi same,
Ce voi je bien.


Ici vient Theophiles a l'evesque et li baille sa chartre et dist:
Sire, oiez moi, por Dieu merci!
Quoi que j'aie fet, or sui ci.
Par tens savroiz
De qoi j'ai molt esté destroiz.
Povres et nus, maigres et froiz
Fui par defaute.
Anemis, qui les bons assaute,
Ot fet a m'ame geter faute
Dont mors estoie.
La Dame qui les siens avoie
M'a desvoié de male voie
Ou avoiez
Estoie, et si forvoiez
Qu'en enfer fusse convoiez
Par le deable,
Que Dieu, le pere esperitable,
En toute ouvraingne charitable,
Lessier me fist.
Ma chartre en ot de quanqu'il dist;
Seelé fu quanqu'il requist.
Molt me greva,
Por poi li cuers ne me creva.
La Virge la me raporta,
Qu'a Dieu est mere,
La qui bonté est pure et clere.
Si vous vueil prier, com mon pere,
Qu'el soit leüe,
Qu'autre gent n'en soit deceüe
Qui n'ont encore aperceüe
Tel tricherie.

Ici list l'evesque la chartre et dist:
Oiez, por Dieu le Filz Marie,
Bone gent, si orrez la vie
De Theophile
Qui Anemis servi de guile.
Ausi voir comme est Evangile
Est ceste chose;
Si vous doit bien estre desclose.
Or escoutez que vous propose.
"A toz cels qui verront ceste lettre commune
Fet Sathan a savoir que ja torna fortune,
Que Theophiles ot a l'evesque rancune,
Ne li lessa l'evesque seignorie nesune.

Il fu desesperez quant l'en li fist l'outrage;
A Salatin s'en vient qui ot el cors la rage,
Et dist qu'il li feroit molt volentiers hommage,
Se rendre li pooit s'onor et son domage.
Je le guerroiai tant com mena sainte vie,
C'onques ne poi avoir desor lui seignorie.
Quant il me vint requerre, j'oi de lui grant envie.
Et lors me fist hommage, si rot sa seignorie.
De l'anel de son doit seela ceste letre,
De son sanc les escrist, autre enque n'i fist metre,
Ains que je me vousisse de lui point entremetre
Ne que je le feïsse en dignité remetre."

Issi ouvra icil preudom.
Delivré l'a tout a bandon
La Dieu ancele.
Marie, la virge pucele,
Delivré l'a de tel querelle.
Chantons tuit por ceste novele.
Or levez sus,
Disons: "Te Deum laudamus".
Explicit le miracle de Theophile.
 

Ci encoumence li miracles que Nostre Dame fist dou soucretain et d'une dame 

Ce soit en la beneoite heure
Que Beneoiz, qui Dieu aheure,
Me fait faire beneoite oevre!
Por Beneoit .I. pou m'aoevre:
Benoiz soit qui escoutera
Ce que por Beneoit fera
Rutebuez, que Dieuz beneïsse!
Diex doint que s'uevre espeneïsse
En teil maniere que il face
Choze dont il ait grei et grace!
Cil qui bien fait bien doit avoir,
Et cil qui n'a sens ne savoir
Par quoi il puisse bien ouvreir,
Si ne doit mie recovreir
A avoir gairison ne rente.
Hon dit: "De teil marchié, teil vente."
Ciz siecles n'est mais que marchiez.
Et vos qui au marchié marchiez,
S'au marchié estes mescheant,

Vos n'estes pas bon marcheant.
Li marcheanz, la marcheande
Qui sagement ne marcheande
Pert ses pas et quanqu'ele marche.
Puis que nos sons en bone marche,
Pensons de si marcheandeir
C'om ne nos puisse demandeir
Nule riens au jor dou Juïse,
Quant Diex panra de toz justise
Qui auront ensi bargignié
Qu'au marchié seront engignié.
Or gardeiz que ne vos engigne
Li Maufeiz, qu'adés vos bargigne.
N'aiez envie seur nule ame:
C'est la choze qui destruit l'arme.
Envie semble herison:
De toutes pars sunt li poinson.
Envie point de toutes pars,
Pis vaut que guivre ne liepars.
Li cors ou Envie s'embat
Ne se solace ne esbat.
Toz jors est ces viaires pales,
Toz jors sunt ces paroles males.
Lors rit il quant ces voizins pleure,
Et lors li recort li duelz seure
Quant ces voizins a bien asseiz.
De mesdire n'iert ja lasseiz.
Or poeiz vos savoir la vie
Que cil mainne qui a envie.
Envie fait homes tueir
Et si fait bones remueir;
Envie fait rooignier terre,
Envie met el siecle guerre,
Envie fait mari et fame
Haïr, Envie destruit arme,
Envie met haïne en freres,
Envie fait haïr les meires,
Envie destruist Gentillesce,
Envie grieve, Envie blesce,
Envie confont Charitei
Et si destruit Humilitei.
Ne sai que plus briement vos die:
Tui li mal viennent par Envie.
Et por l'envie dou Mauffei,
Dont mainte gent sunt eschaufei,

Vos wel raconteir de .II. gent
Dont li miracles est moult granz.
Granment n'a mie que la fame
A un chevalier, gentiz dame,
Estoit en cest païs en vie.
Sens orguel iere et sanz envie,
Simple, cortoize, preux et sage;
N'estoit ireuze ne sauvage,
Mais sa bonteiz, sa loiauteiz
Passoit cortoizie et biautei.
Dieu amoit et sa douce meire.
N'estoit pas aus povres ameire
Ne marastre aus desconceilhez;
N'estoit pas ces huis verruilhés
Le soir quant hon doit habergier
La povre gent: nes .I. bergier
Faisoit ele si tres biau lit
C'uns rois i geüst a delit.
Plus avoit en li charitei,
Ce vos di ge de veritei,
Qu'il n'a en demi seuz dou monde;
N'est pas orendroit la seconde.
De tout ce me doi ge bien taire
Envers le tres biau luminaire
Qu'ele moutroit a samedi.
Et bien sachiez, seur m'arme di,
Que matines voloit oïr:
Ja ne l'en veïssiez foïr
Tant c'on avoit fait le servise.
Ce ne vous sai je en queil guise
Fasoit les festes Notre Dame:
Ce ne porroit dire nule ame.
Se g'estoie boens escrivains,
Ainz seroie d'escrire vainz
Que j'eüsse dit la moitié
De l'amour et de l'amitié
Qu'a Dieu moutroit et jor et nuit.
Ancor dout je ne vos anuit
Ce que j'ai .I. petit contei
De son sanz et de sa bontei.
Ses sires l'avoit forment chiere
Et moult li faisoit bele chiere
De ce qu'en veritei savoit
Que si grant preude fame avoit.
Moult l'amoit et moult li plaisoit
Trestoz li bien qu'ele faisoit.
En la vile ot une abaïe
Qui n'estoit pas moult esbahie
De servir Dieu l'esperitable;
Et si estoit mout charitable
La gent qui estoit en ce leu.
Bien seüst veoir cleir de l'eul
Qui i veïst .I. mauvais quas.
Or ont tot atornei a gas.
Chenoine reguleir estoient:
Lor regle honestement gardoient.
Laanz avoit .I. soucretain;
Orendroit nul home ne taing
A si preudome com il iere.
La glorieuze Dame chiere
Servoit de boen cuer et de fin,
Si com il parut en la fin.
Et si vos di qu'en trois parties
Estoient ces heures parties:
Dormir ou mangier ou oreir

Voloit. Ne savoit laboreir.
Toz jors vos fust devant l'auteil.

Vos ne verroiz jamais auteil
Com il estoit ne si preudome.
Ne prisoit avoir une poume
Ne n'avoit cure ne corage
De ce qui est choze volage,
C'om voit bien avenir souvent
Qu'avoirs s'envole avec le vent.
Por ce n'en avoit couvoitise.
Quant la chandoile estoit emprise
Devant la Vierge debonaire,
De l'osteir n'avoit il que faire:
Tout ardoit, n'i remanoit point;
Je ne di pas, c'il fust a point
Que plainz li chandelabres fust
Ou li granz chandeliers de fust,

Il en otast juqu'a raison
Qui feïst bien a la maison.
Par maintes fois si avenoit
Que la bone dame venoit
A l'eglize por Dieu proier.
Celui trouvoit cui otroier
Doit Notre Dame son douz reigne:
Jamais n'aura si boen chenoingne.
Ces gens moult saintement vivoient.
Li felon envieuz qui voient
Ceulz qui vivent d'oneste vie
D'eulz desvoier orent envie.
De lor enviaus envoierent,
Par maintes fois i avoierent,
Tant qu'il les firent desvoier
De lor voie et avoier
A une perilleuze voie.
Or est mestiers que Dieux les voie!
Tost va, ce poeiz vos veoir,
Choze qui prent a decheoir.
Tost fu lor penitance fraite
Qui n'estoit pas demie faite.
Anemis si les entama
Que li amis l'amie ama
Et l'amie l'ami amot.
Li uns ne ceit de l'autre mot;
De plus en plus les enchanta.
Quant cil chantoit Salve sancta,
Li parens estoit oblieiz,
Tant estoit fort desavoieiz.
Et quant il voloit graces rendre,

VII. fois li couvenoit reprendre
Ainz que la moitié dite eüst.
Or est mestiers Dieux li aüst!
Dou tout en tout a getei fuer
L'abit Saint Augustin dou cuer.
N'i a mais se folie non,
Fors tant que chenoignë at non.
De l'ordre Augustin n'i a goute,
Fors que l'abit, ce n'est pas doute.
Or est vaincuz, or est conclus
Notre religieuz rencluz.
N'a plus fol en la region
Que cil de la region.
Et la dame religieuze
Rest d'ameir si fort curieuze
Qu'ele n'a d'autre choze cure.
Or est la dame moult oscure,
Car li oscurs l'a oscurcie
De s'oscurtei et endurcie.
De male cure l'a curee.
Ci a moult oscure curee
Qui n'est pas entre char et cuir,
Ainz est dedenz le cuer oscur
Qui estoit clers et curieuz
De servir Dieu le glorieuz.
Cureir la puisse li curerres
Qui des oscurs est escurerres!
Car si forment est tormentee
Et si vaincue et enchantee,
Quant ele est assise au mangier,

Il li couvient avant changier
Couleur .V. foies ou sis,
Por son cuer qui est si pencis,
Que li premiers mes soit mangiez.
Or est ces afaires changiez.

Voirement dit hon, ce me cemble:
"Dieux done bleif, deables l'emble."
Et li deable ont bien emblei
Ce que Diex amoit miex que blei.
Or face Diex novele amie,
Qu'il samble ceste nou soit mie.
Tost est alei, preneiz i garde,
Ce que notres Sires ne garde.
Dit la dame: "Dolante, lasse,
Ceste doleur toute autre passe.
Lasse! que porrai devenir?
Commant me porrai contenir
En teil maniere qu'il parsoive
Que la soie amors me desoive?
Dirai li ge? Nenil sanz doute:
Or ai ge dit que fole gloute,
Que fame ne doit pas proier.
Or me puet s'amor asproier,
Que par moi n'en saura mais riens.
Or sui ainsiz com li marriens
Qui porrit desouz la goutiere;
Or amerai en teil maniere."
Ainsi la dame se demoinne.
Or vos rewel meneir au moinne.
Li bons moinnes aime la dame,
Qui acroit sus sa lasse d'arme,
Mais la dame n'en ceit noiant.
Moult vat entor li tornoiant
Quant ele est au moustier venue;
Et s'il seüst la couvenue
Que la dame l'amast si fort,
Confortez fust de grant confort.

Il n'est en chemin ne en voie
Que li deables ne le voie:
Tout adés le tient par l'oreille;
D'eures en autres li conceille:
"Va, fols chanoines, por qoi tardes
Que ceste dame ne regardes?

Va, a li cour et si la proie!"
Tant li semont et tant l'asproie
Que li chenoines a li vient:
Par force venir li couvient.
Quant la dame le vit venir,
De rire ne se pot tenir.
Ces cuers li semont bien a dire:
"Embraciez moi, biau tres douz sire!"
Mais Nature la tient sarree.
Nulle des dens n'a desserree
Fors que por rire; et quant ris ot,
Les dens reserre et ne dit mot.
Li preudons la prit par la main:
"Dame, vos aleiz chacun main
Mout matinet a sainte eglize.
Est ce por oïr le servize?
Ne puis plus ma doleur covrir,
Ainz me covient ma bouche ovrir;
Les dens me couvient dessereir.

Vos me faites sovent serreir
Le cuer el ventre sanz demour:
Dame, je vos aim par amour."
Dit la dame: "Vos estes nices!
Plus a en vos asseiz de vices
Que ne cudoie qu'il eüst,
Se sainte Charité m'aiüst!
Moult saveiz bien servir de guile.
Estes vos por ce en la vile
Por la bone gent engignier?
Haï! com saveiz bargignier!

Viez dou papelart, dou beguin!
Des or ne pris .I. angevin
Son bienfait ne sa penitance,
Si m'aïst Diex et sa poissance!
Je cuidai qu'il fust .I. hermites,
Et il est .I. faux ypocrites.
Haï! Haï! queil norrison!

Il est de piau de herison
Entorteilliez dedenz la robe
Et defors sert la gent de lobe,
Et s'a la traïson el cors
Et fait biau semblant par defors.
- Dame, dame, ne vos anuit!
Avant sofferrai jor et nuit
Des or mais mon mal et ma painne
Que vos die choze grevainne.
Taire m'estuet, je me tairai.
Laissier m'estuet, je le lairai:

Vos a prier n'en puis plus faire.
- Biaux sire chiers, ne me puis taire:
Tant vos aing, nuns nou pourroit dire.
Or n'i at plus, biaux tres doulz sire,
Mais que le meilleur regardeiz
Et dou descouvrir vos gardeiz;
Car se la choze est descouverte,
Hom nos tanrra a gent cuverte,
Sachiez, et si n'en douteiz pas.
Alons nos an plus que le pas
A tout quanque porrons avoir.
Prenons deniers et autre avoir
Si que nos vivons a honour
La ou nos serons a sejour,
Car la gent qui va desgarnie
En estrange leu est honie."
Dit li chenoignes: "Douce amie,
Sachiez, ce ne renfus je mie,
Car c'est li mieudres que g'i voie.
Or nos meterons a la voie.
Anquenuit; de nuit mouverons
A tout quanque nos porterons."
Or est la choze porparlee
Et de la meute et de l'alee.
La dame vint en son hostei.
Contre la nuit en a ostei
Robes et deniers et joiaux
Les plus cointes et les plus biaus.
C'ele em peüst porter la cendre,
Ele l'alast volentiers prendre,
Car la gent qui a ce labeure
Tient a perdu ce que demeure.
Li chenoignes est d'autres part
Qui el tresor fait grant essart;
Le tresor tresanoiantist
Aussi bien con c'il le nantist.
Tout prent, tout robe, tot pelice,
N'i laisse ne croix ne calice.
Un troussiau fait: troussiau, mais trousse.
Le troussiau prent, au col le trousse.
Or a il le troussiau troussei,
Mais s'on le trueve, a estrouz seit
Qu'il sera pris et retenuz.

Il est a la dame venuz
Qui l'atendoit; illec a coup
Chacuns met le troussel au coul:
Or semble qu'il vont au marchié.
Tant ont alei, tant ont marchié
Qu'esloignié ont li fol naïs
.XV. granz lieues le païs.
En la vile ont un hosteil pris.
Ancor n'ont de noiant mespris
Ne fait pechié ne autre choze
Dont Diex ne sa Mere les choze,
Ainz sunt ausi com suer et frere:
La douce Dame lor soit meire!

Venir me covient au couvent
Ou il n'avoit pas ce couvent.
Li couvenz dort ne se remue;
Li couvenz la descouvenue
Ne seit pas: savoir le couvient,
Car un convers au couvent vient
Et dit: "Seigneur, suz vos leveiz
S'anuit mais lever vos deveiz,
Qu'il est biauz jors et cleirs et granz!"
Chacuns est de leveir engranz.
Quant il ont le convers oï,
Durement furent esbahi
Qu'il n'orent oï soner cloche
Ne campenele ne reloge.
Or dient bien tot a delivre
Que ce soir avoit estei yvre
Li soucretainz: tant ot beü
Que li vins l'avoit deceü.
Mais je cuit qu'autre choze i a,
Foi que doi Ave Maria.
Tui sunt a l'eglize venu,
Petit et grant, jone et chenu.
Le socretain ont apelei
Qui le trezor ot trapelei.

Cil ne respont nes qu'amuiz.
Por quoi? Qu'il s'en estoit fuiz.
Quant il furent entrei en cuer,
Chacun vosist bien estre fuer,
Car trestuit si grant paor orent
(Li un des autres rien ne sorent)
Que la chars lor fremist et tremble.
L'abés parole a touz encemble:
"Seigneur, dit il, nos sont lobei:
Li soucretainz no a robei.
Frere, dit il au tresorier,
Laissates vos le trezor ier
Bien fermei? Car i preneiz garde."
Et li trezoriers i regarde:
Onques ne trova en tresor
Caalice ne croiz ne or.
Au couvent dit et a l'abei:
"Seigneur, dit il, nos sons gabei:
N'avons ne calice ne croix
Ne tresor qui vaille .II. noix."
Dit li abés: "Ne vos en chaille!

Va s'en il? Oïl! bien s'en aille!
C'il est de droit, ancor saurons
La ou il est, si le raurons."
Papelars fait bien ce qu'il doit,
Qui si forment papelardoit.
De l'engin servent et de l'art
Li ypocrite papelart.
De la loenge dou pueple ardent:
Por ce papelart papelardent.
Ne vaut rien papelarderie
Puis qu'el a papé larderie.
Jamais n'apapelardirai,
Ansois des papelars dirai:
"Pour choze que papelars die,
Ne croirai mais papelardie."
La Renomee qui tost court
Est venue droit a la court
Au chevalier cui sa fame ot
Desrobei, mais il n'en sot mot,
Qu'il n'avoit pas laianz geü.
Quant il a son hosteil veü
Si robei et si desgarni:
"Hé! Diex, com m'aveiz escharni,
Dit li chevaliers, biauz doulz Sire!
Or ne cuidai qu'en nul empire
Eüst teil fame com la moie:
De grant noiant m'esjoïssoie.
Or voi ge bien et croi et cuit
N'est pas tot ors quanque reluit."
Or seit il et seivent li moinne
Li soucretainz sa fame enmoinne.
Aprés s'en vont grant alleüre;
Ne chevauchent pas l'ambleüre

Mais tant com chevaul pueent corre,
Qu'il cuident lor proie rescorre.
Ce jor les mena bien Fortune:

Voie nes destorna nes une,
Ainz ont la droite voie alee
La ou cil firent lor alee.
Tant ont le jor esperonnei
Qu'avant que ho eüst sonei
Nonne vindrent au leu, je cuit,
Qui plus lor grieve et plus lor cuit.
Auz rues forainnes se metent
Et dou demandeir s'entremetent
Se hon avoir teil gent veüe
Qui ont teil vis et teil veüe:
Toute devisent lor fason.
"Por Dieu! savoir le nos face hon
C'il demeurent en ceste vile,
Car mout nos ont servi de guile."
Li chevaliers lor redescuevre
De chief en chief le fait et l'uevre.
La Renomee qui tost vole
A tant portee la parole
Qu'ele est a leur voizins venue

En une mout forainne rue,
Car la gent qui a ce s'atorne
En destornei leu se destorne.
Eulz encuza une beguine;
Sa langue ot non "Male voizine".
Or ont beguin chïé el fautre;
Beguin encuzent li un l'autre,
Beguin font volentiers damage,
Car c'est li droiz de beguinage.
Mais que loz em puissent avoir,
Beguin ne quierent autre avoir.
Cil s'en revont a la justise.
Li chevaliers lor redevise
Si com ces genz ont meserré
Et tot l'erre qu'il ont errei.
Et l'avoir qu'aportei en orent
Devizerent au mieuz qu'il porent.
Por ce c'om les trouva en voir,
Si recovint par estovoir
Que cil fussent lié et pris
Qui si durement ont mespris.
Pris furent et mis en prison
Por teil fait, por teil mesprison.
Et cil s'en vont lor garant querre
Qui ne sont pas loing de lor terre.
Or furent cil pris et loié
Que li Maufeiz ot desvoié.
Par maintes fois m'a hon contei
C'om doit reproveir sa bontei:
Li preudons sa bontei reprueve;
La glorieuze Dame rueve
Que de ce peril les delivre,
Qu'il cuident avoir estei yvre.
Dit li preudons: "Vierge pucele
Qui de Dieu fuz mere et ancele,
Qu'en toi eüz la deïté
Qui en toi prist humanitei,
Se ta porteüre ne fust
Qui fu mise en la croiz de fust,
En enfer fussiens sanz retour:
Ci eüst perilleuze tour.
Dame qui par ton doulz salu
Nos as getei de la palu
D'enfer, qui est vilz et oscure,

Vierge pucele nete et pure,
Dame servie et reclamee,
Par toi est toute fame amee.
Si com la roze ist de l'espine,

Issiz, glorieuze roïne,
De juerie qu'est poignanz,
Et tu iez soeiz et oignanz.
Dame, je vos ai tant servi,
Ce se pers que j'ai deservi,
Ci aura trop grant cruautei.

Vierge plainne de loiautei,
Par ta pitié de ci nos oste:
Ci a mal hosteil et mal hoste."
Dit la dame: "Vierge honoree
Que j'ai tantes foiz aoree
Et servie si volentiers,
Secour nos, qu'il en est mestiers!

Vierge pucele, Vierge dame,
Qui iez saluz de cors et d'arme,
Sequour ton serf, secour ta serve,
Ou ci at perilleuze verve.
Pors de salut, voie de meir,
Cui toz li siecles doit ameir,
Car regarde ceste forfaite
Qui de t'aïde a grant soufraite.
Dame cui la grace est donee
D'estre des anges coronee.

Et d'aidier toute creature,
De ceste grant prison oscure
Nos gete par ta volentei,
Qu'Anemis nos a enchantei,
Et ce par toi ne sons delivre,
A grant doleur nos couvient vivre."
Bien a oïe la complainte
La Mere Dieu de la gent sainte,
Si com il i a bien paru:
En la chartre a eulz aparu.
De la grant clartei souverainne
Fu si toute la chartre plainne
Que la gent qui furent humain
Ne porent movoir pié ne main.
Cele clartei qui si resclaire
Avec tot ce si soeif flaire.
Devant eulz vint la glorieuze
Qu'a nul besoing n'est oblieuze.
Les maufeiz tint enchaeneiz
Qui ces genz ont si maumeneiz.
Tant d'oneur lor commande a faire
Com il lor ont fait de contraire.
Cil ne l'ozerent refuzeir
Ne ne s'en porent escuzeir.
Chacuns de ces .II. anemis
A l'un de ceux sor son col mis.
D'iluec s'en tornerent grant oire.
Lor petit pas semblent tounoire.

Inelement vindrent a porte
A tout ce que chacuns enporte.
Li uns met celui en sa couche
Et li autres la dame couche
Leiz son seigneur si doucement
Que cil, qui dormoit durement,
Ne s'esveilla ne ne dist mot
Ne ne sot quant il sa fame ot.
Et l'avoir ront si ordenei
Qu'il ont aus moinnes or donei
Et argent que cil orent pris
Qui si durement ont mespris.
Li chevaliers rot son avoir,
C'onques ne pot aparsouvoir
C'on i eüst onques touchié.
Eiz vos l'afaire si couchié
C'or n'i pert nez que coz en eve.
Dés que Diex fist Adam ne Eve
Ne fu afaires si desfaiz
Ne esfaciez si grant mesfaiz.
Cil qui savoit de la nuit l'eure

Vest sa robe et se lieve seure
Et va ces matines sonneir.
Qui oïst moinnes tansonneir!
Si fist: "Ha! ha! hé! hé! sus! sus!"
Dit li abés: "Rois de lasus,
Biauz douz Peres, ce que puet estre?
Ce soit de par le roi celestre!"
Tuit se lievent inelepas
(Apris l'ont, ne lor grieve pas),
Si s'en sunt venu a l'eglize
Por commancier le Dieu servise.
Quant le soucretain ont veü,
Durement furent esmeü.
Dit li abés: "Biauz doulz amis,
Qui vos a ci ilec tramis?
Aleiz en autre leu entendre,
Qu'il n'a mais el tresor que prendre."
Dit li soucretain: "Biau doulz sire,
Qu'est or ce que vos voleiz dire?
Preneiz vos garde que vos dites!
- Je cuidai vos fussiez hermites,
Dist li abés, danz glouz lechierres,
Et vos estes .I. mauvais lerres
Qui nos aveiz emblé le nostre!
- Foi que je doi saint Poul l'apostre,
Dit li soucretains, sire chiers,
De parler estes trop legiers.
Se je vos ai fait vilonie,
Ne sui je en votre baillie?
Si me poeiz en prison metre.
Ne vos deveiz pas entremettre
De dire choze ce n'est voire,
Ne ne me deveiz pas mescroire.
Aleiz veoir a vostre perte:
Se vos la troveiz descouverte,
Se j'ai de riens vers vos mespris,
Je lo bien que je soie pris."
Au trezor aleir les rova:
Chacuns i va, ainz n'i trova
C'on i eüst mesfait noiant.
"Fantosme nous va faunoiant,
Dist li abés, seignor, sanz faille.
N'avoit ier ci vaillant maaille,
Et or n'i pert ne que devant."
Eiz vos esbahi le couvent.
La dame, qui aleir voloit
Au moutier, si com el soloit,
Geta en son doz sa chemise.
Aprés si a sa robe prise.
Atant li chevaliers s'esvoille,
Car mout li vint a grant mervoille
Quant il senti leiz lui la dame.
"Qui est ce ci? - C'est vostre fame.
- Ma fame ne fustes vos onques!"
Li chevaliers se seigne adonques,
Saut sus, si a .I. tortiz pris.
Au lit s'en vient d'ireur empris.
Plus de .C. croix a fait sor lui.
"Ne cuidai qu'il eüst nelui,
Dit li chevaliers, avec moi;
Et orendroit gesir i voi
La rienz que je plus doi haïr.
Or me doi ge bien esbahir,
C'or aurai a non sire Hernous:
Ce seurenon ai ge par vos."
Dit la dame: "Bien porriez
Mieuz dire, ce vos voliez.
Aleiz veoir a votre choze:
Pechié fait qui de noiant choze."
Tant le mena sa va, la va,
Li chevaliers veoir i va.
Ne trueve qu'il ait rienz perdu:
Eiz le vos si fort esperdu
C'om le peüst penre a la main.
"C'il ne me couvenist demain
A mon jour aleir, sachiez, dame,
Ne vos mescreüsse, par m'ame,
Car j'ai quanque perdu avoie:
C'est fantome qui me desvoie!"
Au point du jor tantost se lieve,
Au couvent vient et ne li grieve:
"Seigneur, dist il, ma fame taing;
Raveiz vos votre soucretain?
- Oïl, oïl, dient li moinne.
C'est fantosme qui nos demoinne.
- Biau seigneur, dit il au couvent,
Nos avons a annuit couvent
Que nos irons a nostre jour,
Et nos soumes ci a sejour!"
Por ce chacuns s'apareilla;
Montent, chevauchent, viennent la
Et truevent les .II. anemis
Qui enz semblances se sunt mis
De ceux qu'il en orent gitié
Quant Notre Dame en out pitié.
Eiz vos la gent toute esbahie
Et dou siegle et de l'abaïe:
Onques mais si fort ne le furent.
Por ce c'onques ne s'aparsurent
D'avoir perdu or ne argent
Et si orent arier lor gent
Qu'il avoient devant perdue,
Eiz vos la gent toute esperdue.
Consous lor donent qu'il alassent
A l'evesque et li demandassent
Queil choze il loeroit a faire
D'un teil quas et d'un teil afaire.
Tuit ont pié en estrier remis
Et se sunt a la voie mis.
Mais n'orent pas alei granment,
Se li escripture ne ment,
Que de l'evesque oient parleir:
Cele part prenent a aleir.

Vienent la, li uns li raconte
La chose, et li evesque monte,
Qu'il wet savoir que ce puet estre.
Mout se seingne de la main destre.
Tant ont chevauchié que la viennent.
Et li deable que se tiennent
En leu ce ceuz que il avoient
Delivreiz, quant il venir voient
Le prelat, moult grant paor orent,
Por ce que en veritei sorent
Que li prelas moult preudons iere:
Chacuns en enclina la chiere.
Li prelaz entre en la prison
Et regarda chacun prison.
Et quant il les ot regardeiz,
Si lor a dit: "Or vos gardeiz
Que vos me dites de ce voir:
Est ce por la gent desouvoir
Que pris en prison vos teneiz?
Or me dites dont vos veneiz."
Cil, qui n'ozerent au preudome
Mentir, li conterent la soume
De lor afaire et de lor voie.
Dit li uns: "Guerroié avoie
Une dame et .I. soucretain,
Por quoi pris en prison me taing,
Car honte lor cudoie faire.
Onques ne les pou a moi traire
Ne atorneir a mon servise,
Si m'en sui miz en mainte guise
Par quoi sor eulz pooir eüsse
Et que desouvoir les peüsse.
Moult cuidai bien avoir gabei
Chevalier, covent et abei,
Quant juque ci les fis venir:
Lors les cuidai moult bien tenir.
Onques nes poi a ce meneir,
Tant fort m'en seüsse peneir,
Que pechier les peüsse faire.
Or ai perdu tot mon afaire,
Si m'en irai lai dont je vaing,
Car bien ai travillié en vain.
Or aint li chevaliers sa fame,
C'onques ne vi si preude fame;
Cil tiengnent lor chenoine chier,
C'onques nes pou faire pechier."
Quant ces genz la parole oïrent,
Mout durement s'en esjoïrent.
Li chevaliers a moult grant joie.
Tart li est que sa fame voie,
Si l'embracera doucement,
Car or seit il bien vraiement
Qu'il a preude fame sanz doute.
La gent de l'abaïe toute
Refont grant joie d'autre part.
D'ilec cele gent ce depart.
Moult fu bien la poinne seüe
Que ces genz avoient eüe;
Cel sout mes sires Beneoiz,
Qui de Dieu soit toz beneoiz.
A Rutebuef le raconta
Et Rutebuez en .I. conte a
Mise la choze et la rima.
Or dit il que c'en la rime a
Chozë ou il ait se bien non,
Que vos regardeiz a son non.
Rudes est et rudement huevre:
Li rudes hom fait la rude huevre.
Se rudes est, rudes est bués;
Rudes est, s'a non Rutebuez.
Rutebuez huevre rudement,
Souvent en sa rudesce ment.
Or prions au definement
Jhesucrit le Roi bonement
Qui nos doint joie pardurable
Et paradis l'esperitable.
Dites Amen trestuit encemble,
Ci faut li diz, si com mei cemble.
Explicit.
 

Ci encoumence la vie de Sainte Elyzabel, fille au roi de Hongrie 

Cil Sires dit, que hon aeure:
"Ne doit mangier qui ne labeure";
Mais qui bien porroit laborer
Et en laborant aoreir
Jhesu, le Pere esperitable,
La cui loange est parmenable,
Le preu feroit de cors et d'arme.
Or pri la glorieuze Dame,
La Vierge pucele Marie,
Par cui toute fame est garie
Qui la wet prier et ameir,
Que je puisse en teil leu semeir
Ma parole et mon dit retraire
(Car autre labour ne sai faire)
Et que cele en bon grei le preingne
Por cui j'enpraing ceste besoigne,
Ysabiaus, fame au roi Thiebaut,
Que Dieux face hatié et baut
En son roiaume o ces amis
Lai ou ces deciples a mis.
Por li me wel je entremetre
De ceste estoire en rime metre
Qui est venue de Hongrie,
Si est li Procés et la Vie
D'une dame que Jhezu Criz
Ama tant, ce dit li escriz,
Qu'il l'apela a son servize.
De lei list on en sainte Eglize.
Si com hon tient le lis a bel,
Doit hon tenir sainte Ysabel
A sainte, a sage et a senee.

Vers Dieu ce fu si asenee
Que toz i fu ces cuers entiers
Et s'atendue et ces mestiers.
Ysabiaus fu moult gentiz fame
De grant linage et bone dame,
De rois, d'empereours, de contes,
Si com nos raconte li contes.
La renomee de s'estoire
Alat a la pape Gregoire.

VIII apostoles ot a Roume
Devant cestui, ce est la soume,
Qui furent nomei par cest non.
Preudons fu et de grant renon,
Et droiz peires en veritei
Et au pueple et a la citei.
Chacun de la dame parla
Et des miracles que par la
Faisoit de contraiz redrecier,
De sours oïr, foulz radrecier,
De malades doneir santei,
D'autres miracles a plantei.
Quant notre peres l'apostoles
Ot entendues les paroles
Et la sainte vie a celi,
Moult li plut et li abeli.
Par sairemens le fist enquerre
Au granz preudomes de la terre,
C'om li mandast par letres clozes
Le procés et toutes les chozes
Que hon en la dame savoit
Qui si grant renomee avoit.
Li grant preudome net et pur
S'en alerent droit a Mapur,
La ou ceste dame repoze,
Por mieuz enquerre ceste choze.
Si assemblerent, ce me cemble,
Evesque et arcevesque encemble
Et preudomes religieuz
Qui n'estoient pas envieuz
De dire fable en leu de voir.
Quanque on puet aparsovoir
De ces miracles et troveir,
Quanqu'om pooit par droit proveir,
Enquistrent bien icil preudome
Dont je pas les nons ne vos nome.
Et nonporquant inelement
Ce il ne fussent alemant
Les nomasse, mais ce seroit
Tenz perduz qui les nomeroit.
Plus tost les nomasse et ansois
Ce ce fust langages fransois.
Mais n'ai mestier de dire fable:
Preudome furent et creable.
Ces preude genz firent escrire
En perchemin et clore en cyre
Quanqu'il porent aparsouvoir,
Sens assembleir mensonge a voir.
Li messagier furent mandei,
Onques n'i ot contremandei.
Assemblent soi, assemblei furent,
Encemble, ce me cemble, murent.
Lor besoignes bien atornees,
Tant alerent par lor jornees
La voie plainne et la perrouze,
Le pape truevent a Perrouze.
Tost fu la novele seüe;
La pietaille c'est esmeüe:
Chacuns vient, chacuns i acourt.
Li mesagier vindrent a court,
L'apostole baillent l'escrit
La ou li fait furent escrit
De la dame vaillant et sage.
Mout furent joï li message.
L'apostoles les lettres euvre
La ou li procés et li euvre
De cele dame fu descrite
Qui si fu de tres grant merite.
Cil sainz preudons la letre lit:
Li lires mout li abelit.
Moult prise la dame et honeure,
Por la dame de pitié pleure
Et de grant joie ausiment.
Que vos iroie plus rimant?
Saintefiee fu et sainte.
Puis fist ele miracle mainte
Que vos m'orroiz retraire et dire.
Dés or coumance la matire.
Ce fu donei a la Perrouze
Por la dame religiouze
De bone conversacion,
En l'an de l'incarnacion
Mil et .II. cens et quatre et trente,
Si com l'escriture le chante.
Por noiant vit qui ne s'avoie.
Qui ne wet tenir bone voie
Tost est de voie desvoiez.
Por ce vos pri que vos voiez
La vanité de ceste vie
Ou tant a rancune et envie.
Cil qui tout voit nos ravoia,
Qui de paradix la voie a
Batue por nos avoier.

Veeiz prevost, veeiz voier,

Voie chacuns, voie chacune:
Or n'i a il voie que une.
Qui l'autre voie avoiera,
Foulz iert qui le convoiera.
N'i fu pas la dame avoïe
Qui des anges fu convoïe
Lasus en paradix celestre
Quant dou siecle deguerpi l'estre,
Car sainte vie et nete et monde
Out menei la dame en cest monde.
Au roi de Hongrie fu fille.
Sa Vie, qui pas ne l'aville,
Dit que dame fut de Turinge.
Asseiz souvent laissa le linge
Et si frota le doz au lange.
Asseiz ce fist dou siecle estrange.
A Dieu servir vout son cuer mettre
Car, si com tesmoigne la lettre,

Vertuz planta dedens son cuer:
Auz euvres parut par defuer.
Touz vices de sa vie osta:
De Dieu s'oste qui teil oste a,
Ne puet ameir Dieu par amors.
Escole fu de bones mors,
Essamples fu de penitance
Et droiz miraours d'ynnocence,
Si com briement l'orroiz retraire,
Mais qu'il ne vos doie desplaire.
Si honeste vie mena
Tant com en cest siecle regna,
Dés qu'ele n'avoit que .V. anz
Juqu'ele en ot je ne sai quanz,
C'est a dire toute sa vie,
Que d'autre vie n'ot envie,
Si com li preudome l'enquistrent
Qui a l'apostole le distrent.
N'osta donc bien vices de li
Cele qu'a Dieu tant abeli,
Quant ele, qui si gentiz dame
Estoit come plus puet estre fame,
Fuioit les vaniteiz dou siecle
Et encignoit la droite riegle
D'avoir le regne pardurable
Avec le Peire esperitable
A ceux qui avec li estoient,
Qui de teil vie la savoient?
Orgueil, ireur et gloutenie
Et vices dont l'arme est honie,
Luxure, accide et avarice,
Et puis aprés le vilain vice
Qui a non envie la male,
Qui l'envieuz fait morne et pale,
Osta si et mit a senestre
Que Diex en ama miex son estre.
Por ce que sarmoneir me grieve,
Le prologue briement achieve,
Que ma matiere ne destruie:
Hon dit que biaux chanters anuie.
Or m'estuet brief voie tenir,
A mon propoz m'estuet venir.
Escouteiz donc, ne faites noize,
Si orroiz ja, c'il ne vos poize,
Les miracles apers et biauz
Que ma dame sainte Ysabiaus
Fist a sa vie et a sa mort.
Ainz puis meilleur dame ne mort
La mors qu'ele vint cele mordre
Qu'a Dieu servir se vout amordre.
Ne tint mie trop le cors chier:
Avant se laissast escorchier
Qu'au cors feïst sa volentei,
Tant ot le cuer a Dieu plantei.
En quatre pars est devisee
Sa Vie qui tant est loee.
La premiere partie dist
Les euvres qu'en sa vie fist:
Coument a Dieu servir aprist,
Juques lors qu'ele mari prist
Coument ce tint et nete et monde.
Or dit la partie seconde
Coument ele fut preuz et sage
Puis qu'ele entra en mariage.
La tierce partie devise
En queil maniere et en queil guise

Vesqui puis la mort son seigneur
Qui tant la tin a grant honeur,
Tant que par grant devocion
Prit l'abit de religion.
Ne vos wel pas faire lonc conte:
La quarte partie raconte
Coument cele qui teil fin a
Sa vie en l'Ordre defina.
Puis orroiz en la fin dou livre,
Se Jhesucriz santei me livre,
Miracles une finitei
Que cil de sa voizinetei,
Qui furent creable et preudome,
Proverent a la cort de Rome.
Moult est muzars qui Dieu ne croit,
Et cil mauvais qui ce recroit
De celui Seigneur criembre et croire
Qui nule fois ne seit recroire
D'acroitre seux qui en lui croient.
Donc sont cil fol qui ce recroient
Qu'au Criatour merci ne crient.
Cil qui de cuer ver li s'escrient,
C'il ont el Creator creance,
Endroit de moi je croi en ce
Que lor larmes, lor pleurs, lor criz
(Ou David ment en ces escriz)
Seront en joie converti.
Et cil seront acuverti
Qu'adés acroient seur lor piaux,
Car li paiers n'iert mie biaux.
Ceste dame qui en Dieu crut,
Qui seur ces piaux petit acrut,
Se dut bien vers Dieu apaier,
Car de legier le pot paier.
Or dit l'estoire ci endroit
.V. anz avoit d'aage droit
Sainte Ysabiaux, la Dieu amie,
La fille le roi de Hongrie,
Quant a bien faire conmensa.
Dés les .V. ans et puis ensa
Ot avec lui une pucele
Qui avoit auteil non com ele
Et vierge estoit er monde et nete,
Pucele non, mais pucelete.
Avec li fu por li esbatre:
L'une ot .V. anz et l'autre quatre.
A cele vierge fu requis
Et bien encerchié et enquis,
Qu'avec la dame avoit estei
Et maint yver et maint estei,
Qu'ele deïst tot le covainne
Coument la dame se demainne.
Cele jura et dit aprés:
"Or escouteiz, traeiz vos prés,
S'orroiz, dit ele, de celi
Qu'a Dieu et au siecle abeli.
Je vos di, et seur ma creance,
Que ceste dame dés c'enfance.
Si mit toute s'entencion
En Dieu et en religion:
Ce fut ces droiz entendementz,
Ces geuz et ces esbatemenz.
Car dés lors que .V. anz n'avoit,
Ja soit ce lettres ne savoit,
Portoit .I. sautier a l'eglize
Si com por dire son servize.
Leiz l'auteil voloit demoreir
Si com c'ele seüst oreir.
Afflictions faisoit el toutes.
A nuz genoulz et a nuz coutes,
Au pavement joignoit sa bouche:
N'i savoit nul vilain reprouche.
Li enfant qu'avec li estoient
Un geu souventes fois faisoient
Si com de sallir a un pié;
Et cele par grant amistié
Si c'en fuioit vers la chapele
Et laissoit chacune pucele
Si com s'adés deüst saillir.
Quant a l'entreir douvoit faillir,
Tant avoit cuer fin et entier
Que por Dieu baisoit le sentier.
Sachiez, ja ne fust en ce leu,
C'ele joast a queilque geu,
Que s'esperance et sa memoire
Ne fust a Dieu, le Roi de gloire.
Car se li cors jooit la fuer,
A Dieu avoit fichié le cuer.
Ainsi jooit sanz cuer li cors,
Li uns a Dieu, l'autre la fors.
A aucune des puceletes
Dizoit: "Je wel leiz moi te metes
Si te wel prier et requerre
Que nos mesurons a la terre,
Car de savoir sui mout engranz
La queiz de nos .II. est plus granz."
Si n'avoit de mesurer cure:
Por li couvrir par la mesure

Voloit que plus de bien feïst
Et plus de proieres deïst.
Ancor vos di ge derechief
Porce que saint Jehan en chief
Est garde de toute chastee,
Que la soie ne fust gastee,
Por ce i avoit s'amor mise
Et son cuer mis en son servize.
Celui ewangelistre amoit,
Aprés Dieu seigneur le clamoit.
S'om li demandoit por celui,
Ele n'escondizoit nelui.
Celui servi, celui ama,
Aprés Dieu son cuer et s'arme a
Mis a celui dou tout en garde.
Ne fist pas que fole musarde.
Se hom li eüst choze faite
Dont ele fust en iror traite,
Por saint Jehan l'Ewangelistre,
Son droit maitre et son droit menistre,
Li estoit dou tout pardonei,
Que ja puis n'en fust mot sonei.
Ancor vos di, c'il avenist
Qu'aleir gezir la couvenist,
C'ele n'eüst asseiz prié
Dieu et de cuer regracié,
Ele prioit dans son lit tant
Que mout c'i aloit delitant.
Aprés vos di a briez paroles:
En geuz, en festes, en quaroles
Et a quanque enfant doit plaire,
Si com c'el n'en eüst que faire,
Laissoit ele, saichiez sanz doute,
Car ne prisoit gaires teil route
Envers l'ami c'om doit ameir,
En cui amors n'a point d'ameir.
Ensi vesqui en sa jonesce.
Asseiz ot anui et destresse
Ansois qu'ele fust mariee,
Car a norrir estoit livree
Au plus granz seigneurs de l'empire.
De toute gent estoit la pire
Qui fust en la maison son peire.
Dure gent i out et ameire
Envers li plus qu'il ne dovoient.
Par envie moult la grevoient,
Tant i avoit venin et fiel.
"Ceste pantra la grue au ciel",
Fasoient il par ataïne,
Tant avoient en li haÿne
Por ce qu'onestement vivoit,
Et li faus envieuz qui voit
Honeste gent d'oneste vie
A toz jors d'eulz greveir envie.
Avant que son seigneur eüst
Ne que de l'avoir riens seüst
Fors ensi com la gent devine,
Cil qui savoient la couvine
Son seigneur li blament souvent
Et li aloient reprouvent
Ce que il la voloit ja prendre.
Ce il li peüssent deffendre,

Il li eüssent deffendu
Que ja n'i eüst entendu.
Et disoient sui concillier:
"Nos nos poons moult mervillier
Que beguins voleiz devenir.
Ne vos en poeiz plus tenir:
S'est folie qui vos enheite!"

Vollentiers l'eüssent soutraite
Et menee a aucun manoir,
Quant il virent que remanoir
Ne porroit mais, c'est la parcloze,
Et li eüssent fait teil choze
Dont ele perdist son doaire

Et s'en repairast au repaire
Son pere dont ele iere issue.
Mais Dieux l'en a bien deffendue,
Car celui qui Diex prent en cure,
Nuns ne li puet greveir ne nuire.
Or aveiz oïe s'enfance
Toute, fait cele, sanz doutance.
- Bele suer, com bien puet avoir
Que vos puissiez aparsavoir
Qu'avec li conversei aveiz?
Dites le nos, se vos saveiz",
Distrent cil qui firent l'essai.
"Sire, dist ele, je ne sai.
Je di por voir, non pas devin,
Dès lors qu'avec ma dame ving,
Quatre anz avoie et ele cinc.
Dès lors i ai estei ainsinc
Tant qu'ele vesti robe grise
(Tant vos en di, plus n'en devise)
C'est a dire l'abit de l'Ordre,
Qu'a teil amors ce vout amordre."
Piez poudreiz et pencee vole
Et cil qui par cignier parole
Sont troiz chozes, tot sanz doutance,
Dont je n'ai pas bone esperance
Ne nuns preudons ne doit avoir.
Car par ces trois puet hon savoir,
Qui a droit senz, le remenant.
Qui lors va celui reprenant
Et qui a bien faire l'enseigne,

Si vaut autant com batre Seinne.
Tout est perdu quanc'om li monstre:
Dites li bien, il fera contre,
Car il cuderoit estre pris
C'il avoit a bien faire apris.
Ne vaut noiant; li cuers aprent,
Li cuers enseigne et si reprent;
Au cuer va tout: qui a boen cuer
Les oeuvres moutre par defuer.
Li mauvais cuers fait mauvais home;
La preude fame et le preudome
Fait li boenz cuers, n'en douteiz mie.
Ceste qui a Dieu fu amie
Et qui a Dieu ce vout doneir
Ne s'en fist gaires sermoneir:
Sa serve fu, bien le servi,
Par bien faire l'a deservi.
Li boens sergens qui de cuer sert
En bien servir l'amor desert
De son seigneur par bien servir.
Qui ne se voudra aservir,
Je loz l'amour de Dieu deserve
Qui que il soit, ou sers ou serve.
Car qui de cuer le servira,
Bien sachiez qu'il deservira
Par quoi l'arme de lui iert franche:
Ci n'a mestier fuie ne guanche.
Sainte Ysabiaux ot droit aage
D'avoir ordre de mariage.
Mari li donent; mari a,
Car cil qui bien la maria
N'en douta gaires chevaliers
Ne senechauz ne concilliers:
Ce fu li rois qui tot aroie,
Jhesucriz, qui les siens avoie.
Or dit la seconde partie
Que l'enfance est lors departie
Que fame pert non de pucele.
De ceste, qui dame novele
Est orendroit, vos wel retraire:
Or entendeiz de son afaire.
Li preudome orent moult grant cure
De savoir la veritei pure
De la sainte vie de ceste.
Mout en furent en grant enqueste.
Yzentruz, qui fu veve fame
Religioeuze et bone dame,
Fu avec li .V. anz, se croi,
De son conseil, de son secroi,
Au vivant Loÿs Landegrave.
Aprés i fu la dame vave
Puis que Loÿs fu trespasseiz
Un an entier et plus asseiz,
Tant qu'el ce fu a l'Ordre mise.
Des enquereours fu requise
Yzentruz de dire le voir.
Jureir l'estut par estovoir.
Yzentruz fist son sairement
Et puis si dist apertement
A son pooir la veritei:
"Humble, plainne d'umilitei
Est moult sainte Ysabiaus, fait ele.
Ja ne queroit de la chapele

Issir, ja ne querroit qu'oreir
Et en orisons demoreir.
Mout murmurent ces chamberieres
Que jamais ne queroit arieres

Venir dou moutier, ce lor cemble,
Mais coiement d'entr'eles s'emble
Et va Dieu prier en emblant:
Jamais ne verroiz sa semblant.
Quant plus iere en grant seignerie
Et plus iere amee et chierie,
Lors avoit ele un mandiant,
Qu'ele n'alast Dieu obliant,
Qui n'avoit pas la teste sainne;
Ainz vos di qu'il l'avoit si plainne
D'une diverse maladie
Que n'est pas droiz que je vos die
(Senz nomeir la poeiz entendre),
Que nuns n'i ozast la main tendre.
Celui netioit et mundoit,
Celui lavoit, celui tondoit:
Plus li faisoit, que vos diroie,
Que dire ne vos ozeroie.
En son vergier menoit celui,
Por ce que ne veïst nelui
Et que nuns hons ne la veïst.
Et s'aucune la repreïst
Et ele ne savoit que dire,
Si prenoit par amours a rire.
Entour li avoit .I. preudome
Que chacuns maitre Corraz nome
De Mapur, qui obediance
Li fist faire par l'otroiance
De son seigneur. Or soit seü
De quoi l'obediance fu;
Qui le vodra savoir, sel sache:
En l'abaïe de Senache,
Qui est de sainte Katerine,

Voa de pencee enterine
A entreir, se trovons el livre,
Se son seigneur pooit sorvivre.
Puis aprés li fist estrangier
Toute la viande a mangier
Dont ele pence ne devine
Qui soit venue de rapine.
Et de ce ce garda si bien
Que onques n'i mesprist de rien;
Car, quant la viande venoit
De leu qu'ele soupesenoit,
Et leiz son seigneur assise iere,
Si deïssiez a sa meniere
Qu'ele manjast, ce n'est pas fable,
Plus que nuns qui fust a la table:
Ce de mangier l'escondissoit
Que sa et la le pain brisoit.
Or savoient iteiz noveles
Trois senz plus de ces damoizeles;
Son seigneur dient en apert
Que il s'arme traït et pert
Et que jamais n'iert asolue
De mangier viande tolue.

Il lor repont: "Forment me grieve,
Mais ne sai coument j'en achieve,
Et sachiez je n'en mangeroie
Ce les paroles n'en doutoie:
Se g'en faz ce que faire doi,
Ma gent me monterront au doi.
Mais bien vos di certainnement,
Se je puis vivre longuement,
Seur toute riens que je propoze
Moi amendeir de ceste choze."
Quant de droite rente venoit
La viande, si la prenoit,
Ou des biens de son droit doaire;
D'autre n'avoit ele que faire.
De ceulz manjue, de ceulz use,
Et ce cil faillent, si muze
Et ele et toute sa maignie:
Eiz vos sa vie desraignie.
Mais a pluseurs seigneurs mandoit
Et en present lor demandoit
Qu'il li donassent de lor biens
S'om ne trovast a vendre riens,
Car de droite rente estoit cort
Li biens qui venoit a la cort,
Et ele avoit bien entendu
Que li maitres or deffendu.
Asseiz souvent manjassent bien
Moult volentiers, ele et li sien,
Dou pain, se assez en eüssent
Que sanz doute mangier peüssent.
Et a la table endroit de soi
Avoit souvent et fain et soi.
Asseiz parlerent maintes bouches
Et distrent moult de teiz reprouches
Qui ne furent ne bel ne gent;
Cil n'ierent pas estrange gent,
Mais de la gent de lor hosteil,
Et dient c'onques mais n'ot teil
Mari dame com ceste la.
Chacuns le dit, nuns nel cela.
Jamais ne li fust nuns anuiz
A releveir chacune nuit
Por aleir a l'eglize oreir,
Et tant i voloit demoreir
Que nuns penceir ne l'ozeroit:
Dou dire, folie seroit.
Moult souvent li dizoit ses sires:
"Dame, vaurroit i riens li dires?
Je dout mout que mal ne vos face
Que n'aveiz de repoz espace.
Cui adés covient endureir,
Je vos di qu'il ne puet dureir."
Moult prioit a ces damoizeles
A toutes encemble que eles
L'esveillassent chacun matin;
Ne lor parloit autre latin.
Par le pié se faisoit tireir,
Car moult doutoit de faire ireir
Son seigneur et de l'esveillier.
Et il faisoit de soumeillier
Teil foiz semblant que il veilloit
Que que hon la dame esveilloit."
Dit Yzentruz: "Quant je voloie
Lei esvillier et je venoie
A son lit li par le pié prendre
Et je voloie la main tendre
Au pié ma dame et j'esveilloie
Mon seigneur, que son pié tenoie,

Il retreoit a li son pié
Et le soffroit par amitié.
Sor .I. tapiz devant son lit
Dormoit souvent a grant delit,
Par la grant plantei de prieres
Que Deux amoit et avoit chieres.
Quant dou dormir estoit reprise
Devant son lit en iteil guise,
Si respondoit com dame sage:
"Je wel que la char ait damage
En ce qu'ele soffrir ne puet
A faire ce que l'arme estuet."
Quant son seigneur laissoit dormant,
En une chambre coiement
Se faisoit batre a ces baasses,
Tant que de batre estoient lasses.
Quant avoit fait par grant loizir,
Plus liement venoit gesir.
Chacun jor en la quarentainne
Et une fois en la semainne
La batoient, ce vos redi,
En charnage le venredi.
Einsinc soffroit ceste moleste,
Devant gent fasoit joie et feite.
Quant ces sires n'i estoit pas,
Lors n'estoit pas la choze a gas:
En jeüneir et en veillier,
En oreir el cors travillier
Estoit ele si ententive
Qu'a grant merveilles estoit vive.
Ainsi vivoit et nuit et jor
Com dame qui est sanz seignor.
Si estoit debonaire et simple.
Bele robe ne bele guimple
Ne vestoit pas, mais la plus sale,
Tant que hon manjoit en la sale.
Et si estoit la haire mise
Emprés sa char souz sa chemise,
Et de robe estoit par defors
Moult richement vestuz li cors.
Lors peüst hon dire, ce cuit:
"N'est pas tot ors quanque reluit."
Lors estoit paree et vestue
Quant ele savoit la venue
Que ces sires dovoit venir,
Non mie por plus chier tenir
Le cors, se sachiés vos de voir;
Ainz poeiz bien aparsouvoir
Que ce pour son seigneur faisoit
Et que por ce mieulz li plaisoit.
A ces seculeres voizines,
Par jeünes, par deceplines
Enseignoit a fuir le siecle
Qui ne va pas a droite riegle
Et que chacuns devroit haïr,
Qui ne vodroit s'arme trahir.
Les quaroles lor deffendoit
Et toz les geus qu'ele veoit
Qui l'arme pooient correcieir.
Moult les amast a adrecieir
A honeste vie meneir
Par les bons essamples doneir.
Quant les borjoises dou chastel,
Affublees de lor mantel,
Aloient d'un enfant a messe,
Chacune aloit comme contesse,
Moult bien paree, a grant devise.
Ainsinc aloient a l'eglize,
Mais ele i aloit autrement,
Car ele i aloit povrement

Vestue et toute deschaucie.
Par les boes de la chaucie
Descendoit dou chatel aval,
Sens demandeir char ne cheval.
Son enfant en son braz venoit
Et sa chandoile ardant tenoit.
Tout ce metoit desus l'auteil,
Et un aignel, trestout auteil
Com Notre Dame fist au temple:
De ce prist ele a li essample.
En l'oneur Dieu et Notre Dame
Donoit a une povre fame
La robe qu'ele avoit vestue,
Quant de messe estoit revenue.
Moult ert la dame en orisons
Tant com duroient Rovisons,
Qu'entre les fames de la vile
(Ne cuidiez pas que se soit guile)
Se mussoit por aleir aviau.
Lors avoit ele son aviau!
Quant teile ovreigne pooit faire,
Jamais ne li peüst desplaire.
Filleir faisoit por faire toile;
N'est pas raisons que je vos soile
Qu'ele en faisoit quant faite estoit:
Freres Meneurs en revestoit
Et les autres qui de Poverte
Trouvoient trop la porte overte.
Toz biens a faire li plaizoit.
Les mors ensevelir faisoit.
S'aucun povre oïst esmaier
Qui deïst:"Je ne puis paier,
Laz! ne sai queil conseil g'i mete",
Ele paioit por li la dete.
Si ne li pooit abelir,
S'on faisoit riche ensevelir,
Qu'il enportast nueve chemise.
La viez li estoit en dos mise
Et la nueve por Dieu donee:
Si estoit la choze ordenee.
Ancor vos di, seigneur, aprés,
Ou que ce fust, ou loing ou prés,
Aloit les malades veoir
Et deleiz lor lit aseoir.
Ja si ne fust la maison orde,
Tant ot en li misericorde
Qu'el ne redoutoit nule ordure,
Car d'eulz aidier avoit grant cure.
Miresse lor estoit et meire,
Car n'estoit pas miresse ameire
Qui prent l'argent et si s'en torne,
Que que li malades sejorne;
Ansois ovroit de son mestier
Et i metoit le cuer entier.
Se li cors iere en guerre, dont
L'arme en atendoit guerredon.
Maitre Corraz por sermoneir
Et por boens examples doneir

Voloit aleir parmi la terre;
S'envoia cele dame querre.
Cele, c'une dame atendoit,
De la aleir se deffendoit,
Car c'estoit une grant marchise,
Si ne voussist en nule guise
Qu'ele ne trovast en maison,
C'on n'en deïst fole raison.
Por ce li fust de l'aleir grief.
Et cil la manda de rechief
Que seur son obediance veigne,
Que nule rient ne la deteigne.
Quant d'obediance parla,
Et la dame cele part la
C'en ala cens sa compeignie,
C'ele en deüst estre honie.
Merci cria de son mesfait
Et de l'irour qu'el li ot fait.
Ces compeignes furent battues,
Sens plus de chemises vestues,
Por le demoreir qu'eles firent
Puis que son messagier oïrent.
Or fu jadiz en un termine
Que il estoit moult grant famine,
Landegrave, qui preudons iere
Et qui l'amor Dieu avoit chiere,
Envoia com preudons loiaux
De ces granges especiaux
Tout le gaaingnage a Cremone,
Sanz ce que nuns ne l'en sermone,
Por departir au povre gens.
Moult iere li dons biauz et genz,

Car povres qui iere a sejour
De s'aumoenne passoit le jour.
A Watebort demoroit lors,
Un chatel de la vile fors.
Laianz a une grant maison
Qui lors estoit de la saison
Plainne d'enfermes et d'enfers:
Asseiz estoit griez ciz enfers.

Cil ne pooient pas atendre
Cele heure a quoi hon soloit tendre
Au povres l'aumoenne conmune;
Mais ja n'i eüst un ne une
Que ne veïst chacun par soi:
Cil n'avoient ne fain ne soi.
Ceux sermonoit sainte Ysabiauz,
Les moz lor dizoit doulz et biaux
De pacience et de salu,
Qui lor a auz armes valu.
Moult issoit souvent grant puour
De lor robes por la suour,
Si que soffrir ne la pooient
Celes qui avec li estoient.
Mais ele le soffroit si bien
Que jamais ne li grevast rien,
Ainz les couchoit et les levoit,
Que nule riens ne li grevoit,
Et les netioit neiz et bouche,
S'on l'en deüst faire reprouche.
La furent de par lei venu
Petit enfant et povre et nu
Qu'ele meïmes fist venir.
Qui les li veïst chiers tenir,
Leveir, coucheir, baignier et paistre,

Il la tenist a bone maistre.
Ne lor estoit dure n'ameire:
Li enfant l'apeloient meire.
A ceux aloit ele environ,
Ceux metoit ele en son giron.
A ce tens et a celui terme,
Trois manieres de gent enferme
Ot ele lors a gouverneir,
Que touz li couvint yverneir
(Et cil qui plus estoit haitiez
Ne ce soustenoit seur ces piez):
Mauvais i ot et si ot pires
Et trés mauvais; c'est granz martires.
Des .II. ai dit qu'ele en faisoit,
Coument ele les aaisoit;
Des autres vos dirai aprés.
Ceulz voloit avoir de li prés,
Devant le chatel leiz la porte,
La ou ele meïmes porte
Ce qu'a la table lor remaint.
Si lor espargnoit ele maint
Boen morcel qu'ele manjast bien:
Ce faisoit et ele et li sien.
A la table lor fut remeis
Uns poz qui n'estoit pas demeiz
De vin, si lor porta a boivre.
Si pou i ot, ne l'oz mentoivre.
Mais Dieux a cui rienz n'est celei,
Cui tuit secreit sunt revelei,
A cui nul cuer ne sunt covert,

I ouvra si, a descovert,
Que chacuns but tant com il pot
Et s'en remaint autant ou pot,
Quant chacuns ot asseiz beü,
Come au coumancier ot eü.
Je di por voir, non pas devine,
Moisson de semence devine
Moissonna en iteil meniere
Tant com meissons entra pleniere.
Touz ceulz qui se porrent leveir
Cenz eulz trop durement greveir
Revesti de lange et de linge
La bone dame de Turinge.
A chacun dona sa faucille
Por ce que hon les bleiz faucille:

Povres qui ne va faucillier
Ne ce porroit plus avillier
C'il est teiz que faucillier puisse,
Car il n'est nuns qui oizeul truisse
Lors clerc ne lai ne escuier,
Que il ne le doie huier.
Ainz que ces sires rendist arme,
Qu'ele estoit de Turinge dame,
Faisoit merveilles a oïr:
Lors la veïssiez esjoïr
Et de feste faire araignie
Qu'ele ert a privee maignie,
Senz compeigne d'estrange gent.
Ne demandoit pas le plus gent
Mantel qui fust dedenz sa chambre,
Si com l'estoire me remembre,
Mais le plus vil et le plus sale.
Ainsinc aloit parmi sa sale
Et bien disoit a bouche overte:
"Quant je serai en grant poverte,
Ainsinc serai je mais senz doute."
Puis ot ele povretei toute
Et bien prophetia, se cuis,
La povretei ou cheï puis,
Si com vo orroiz aprés dire
Se vos entendeiz la matire.
Touz jors à la Caine par rente,
Ne cuidiez pas que je vos mente,
Faisoit la dame .I. grant mandei
Ou li povre erent tuit mandei
Que la dame entour lei savoit.
A trestoz ceulz les piez lavoit
Et baisoit aprés essuier,
Ja ne li peüst anuier.
Et puis faisoit meziaus venir:
Qui lors l'en veïst couvenir,
Laveir les piez, baizier les mains!
Et trestot ce estoit dou mains,
Qu'avec aux se voloit seoir
Et les voloit de prés veoir.
Lors sermonoit en teil meniere:
"Moult deveiz bien a bone chiere,
Biau seigneur, soffrir cet martire.
N'en deveiz duel avoir ne ire,
Qu'endroit de moi j'ai la creance,
Se vos preneiz en paciance
Cest enfer qu'en cest siecle aveiz
Ne ce Dieu mercier saveiz,
De l'autre enfer seroiz tuit quite:
Or sachiez ci a grant merite."
Einsinc la dame sermonoit
Et puis aprés si lor donoit
A boivre et a mangier et robe,
Que ne les servoit d'autre lobe.
Se j'estoie boens escrivains,
Ainz seroie d'escrire vains
Que j'eüsse dit la moitié
De l'amour et de l'amistié
Qu'a Dieu moustroit et jor et nuit,
Mais je dout qu'il ne vos anuit.
Or a la dame ainsinc vescu
Et de sa vie a fet escu
Por s'arme deffendre et couvrir
Et por saint Paradix ouvrir
Envers li aprés son deceiz.
Pou en verreiz jamais de teiz
Qui fassent autant por lor ame.
Ainsi vesqui la bone dame
Tant com ces sires fu en vie.
Or orroiz la tierce partie
Qui parole de sa vevee,
Ou ele fu forment grevee.
Ces .II. fames qui jurei orent,
Qui la vie a la dame sorent,
S'acorderent si bien encemble
Que l'une raison l'autre cemble,
Par quoi cil qui l'enqueste firent
Moult durement s'en esjoïrent.
Et ces .II. avoient veüe
La bone vie et conneüe
Que ceste dame avoit menee
Qui tant fu et sage et senee.
Bons ovriers est qui ne se lasse:

Iteiz ovriers toz autres passe.
Qui porroit troveir teil ovrier,
Moult i auroit bon recouvrier;
Et moult est bons a mettre en huevre
Bons ovriers qui sanz lasseir huevre.
Cest ovrier vos wel descouvrir,
Por l'ovrier wel la bouche ovrir.
Li boens cuers qui Dieu doute et ainme,
Et la bouche qui le reclainme,
Li cors qui les euvres en fait
Et en paroles et en fait:
Ces .III. chozes mizes encemble,
C'est li ovriers, si con moi cemble;
C'est cil qui Dieu sert et aore,
C'est li labors que il labore.
Ceste dame teil oevre ouvra,
Boens ovriers fu, bien s'aovra,
Car senz lasseir le Roi de gloire
Servi, ce tesmoingne l'estoire.
La mors, qui fait a son passage
Passeir chacun, et fol et sage,

I fait ci passeir Landegrave.
La dame remaint dame vave;
Dame non pas, mais povre fame,
Car petit douterent lor ame
Li chevalier d'illec entour.
Fors dou chatel et de la tour
La getent et de son doaire;
Ne li laissent en nul repaire
A qu'ele se puisse assoupeir
Ne panre repast ne soupeir.
Li freres son seigneur vivoit
Qui jones hons ert et si voit
L'outrage que hon sa suer fait,
C'onques n'amenda le mesfait.
Or a quanque demandé a,
Or a ce a qu'ele bea,
Or est ele a sa volentei
Puis qu'ele chiet en povretei:
C'est ce qu'ele onques plus prisa,
C'est ce qu'a Dieu plus requis a.
Et por ce dist ci Rutebuez:
Qui a buez bee, ci a buez.
La dame est dou chatel issue,
Si est en la ville venue
Chiez un tavernier enz ou borc.
Et la taverniere l'acort
Et li dist: "Dame, bien veigniez!"
Li taverniers bien enseigniez
Li dit: "Dame, veneiz seoir:
Piesa mais ne vos pou veoir.
- Or ai mestier que hon me voie:
Hom m'a tolu quanque j'avoie,
Dit la bone dame en plorant,
De ce vois ge Dieu aorant."
Ensi jut la dame en l'osteil,
C'onques mais dame ne l'ot teil,
Mais li gezirs petit li grieve:
Endroit la mienuit se lieve,
Si ala oïr les matines
Auz Cordelés, mais ces voizines
N'i aloient pas a cele hore.
Moult mercie Dieu et aore
De ceste tribulation,
Et par mout grant devotion
Pria touz les Freres Meneurs
Graces rendissent des honeurs
A Dieu que il li avoit faites
Et de ce qu'il li a soutraites.
De grant charge l'a deschargie,
Car, qui richesse a enchargie,
L'arme est chargie d'une charge
Dont trop a envis se descharge,
Car moult s'i delite la chars.
Teiz charge fait le large eschars.
Qui de teil charge est deschargiez,
Si ne met pas en sa char giez
Li Maufeiz por l'arme enchargier.
Ne ce vout pas cele chargier
De teil charge, ainz s'en descharja;
Mise jus toute la charge a.
Or la repreigne qui la vaut:
Chargiez ne puet voleir en haut.
A l'endemain, sachiez de voir
Que nuns ne l'oza resouvoir
En son hosteil por habergier,
Ainz mena chiez un sien bergier
Ces enfans et ces damoizeles.
Or i a plus froides noveles,
Qu'il fist si froit que la dedens
Firent tuit martiax de lor dens.
La froidure lor fu destroite,
Et la maisons lor fu estroite.
Li bachelers, il et sa fame,
S'en issirent fors por la dame.
Dit la dame: "Se je veïse
Nostre hoste, graces li rendisse
De ce qu'il nos a hosteleiz.
Mais li hosteiz n'est gaires leiz."
A l'endemain est revenue
A l'osteil dont ele iere issue,
Mais nuns des homes son seigneur
Ne li porte foi ne honeur.
Chacuns dou pis qu'il puet li fait
Cens ce que riens n'i a meffait.
Chiez les parens de par le peire,
Ne sai chiez oncle ou chiez freire,
Ces enfans norrir envoia.
Cele remainc qui Dieu proia.
Une fois aloit a l'eglize
Por escouteir le Dieu servise,
Si passoit une estroite rue.
Contre li ce rest embatue
Une viellete qui venoit,
Cui ele s'aumoenne donoit.
Moult avoit en la rue fange,
Si fu la rue moult estrange;
De pierres i ot un passage.
La viellete, qui pou fu sage,
Geta la dame toute enverse
En cele grant boe diverse.
La dame d'ilec se leva,
Devesti soi, si se lava
Et rist asseiz de l'aventure
Et de la vielle et de l'ordure.
Petit menja et petit but,
Que la maladie li nut
Ou ele ot grant piece geü.
Sus se leva si a veü
Lez li une fenestre grant.
Cele qui d'orer fu en grant
Mist son chief fors par la fenestre
Por gracier le Roi celestre.
Quant les iex clot, longuement pleure,
Longuement en ce pleur demeure,
Et quant les iex vers le ciel oevre,
Le plorer pert, joie recuevre;
Et mena ainsi tele vie
Jusqu'endroit l'eure de complie:
A iex clos plaine de tristesce,
A l'ouvrir recuevre leece.
Puis dist la dame: "Ha! Rois de gloire,
Puis qu'avoir me veus en memoire,
Ensamble o toi sanz departir
Estre vueil et tu repartir
Me vueilles, sire, de ton regne
Et de t'amor qui partout regne." 
Ysantruz, qui plus fu s'amie
Que nule de sa compaignie,
Li dit: "Dame, a cui aveiz tant
Dit ces paroles que j'entant?"
Et sainte Ysabiaux li respont
Et les paroles li despont.
Son secreit li a descouvert
Et dit: "Je vi le ciel ouvert
Et vis Dieu vers moi enclignier,
Qui nelui ne wet engignier.
Conforteir me vint dou torment
Et de l'angoisse qui forment
M'ot tenue juqu'orendroit.
En ce point et en cel endroit
Que le ciel vi, si sui en joie;
Quant les yeux d'autre part tornoie,
Lors si me couvenoit ploreir,

Et la grant joie demoreir."
Or avint a celui termine,
De la dame de bone orine,
C'une sienne tante abaesse
De ce païs fu mout engresse
C'uns siens freres cui ele ert niece
La meïst chiez li une piece,
Si com teil dame, a grant honeur,
Tant qu'ele eüst autre seigneur.
Evesques estoit dou païs

Vers cele Hongrie laÿs.
Celes qui avec li estoient,
Qui chastée voei avoient,
Orent grant paor de s'aler
Et qu'ele ne fust mariee.
Mais la dame les reconforte
Et dit: "Mieulz vorroie estre morte
Qu'avoir ma foi vers Dieu mentie,
A cui je me sui consentie
A estre sa fame espouzee.
Teiz raisons ne sunt que rouzee,
Ne vous en deveiz desconfire:
Toutes raisons se laissent dire.
Sachiez, ce mes oncles m'esforce
Que je preigne mari a force,
Je m'enfuirai en aucun leu
Ou ge me ferai .I. teil geu
Que je me coperai le neis:
Si ert li mariage remeis,
Qu'il n'iert lors nuns hons qui ait cure
De si desfaite creature."
Cil siens oncles la fist meneir
A un chatel, tant qu'aseneir
La peüst a aucun preudoume;
Et vos savez, se est la soume,
D'ameir Dieu fist semblant et chiere,
Si n'en fut fauce ne doubliere.
Dementieres qu'en ce torment
Estoit dementans si forment,

Vint uns messagiers a la porte,
Qui unes noveles aporte
Qu'en son païs l'estuet erreir
Les oz son seigneur enterreir
C'on aporte d'outre la meir.
Cele qui tant le pot ameir
Rendi graces a Dieu lou peire
Et a la soie douce Meire
De ce qu'ainsi l'a conseillie.
De l'erreir c'est aparillie,

Vint la ou li vasseur l'atendent
Qui les oz enterreir conmandent
En un cloitre d'une abaïe.
Or ait Diex l'arme en sa baillie!
Landegrave fu mis en terre.
La dame prirent a requerre
Que ele a Turinge s'en veingne:

Il atorneront sa besoingne
De son doaire en iteil guise
Com la droiture le devise.
Dit l'evesques: "Ele i ira,
Mais que chacuns m'afiera
Que son doaire li rendroiz
Tantost qu'a Turinge vanroiz."
Mais pou prisa doaire et don,
Si qu'ariers s'en vint a bandon
Ou leu dont ele estoit issue.
Mais pou c'i est aresteüe
Quant ces maitres par estovoir,
Maitre Corraz, l'en fist mouvoir.
De son doaire estoit la vile
Et li chatiauz, ce n'est pas guile;
Mais avoir n'i pot remenance,
Qu'ele i iere sor la pesance
De ceulz qui aidier li devoient
Et il a force li grevoient.

Issi s'en, qu'issir l'en couvint.
A une vilete s'en vint,
Si entra en une maison
Qui n'estoit pas mout de saison:
Par les paroiz estoit overte
Et par deseure descoverte.
Fox est qui por teil leu s'orgueille!
Asseiz i pleüst se la fueille
Des aubres n'en otast la pluie:
S'a pluie mueille, a chaut essuie.
Dou pain manjue volentiers,
Non pas tant com li est mestiers:
Ne li chalut dou seureplus.
Ausi fu com en un renclus
Et sa gent conme gent rencluze:
N'est pas drois que Diex les refuze.
Li chauz, li venz et la fumee

I estoit bien acoutumee,
Se les grevoit auz ieuz souvent
Et les metoit en grief torment.
Nequedent ses mains en tendoit

Vers Dieu et graces l'en rendoit.
D'ilec s'en ala a Mapur.
Une maison faite de mur
De boe et de mauvais marrien,
Si viez qu'el ne valoit mais rien,
Ot ilec. Moult i demora,
Dieu i servi et aora.
A la bone dame donerent
.II. mile mars, a tant finerent,
De son doaire sui ami.
Ainz n'en retint marc ne demi:
Tout departi auz povre gens.
Ansi s'en ala li argens.
Or li furent remeis ancor
Robes, vaissiaux d'argent et d'or
Et drap de soie a or batuz:
Si fu li orgueulz abatuz,
C'onques nuns n'en vot retenir.
A Dieu en laissa couvenir.
El non dou Pere esperital
Fonda illec .I. hospital.

Illec couchoit a grant honeur
Moult des povres Nostre Seigneur;
A boivre, a mangier lor donoit,
Tot le sien i abandonoit.
De ces amis en fu blamee,
Laidengië et mesamee
Et clamee fole musarde,
Por ce que les povres regarde.
Quant tiez chozes pooit oïr,
Riens nel pooit plus esjoïr.
En poinne, en tribulacion
La conforta, ce dit l'estoire,
Aprés Dieu le pape Gregoire
Qui par letres la saluoit
Et mout d'escriz li envioit
Ou mout avoit enseignement
Par qu'ele vesqui chastement,
Examples de sains et de saintes
Et de douces paroles maintes.
Et li prometoit a avoir
Avec tout ce .I. doulz avoir,
C'est la joie de paradix
Que li saint conquirent jadiz.
C'ele vousist greigneur avoir,
Grant seignerie et grant avoir
Eüst eü plus que devant:
Tout ne prise un trespas de vent.
Maistre Corraz bien li sermone
Temporeiz choze ne foisone:
Tost est passei dou soir au main
Tiez richesce c'on a en main;
Ainsinc s'en vont com eles viennent
Que hom ne seit qu'eles deviennent.
L'amour de Dieu ot si ou cuer,
Toutes teiz chozes geta fuer.
Dou dit au maitre li souvint
Si que par force li couvint
Enfanz et richesce oblieir
Et seignorie et marieir.
Lors dist ele a ces chamberieres:
"Dieux a oïes mes proieres.
Seignorie que j'ai eüe
Ne pris pas un rain de secüe.
Mes enfans aim pou plus d'ainsinc
Que les enfanz a mes voizins.
A Dieu les doing, a Dieu les lais:
Faisse en son plaisir desormais!
Je n'aing fors Dieu tant soulement,
Mon creatour, mon sauvement."
Maitre Corraz mout la tentoit.
Por ce que plus la tormentoit,
Li ostoit d'entour li la gent
Dont plus li estoit bel et gent.
Si fist por li plus tormenteir
Et por li faire gaimenteir.
Dit Yzentrus: "Por ce que plus
M'amoit que tot le seureplus,
Me mit il fors de la maison;
Et si n'i sot autre raison
Fors li greveir et anuier,
Et por croitre le Dieu mestier
Par ceste tribulacion:
Ez vos toute s'entencion.
Sa compaingne qui dés s'enfance
Ot fait avec li penitance
Li osta, si que de nos deuz
Li engrignoit toz jors li deulz.
Por nos .II. mout sovent ploroit,
Por ce que cens nos .II. estoit.
Que vous feroie longue rime?
La gent felonesse et encrime
Mist entor li, la bone osta.
Si crueiz vielles a hoste a,
C'ele mesprent, eles l'ancusent;
A li greveir mout souvent musent.
Ne l'estuet pas panceir a truffes:
Batre la font et doneir buffes
Quant maistre Corraz a li vient.
Puis que des buffes li sovient
Que Diex resut, si les resoit:
Ainsinc la char vaint et desoit.
Toz jors a bien faire s'amort
De s'enfance jusqu'a la mort.
Por haïne ne por envie,
Tant com au siecle fu en vie,
Ne por mal c'om li feïst traire,
Ne laissa onques bien a faire."
Ainsi dit Ysentruz et Gronde,
Les .II. meilleurs dames dou monde;
Lor parole si bien s'acorde,
Se c'une dit l'autre recorde.
Esperance d'avoir pardon
Ou par penitance ou par don
Fait endureir mainte mesaise.
Li endureiz fait moult grant aise,
Car moult legierement endure
Qui eschive poinne plus dure.
Ceste dame, qui pou dura,
Penitance dure endura
Por avoir vie pardurable
Avec le Pere esperitable.

Ici dit la quarte partie,
Lai ou la fins est de sa vie,
Qu'ele avoit une damoizele
Qui avoit auteil non com ele.
Anbedeuz Ysabiaus ont non.
Preude fame et de grant renon
Fu mout ceste, ce dit l'estoire.
Por ce c'om le peüst mieux croire,
Jura qu'ele diroit le voir
De quanqu'ele porroit savoir
De toute la vie sa dame.
Ainsi le jura deseur s'arme.
"Seigneur, dit ele, bien sachiez:
Cenz mauvais vices, sanz pechiez
Est moult ma dame, et de vertuz
Est li sienz cors toz revestuz.
Oÿ aveiz en queil meniere
Au povres fasoit bele chiere.
Au povres fist plus biau servise
Puis qu'ele fut en l'Ordre mise
Que onques n'avoit fait devant.
Aucunes fois et moult souvent
Lor donoit, ce dit Ysabiaux,
Le més qui plus lor estoit biaux."
Et dit ancor que une dame,
Gertruz, qui estoit gentiz fame,

Vint veoir ceste dame sainte
Dont hom disoit parole mainte.
Bertoulz, un enfes, vint o soi.
De Dieu servir avoit grant soi,
Si li pria moult doucement
Qu'a Dieu priast devotement
Que Dieux l'empreïst de sa flame
Si que sauveir en peüst s'arme.
Sainte Ysabiaux Dieu reclama,
Que de cuer finement ama,
Qu'a l'enfant otroiast sa grace.
Ne demora gaires d'espace,
Quant il et la dame prioit,
Que li enfes haut s'escrioit:
"Dame, laissiez votre raison,
Car Dieux m'a mis hors de prison
Et m'a de s'amour eschauffei
Et mis hors des mains au Maufei!"
A chacun ainsinc avenoit
Qui por teil quas a li venoit.
Ce li avint que je recort
Un an tout droit devant sa mort.
Or avint, si com d'aventure,
C'une trop bele creature

Vint a li, s'ot non Heluÿs.
Li corages li fut fuÿz
De Dieu ameir parfaitement,
Ainz ot mis son entendement
A ces beles treces pignier.
N'i vint pas por li encignier
Conment hom devoit Dieu servir
Por saint Paradix deservir:
Une soie suer vint veoir,
Conforteir et leiz li seoir,
Qui chiez cele dame gisoit.
Or n'est nuns hom, c'il devisoit
Conment ele avoit biaux chevoux,
Qui ne fust a deviseir foux;
Car qui daleiz li s'acoutast,

Il deïst qu'ors en degoutast,
Tant estoient et crespe et blonde:
Tant de si biaux n'avoit ou monde.
Ces chevoux si blondes et biaus
Fist copeir sainte Elisabiaux;
Et cele pleure et brait et crie
Si que hautement fu oïe.
Les genz qui cest afaire virent
A ceste bone dame dirrent
Por qu'ele avoit le chief tondu.
La dame lor a respondu:
"Seigneur, fait ele a briez paroles,
N'ira ele pas au queroles.
Bien cuideroit estre honie
A tout sa teste desgarnie."
Lors conmanda c'om li apele
A li venir ceste pucele.
Cele y vint. Adonc li demande
De ces cheveux raison li rande
Qu'il li ont au siecle valu,
Puis que l'arme en pert son salu.
"Dame, ja en orroiz la voire:
Ou nonnain blanche ou nonnain noire
Eüst estei, ce mi chevou
N'eüssent fait mon cuer si fou.
- Dont ainz je mieulz tondue soies,
Tout por toi metre en bones voies,
Que li miens filz fust empereres,
Si m'aïst mes sires sainz Peires."
Ainsi la prist et la desut,
En l'Ordre avec li la resut.
En ce meïsme jour avint,
Que Heluÿs en l'Ordre vint,
Cinquante mars dona d'argent
Et departi a povre gent.
Mais ne pot pas cele pecune
Departir de jor sens la lune.
Li povre c'en vont, li plus fort.
Cil qui plus orent de confort
Mestier demorerent o soi;
Mais cil n'orent ne faim ne soi,
Ansois furent a grant delit
Bien peü, et s'orent boen lit,
Bien aaisié trestout a point,
Lor piez laveiz et furent oint,
Que creveiz orent de mesaise.
Je vos di que tant orent aise
Qu'il oblierent la destresse
Et chanta chacuns de leesse,
Car povres qui a bien senz faille
Met tot le mal a la viez taille.
Alee estoit esbatre .I. jour
Si com ele estoit a sejour.
Loing de son hospitaul trouva
Une fame qui travilla.
La bone dame fist la couche,
Dedens une grange l'acouche.
L'enfant resut et en fu baille,
La premiere fu qui le baille.
Leveir le fist et baptizier:
Son non, qui tant fist a prizier,
Mist a l'enfant, s'en fu mairrainne.
Teil marrainne n'a mais el rainne!
Chacun jor le mois tout entier
Sot bien laianz le droit sentier:
Bien la porvit en sa gesine
De pain, de vin et de cuzine.
Quant li termines fu passeiz
Lai ou ele ot eü asseiz
Quanque droiz a teil fame fu,
Le pain, le vin, la char, le fu
Et le baing, quant il fu a point,
Que de mesaise n'i ot point,
Et dou moustier fut revenue,
Et la dame c'est devestue
De son mantel grant aleüre
Et de sa propre chauseüre,
Avec tout .XII. colonnois
Dont li uns vaut .IIII. tornois,
Tot li done, lors s'en parti
Quant tot ce li ot departi.
Et cele et ces maris encemble
C'en foïrent, si com moi cemble.
L'enfant laisserent en l'ostei,
Tot l'autre avoir en ont ostei.
Devant c'om conmensast matines,
Ces .II. qu'a Deu sont enterines
Ysabiaus oïr le servise
Et sa dame sont a l'eglize

Venues. Quant la dame i vint,
De sa fillole li souvint:
Ysabel savoir i envoie.
Cele vint la. Que vos diroie?
Ne trouva que l'enfant dormant.
Eiz vos celi en grant tormant!
A la dame en est revenue
Et li dist la descouvenue.
"Va donc, fait ele, l'enfant querre,
Puis qu'alei sunt fors de la terre!"
Por norrir l'envoia la dame
Tout maintenant enchiez la fame
D'un chevalier, qui sa voizine
Estoit et de mout franche orine.
Lors envoia querre le juge
Qui les droiz de la citei juge,
Si coumanda c'om les querist
Lai ou li querres s'aferist.
Demandei furent et rouvei
Et quis, ainz ne furent trovei.
Dit Ysabiaux: "Ma dame chiere,
Hom ne puet en nule meniere
Troveir. Priez a Dieu le Peire
Que il rende a l'enfant sa meire."
Cele dit qu'ele n'ozeroit,
Maitre Corraz le saveroit,
Mais fasse en Diex sa volentei.
Ainz n'i ot plus dit ne chantei.
Ne demora mie granment,
Se li escriture ne ment,
Li mariz et la fame vindrent:
A genoillons leiz li se tindrent
Et regehirent lor pechiez
Dont Mauffeiz les ot entechiez.
Devant li distrent par couvant
Qu'aleir ne pooient avant;
Remede quistrent dou meffait
Que cens raison avoient fait.
Lors distrent les genz dou chastel
Que des solers et dou mantel
N'aura point, ainz iert departi,
Por ce que vilment s'en parti.
La dame lor dit: "Bien me plest,
Faites en tout quanque droiz est."
A une pucele donerent
Le mantel qu'a celi osterent:
Cele voa religion
Tantost de bone entencion.
Une vesve rot en ces piez
Les solers qu'ele avoit chauciez,
Et cele reprist son enfant
Qu'ele ot laissié mauvaisement.
La vile laisse, si s'en ist:
Tant grate chievre que mau gist.
Ermenjars, qui religieuze
Estoit forment et curieuze
De Dieu servir parfaitement,
Refist ainsi son sairement.
Ainz fu de gris abit vestue
Que la dame ce fust rendue,
Et bien dit qu'ele acoustuma
La dame qui teil coutume a,
A menistreir au povres seule.
Jusque lors ne manjoit lor gueule
Qu'ele meïmes les paissoit,
Qui pou ou niant les laissoit.
Tant estoit la dame humble et simple,
Anniaux d'or et joiaux et guimple

Vendoit et en prenoit l'argent
Por doneir a la povre gent.
Ci n'avoit mie grant orgueil,
C'un enfant qui n'avoit c'un ueil
Et s'iert tigneuz, si com moi membre,
Porta la nuit seix foix en chambre.
Si grant pitié de lui avoit,
Ces drapiax ordoiez lavoit
Et l'areignoit si doucement
Com s'eüst grant entendement.
Puis qu'ele fu en l'Ordre entree,
Teil coutume a acoustumee:
Les malades baignoit ces cors
Et les traisoit de lor liz fors,
Les baigniez reportoit ariere
Et les couchoit a bele chiere.
Et fist copeir une cortine
Qui la maison toute encortine
Por les baigniez envelopeir:
Por ce sanz plus la fist copeir.
Une mezele si poacre
Qu'il n'avoit si de ci en Acre
Couchoit la dame et la levoit,
Que nule riens ne li grevoit.
Les piez et les mains li lavoit
Et les plaies qu'ele i savoit,
Qu'ele gizoit en l'opital:
Onques li cuers ne l'en fist mal.
Ces compeignes ne la pooient
Regardeir, ansois s'en fuioient.
Moult aleja sa maladie:
Au chief de la habergerie
La coucha por mieux aaisier
Et por ces plaies apaisier.
Mout doucement a li aloit,
A li mout doucement parloit.
Ses peires noveles oÿ
Teles que pas ne c'esjoï,
Que hom li dist sa fille estoit
Si povre que ele vestoit
Roube de lainne sanz couleur.
S'en ot li preudons grant douleur
Dont l'estoire ci endroit conte.
Li rois i envoia .I. conte:
Preudome ert et bon crestïen,
Si ot non li cuens Pavien;
Et li dit: "Quant vos revanrroiz,
Ma fille avec vos amanrroiz."
Li quens se parti de Hongrie
A moult tres bele compaignie,
De chevauchier bien s'entremist;
Se ne sai ge combien il mist
Au venir juqu'a Mapur droit.
Si la trouva en teil endroit
Qu'il ne la cuida pas troveir,
Et lors pot il bien esproveir.
Les paroles de la poverte
C'on avoit au roi descoverte,
Car il la trova el chatel
Affumblee d'un viez mantel
Don la panne le drap passoit;

Li porters toute la lassoit.
Si la trouva lainne fillant,
Et si ne filloit pas si lant
Com les autres, mais a granz traiz.
Quant il la vit si povrement,
Si s'em merveilla durement
Et dit: "Je voi ci grant desroi!
Ainz mais ne vi fille de roi
Lainne fileir n'avoir teil robe.
Ceste ne fait pas trop le gobe:
La ou sa manche se depiece,
D'autre drap i met une piece."

Volentiers l'en eüst menee
Et l'eüst moult mieulz asenee
De sa vië et chiez son peire,
Car vie menoit trop ameire.

Il c'en ala, n'en mena point,
Et cele remaist en teil point.
En yver par la grant froidure
Se gisoit seur la chaume dure:
Deuz coutes metoit desus soi.
C'ele avoit asseiz fain et soi,
Si se pence qu'il ne l'en chaut,
Puis qu'ele avoit au costeiz chaut.
Ses baasses, ces damoizeles,
Ne pooit pas soffrir que eles
L'apelassent "dame" a nul fuer,
Fors que tant "Ysabel" ou "suer".
A la table deleiz sa coste
Les fait seoir, d'autre les oste
S'a autre welent aseoir,
Ainz les wet deleiz li veoir.
Mangier les fait en s'escuele:
S'or fut dame, or est damoizele.
Dit Armenjars, qui moult fu sage:
"Vos quereiz le nostre damage
De ce que nos orgueillissons
Quant leiz vos a la table sons,
Et aquireiz en cestui leu

Vostre merite et vostre preu."
La dame respondi adonques:
"En mon giron ne seeiz onques,
Mais or vos i couvient seoir,
Si vos porrai de prés veoir."
Poz et escueles lavoit
Lai ou ordoiez les savoit,
Con se de l'osteil fust baiasse:
Ensi s'use et einsi se lasse.
Auz povres sa robe donoit
Si que petit l'en remenoit.
Por chaufeir et por le pot cuire,
Por eschueir la grant froidure,
Aloit seoir en la cuzine,
Et ne pence ne ne devine
Fors a regardeir vers le ciel.
Pou doutoit lors froidure et giel.
Maitre Corraz forment cremoit
Por l'amor Dieu que tant amoit,
Et disoit une teil raison:
"Doit estre si uns morteiz hom
Douteiz? Nenil, mais Diex li Peires,
Les cui amors ne sont ameires."
En une abie fut entree
Ou maitre Corraz l'ot mandee
Por prendre la conseil le plus
Ce il la mettroit en reclus.
Et lors prierent les nonnains
Maitre Corrat a jointes mains
Que laianz entreir la feïst,
Si que chacune la veïst.
"Je wel bien, dit il, qu'ele i aille."
Nequedent il cudoit sanz faille
Qu'el n'i entrast por nule choze.
Atant si l'ont laianz encloze:
Chacune d'eles l'a veüe.
Et quant de laians fu issue,
Maitre Corraz li vint devant
Qui li ala ramentovant:
"Vostre voie est mal emploiee:

Vos estes esconmeniee."
Ne li pot mieulz la jangle abatre.
A un frere les a fait batre
Qui avoit non frere Gautier.
Maitre Corraz dit ou sautier
La Miserele toute entiere,
Et cil batoit endementiere.
Ermenjars n'i ot riens meffait,
Cui maitre Corraz batre fait.
Mais li maitres ice retient:
Bien escorche qui le pié tient.
Lors dit la dame: "Ermenjart, suer,
N'aions pas les coz contre cuer.
L'erbe qui croit en la riviere
Se plaissse, puis revient ariere;
Joiousement se lieve et plaisse.
Ausi te di, qui le col baisse
Por resovoir la decepline
De componcion enterine,
Que Diex le meffait li pardone
Puis que il au coz s'abandone."
Ne li chaloit c'ele trembloit:
De ce saint Martin resembloit
Qui vers le ciel regarda tant
Diex qui les siens toz jors atant.
Aucune fois sa robe ardoit,
Que que vers le ciel regardoit:
Les baasses covenoit corre
Por sa robe dou feu rescorre.
La ou li draz estoit useiz,
Ja autres n'i fust refuzeiz:
Ne li chaloit fust viez ou nuez,

Volentiers le metoit en oeuz.
Les povres aloit reverchant
Et lor afaires encerchant,
Si lor portoit pain et farine
Ceste dame de bone orine.
Puis revenoit a l'orison:
Lors deïssiez qu'est en prison.
Reliques de sainz et de saintes
A nuz genoulz et a mains jointes
Aoroit volentiers sanz doute:
Bien aloit aprés Dieu lor route.
Une fois aloit un hermite

Visiteir, mais voie petite
Ot alei quant li maitres mande
Qu'ele retort, que plus n'atende.
La dame respont au message:
"Amis, bien pert que nos sons sage:
S'or ne resamblons la limace,
Ja aurons perdu notre grace.
La limace gete son cors
De l'escalope toute fors
Par le biau tenz, mais par la pluie
Rentre enz quant ele li anuie.
Ausi covient il or nos faire:
Repairons a notre repaire."
Un enfant ot petit et tendre,
De ces enfans trestot le mendre,
Qu'ensus de li fist esloignier,
Qu'ele dotoit a porloignier
Ces prieres por cel enfant:
Por ce li venir li deffent.
La dame avoit une coutume
Qu'autre gent gaires n'acoutume
(Ne cuit que nuns jamais teile oie),
Que lors qu'ele avoit plus grant joie
Ploroit ele plus tanrrement,
Et veïssiez apertement
Qu'il ne paroit dedens son vis
Corroz ne fronce, c'ert avis,
Ansois cheoit la larme plainne
Com li ruisseaux de la fontaine.
Les larmes viennent, c'est la fin,
Dou cuer loiaul et pur et fin.
Une foiz entra en un cloistre
De povre gent qui pas acroitre
Ne se pooient de lor biens:
Fors d'aumoennes n'avoient riens.
Ymages li moustrent bien faites,
Bien entaillies et portraites;
Mout orent costei, ce li semble,
Ansois qu'eles fussent encemble.
Moult l'en pesa et bien lor monstre,
Et bien lor en va a l'encontre
Et dist: "Je croi, mieulz vos en fust
Ce ce c'on a mis en cet fust
Por faire entaillier ces ymages
Fust mis en preu, qu'or est damages.
Qui a l'amour de Dieu el cuer,
Les ymages qu'il voit defuer
Si ne li font ne froit ne chaut.
Endroit de moi il ne m'en chaut,
Et bien sachiez, ce me conforte
Que chacuns crestiens les porte,
Les ymages, el cuer dedens.
Les levres muevre ne les dens
Ne font pas la religion,
Mais la bone compunction."
Ne pooit oïr les paroles
Qui viennent de pencees voles,
Ainz disoit de cuer gracieuz:
"Ou est ore Dieux li glorieux?",
C'est a dire qui a savoir
Que de Dieu doit paor avoir,
Qu'il ne mespreigne en son servise.
Or aveiz oï en quel guise

Vesqui. Ancor i a asseiz,
Mais je sui d'escrire lasseiz.
Ysabiaus, dont je di devant,
Fut avec li a son vivant,
Qui tout ainsi le tesmoigna.
Mais a ce plus de tesmoing a,
Qu'autres i furent, ce me cemble,
Qui bien s'acorderent encemble.
Moult est fox qu'en son cors se fie,
Car la mors, qui le cors deffie,
Ne dort mie quant li cors veille,
Ainz li est toz jors a l'oreille.
N'est fors que prez li grans avoirs;
Tost va et biauteiz et savoirs.
Por ce est fox qui c'en orgueille,
Car il les pert, weille ou ne weille.
Folie et orgueil sunt parent,
Sovent i est bien aparent.
Tout va, ce trovons en escrit,
Fors que l'amour de Jhesucrit.
Li foulz, li mauvais, li cuvers,
Qui adés a les ieux ouvers
A regardeir la mauvaise huevre,
Qui nule fois sa bouche n'uevre
Por bien parleir ne por bien dire,
Doit bien avoir le cuer plain d'ire
Quant dou siecle se doit partir.
De duel li doit li cuers partir
Quant il voit bien sanz sejorneir
Que il n'en puet plus retorneir.
Perdre li estuer cors et arme,
Et perdre en pardurable flame.
Mais li boens qui a Dieu servi
Et qui a le cors aservi
Au siecle por l'arme franchir,
Cil ne peut cheoir ne guanchir
Que s'arme n'ait inelepas
Paradix aprés le trespas.
Liement le passage passe
Qui toz maux en passant trespasse.
En la mort a felon passage,
Passeir i estuet fol et sage.
Qui teil pas cuide trespasseir
En foul cuidier se doit lasseir:
Tout li estuet laissier, tot laisse.
La mors ne fait plus longue laisse
A ceste dame ci endroit.
Por ce vos wel dire orendroit
De sa Vie ce que j'en truis.
Ne dites pas que je contruis,
Ainz sachiez bien en veritei,
C'est droiz escriz d'autoritei.
Ysabiaux dit: "Seigneur, g'estoie
Leiz ma dame ou je me seoie
Quant ele ert au point de la mort.
Et lors oï, non gaires fort,
Une douce vois et serie:
De son cors me vint cele oïe.
Tornee ert devers la paroi,
Et lors se torna devers moi;
Si li dis lors tout erranment:
"Chantei aveiz trop doucement,
Madamë. - As le tu oï?
- Oïl, il m'a tout resjoï"
Lors dit: "Uns oizelés chantoit
Leiz moi, si qu'il m'atalentoit
De chanteir, si que je chantai.
Grant confort de son dolz chant ai."
Et quant nos vit deleiz son lit,
Si vos di, mout li abelit
Et dit: "Dites, que ferïez
Se ci l'Anemi veïez?"
Mout petit demorei i a
Qu'a haute vois fort s'escria:
"Fui de ci, fui! Fui de ci, fui!"
Se oï je et a ce fui.
Puis dist aprés: "Or s'en va cil.
Parlons de Dieu et de son Fil:
Li parlers pas ne vos anuit,
Car il est prés de mienuit
Et a teile hore fu il neiz,
Li purs, li fins, li afineiz."
Au parleir de Dieu deïssiez,
Se vos el vis la veïssiez,
Qu'ele n'avoit mal ne dolour,
Qu'ele n'en perdi point colour.
Dire li oï de sa bouche
Ermenjart que li jors aprouche
Que Diex apelera les siens,
Dont fu lie seur toute riens.
En cele houre qu'ele fina,
Cele qui si douce fin a
Fu tout ausi com endormie,
Qu'au trespasseir n'est point fenie.
Quatre jors fu li cors sor terre
C'om ne le muet ne ne l'enterre:
Une odour si douce en issoit
Qui de grant dousor ramplissoit
Touz ceulz qui entor li venoient,
Qui envis la biere laissoient.
Au cors covrir n'ot pas riote:
Covers fu d'une grize cote;
Li vis, d'un drap, c'om ne la voie:
N'i ot autre or ne autre soie.
Asseiz i vint grant aleüre
De gent copeir sa vesteüre;
Des cheveux et dou mameron
Li copa hon lou soumeron;
Doiz de piez et ongles de mains
Li copa hon; ce fu dou mainz:
Toute l'eüssent derompue
Qui ne lor eüst deffendue.
Povre gent et malade et sain

Vindrent laianz trestout a plain.
Chacuns la pleure et la gaimente
Com c'ele lor fust mere ou tente.
Anuiz cembleroit a retraire,
Qui vos conteroit tot l'afaire.
Par tout est bien choze seüe,
Ce seit la gent grant et menue,
Et par les tesmoins par couvent,
Que Diex la reveilloit souvent
De ces secreiz, et nés li ange
N'estoient pas de li estrange.
Lui meïmes vit face a face
Et mout d'anges .I. grant espace.
Et lors que ele estoit ravie,
C'om deïst qu'ele ert endormie,
Avoit mout trés clere la chiere:
C'estoit avis qu'en boins leux iere.
De ce se tut, bien le cela,
Fors a gent ne le revela
D'Ordre, sage et religieuze,
Qui n'estoit fole n'envieuze,
Car mout doutoit en son memoire
Qu'el ne cheïst en vainne gloire;
Car el ne l'avoit pas apris,
Ansois avoit le boen mors pris
D'estre piteuze dés s'anfance
A faire grief penitance.
Asseiz vos puis ci raconteir
Choze qu'a anui puet monteir,
Car je n'ai pas dit la moitié
De l'amor et de l'amistié
Que Dieu montroit et jor et nuit,
Car je dout qu'il ne vos anuit.
Et nequedent, c'il vos grevoit
Et c'il anuier vos devoit,

Vos di lai ou ele habita
.XVI. mors i resuscita.
Un aveugle raluma la
Qui devotement i ala,
Qui onques eul n'ot en la teste
Ne cemblant ou il deüst estre,
Dont chacuns qui voit s'en merveille.
Mais Diex fait bien si grant merveille.
Puis qu'ele fu misse en la chasse
De plon, vos di une granz masse
D'oile decouru goute a goute
Qui petit a petit degoute.
Et c'est bien a savoir certain,
C'om le puet bien veoir a plain.
Goutes de rouzee resemble
Quant l'une goute a l'autre assemble,
Si com dou cors saint Nicholaz,
Qu'ainz nuns d'auz deulz n'ot le col las
De faire euvre de charitei:
Ce seit chacuns de veritei.
Ceste dame saintime et sainte,
Qu'ainz de Deu servir ne fu fainte,
Apertement et main a main
Trespassa tout droit l'andemain
Des octaves la saint Martin,
En yver, si com je retin.
En l'opytal, en sa chapele

Fu enterree coume cele
Qui de saint Nicholaiz la fist,

Vers qui onques riens ne mefist.
Par la volentei Jhesucrit,
Si com nos trovons en escrit,

Vindrent abei et autre gent
Qu'a l'enterreir furent sergent
Et li firent trés biau servise,
Teil com hon doit faire en eglize.
Teiz dame fu de touz endroiz,
Qu'ele faisoit les contraiz droit,
Les xours oïr, foux ravoier.
Onques ne la sot deproier
Qui de son mal n'eüst santei:
Ne vos avroie hui tout contei.
Asseiz fist de miracles biaus
Ceste dame sainte Ysabiaus.
Bien la doivent enfant ameir,
Qu'en li ne troverent ameir;
Ne lor fu dure ne ameire,
Ansois lor fu sanz ameir meire,
Car de la mort esperiteil
En gari maint; et tout iteil
Fist ele de temporeil mort,
Qu'ele resuscita le mort.
Ameir la doivent povre et riche,
C'onques au povre ne fu chiche,
Ainz lor donoit sanz retenir
Quanqu'a ces mains pooit tenir.
Ainsi fist la bien eüree
(Bien dut s'arme estre asseüree)
Dont Rutebuez a fait la rime.
Se Rutebuez rudement rime
Et se rudesse en sa rime a,
Preneiz garde qui la rima.
Rutebuez, qui rudement euvre,
Qui rudement fait la rude euvre,
Qu'asseiz en sa rudesse ment,
Rima la rime rudement.
Car por nule riens ne creroie
Que bués ne feïst rude roie,
Tant i meïst hon grant estude.
Se Rutebuez fait rime rude,
Je n'i part plus, mais Rutebués
Est ausi rudes coume bués.
Mais une riens me reconforte:
Que cil por cui la fis l'aporte
A la roÿnë Ysabel
De Navarre, cui mout ert bel
Que hon li lize et qu'ele l'oie,
Et moult en avra el grant joie.
Messire Erars la me fist faire,
De Lezignes, et toute traire
De latin en rime fransoise,
Car l'estoire est bele et cortoize.
L'estoire de la dame a fin,
Qu'a Dieu ot cuer loiaul et fin.
De fin cuer, loiaul finement:
Ce l'estoire en la fin ne ment,
Bien dut sa vie defineir,
Car bien vot son tenz afineir
En servir de pencee fine
Celui Seigneur qui sanz fin fine.
Or prions donques a celi
A cui tant bien faire abeli,
Que pour nos deprist a celui
Dieu qui ne refuse nelui,
Et par sa priere en proit cele
Qui fu et sa meire et s'ancele,
Que il nos otroit cele joie
Que il a ceste dame otroie.
Explicit. Diex en soit loeiz!
Dites Amen vos qui l'oeiz.
 

Ci encoumance de la dame qui ala .III. fois entor le moutier 

Qui fame vorroit desovoir,
Je li fais bien apersovoir
Qu'avant decevroit l'anemis,
Le dyable, a champ arami.
Cil qui fame wet justicier
Chacun jor la puet combrizier,
Et l'andemain rest toute sainne
Por resouvoir autreteil painne.
Mais quant fame a fol debonaire
Et ele a riens de li afaire,
Ele li dist tant de bellues,
De truffes et de fanfellues,
Qu'ele li fait a force entendre
Que li cielz sera demain cendre.
Ainsi gaaigne la querele.
Jel dit por une damoizele
Qui ert fame a .I. escuier,
Ne sai chartain ou berruier.
La damoizele, c'est la voire,
Estoit amie a .I. provoire.
Mult l'amoit cil et ele lui,
Et si ne laissast por nelui
Qu'ele ne feïst son voloir,
Cui qu'en deüst li cuers doloir.
Un jor, au partir de l'eglize,
Out li prestres fait son servize.
Ces vestimenz lait a pliier
Et si va la dame proier
Que le soir en .I. boscher veigne:
Parler li wet d'une bezoigne
Dont je cuit que pou conquerroie
Se la bezoigne vos nomoie.
La dame respondi au prestre:
"Sire, veiz me ci toute preste,
Car il est et poinz et saisons:
Ausi n'est pas cil en maison."
Or avoit en ceste aventure
Cens plus itant de mespresure
Que les maisons n'estoient pas
L'une leiz l'autre a quatre pas:
Bien i avoit, dont moult lor poize,
Le tiers d'une leue fransoize.
Chacune ert en un espinois,
Com ces maizons de Gastinois.
Mais li boschés que je vos nome
Estoit a ce vaillant preudome
Qui saint Arnoul doit la chandoile.
Le soir, qu'il ot ja mainte estoile
Parant el ciel, si com moi cemble,
Li prestres de sa maison s'amble
Et s'en vint au boschet seoir,
Que nuns ne le puisse veoir.
Mais a la dame mesavint,
Que sire Arnoulz ses mariz vint,
Touz moilliez et touz engeleiz,
Ne sai dont ou il ert aleiz.
Por ce remanoir la couvint.
De son provoire li souvint,
Si se haste d'apareillier:
Ne le vout pas faire veillier.
Por ce n'i ot .III. més ne quatre.
Aprés mangier, petit esbatre
Le laissa, bien le vos puis dire.
Souvent li a dit: "Biau dolz sire,
Alez gezir, si fereiz bien:

Veilliers grieve sor toute rien
A home quant il est lasseiz.

Vos aveiz chevauchié asseiz."
L'aleir gezir tant li reprouche,
Par pou le morcel en la bouche
Ne fait celui aleir gesir,
Tant a d'eschapeir grant desir.
Li boens escuiers i ala
Qui sa damoizele apela,
Por ce que mult la prize et aime.
"Sire, fait ele, il me faut traime
A une toile que je fais,
Et si m'en faut ancor granz fais,
Dont je ne me soi garde prendre,
Et je n'en truis nes point a vendre,
Par Dieu, si ne sai que j'en faisse.
- Au deable soit teiz fillace,
Dit li escuiers, con la vostre!
Foi que je doi saint Poul l'apostre,
Je vorroie qu'el fust en Seinne!"
Atant se couche, si se seigne,
Et cele se part de la chambre.
Petit sejornerent si membre
Tant qu'el vint la ou cil l'atant.
Li uns les bras a l'autre tent:

Illuec furent a grant deduit
Tant qu'il fut prés de mienuit.
Du premier somme cil s'esvoille,
mais mout li vint a grant mervoille
Quant il ne sent leiz li sa fame.
"Chamberiere, ou est ta dame?
- Ele est la fors en cele vile,
Chiez sa coumeire, ou ele file."
Quant il oï que la fors iere,

Voirs est qu'il fist moult laide chiere.
Son seurquot vest, si se leva,
Sa damoizele querre va.

Chiez sa commeire la demande:
Ne trueve qui raison l'en rende,
Qu'ele n'i avoit esté mie.
Eiz vos celui en frenesie.
Par deleiz ceux qu'el boschet furent
Ala et vint. Cil ne se murent.
Et quant il fu outre passeiz:
"Sire, fait ele, or est asseiz,
Or covient il que je m'en aille.
- Vos orroiz ja noize et bataille,
Fait li prestres. Ice me tue
Que vos sereiz ja trop batue.
- Onques de moi ne vos soveingne,
Dan prestres, de vos vos couveingne",
Dit la damoizele en riant.
Que vos iroie controuvant?
Chacuns s'en vint a son repaire.
Cil qui se jut ne se pout taire:
"Dame, orde vilz putainz provee,

Vos soiez or la mal trovee,
Dist li escuiers. Dont veneiz?
Bien pert que por fol me teneiz."
Cele se tut et cil s'esfroie:
"Voiz, por le sanc et por le foie,
Por la froissure et por la teste,
Ele vient d'enchiez notre prestre!"
Ensi dit voir, et si nel sot.
Cele se tut, si ne dit mot.
Quant cil oit qu'el ne ce deffent,
Par .I. petit d'ireur ne fent,
Qu'il cuide bien en aventure
Avoir dit la veritei pure.
Mautalenz l'argüe et atize.
Sa fame a par les treces prize,
Por le trenchier son coutel trait.
"Sire, fait el, por Dieu atrait,
Or covient il que je vos die:"
- (Or orreiz ja trop grant voidie!) -
"J'amasse miex estre en la fosse.

Voirs est que je suis de vos grosse,
Si m'enseigna on a aleir
Entor le moutier sanz parleir
Trois tours, dire .III. pater notres
En l'onor Dieu et ces apostres;
Une fosse au talon feïsse
Et par trois jors i revenisse.
S'au tiers jor overt le trovoie,
S'estoit .I. filz qu'avoir dovoie,
Et c'il estoit cloz, c'estoit fille.
Or ne revaut tot une bille,
Dit la dame, quanque j'ai fait,
Mais, par saint Jaque, il iert refait,
Se vos tueir m'en deviiez."
Atant c'est cil desavoiez
De la voie ou avoiez iere,
Si parla en autre meniere:
"Dame, dist-il, je que savoie
Du voiage ne de la voie?
Se je seüsse ceste choze
Dont je a tort vos blame et choze,
Je sui cil qui mot n'en deïsse,
Se je annuit de cet soir isse."
Atant se turent, si font pais
Que cil n'en doit parleir jamais.
De choze que sa fame face,
N'en orrat noize ne menace.
Rutebués dist en cest flabel:
Quant fame at fol, s'a son avel.
Explicit.
 

Ci coumence li diz de l'erberie 

Seigneur qui ci este venu,
Petit et grant, jone et chenu,

Il vos est trop bien avenu,
Sachiez de voir.
Je ne vos wel pas desovoir:
Bien le porreiz aparsouvoir
Ainz que m'en voize.
Aseeiz vos, ne faites noise,
Si escouteiz, c'il ne noz poize:
Je sui uns mires,
Si ai estei en mainz empires.
Dou Caire m'a tenu li sires
Plus d'un estei;
Lonc tanz ai avec li estei,
Grant avoir i ai conquestei.
Meir ai passee,
Si m'en reving par la Moree,
Ou j'ai fait mout grant demoree,
Et par Salerne,
Par Burienne et par Byterne.
En Puille, en Calabre, en Palerne
Ai herbes prises
Qui de granz vertuz sunt emprises:
Sus quel que mal qu'el soient mises,
Li maux c'en fuit.
Jusqu'a la riviere qui bruit
Dou flun des pierres jor et nuit
Fui pierres querre.
Prestres Jehans i a fait guerre;
Je n'ozai entreir en la terre:
Je fui au port.
Mout riches pierres en aport
Qui font resusciteir le mort:
Ce sunt ferrites,
Et dyamans et cresperites,
Rubiz, jagonces, marguarites,
Grenaz, stopaces,
Et tellagons et galofaces
(De mort ne doutera menaces
Cil qui les porte.
Foux est ce il ce desconforte:
N'a garde que lievres l'en porte
C'il ce tient bien;
Si n'a garde d'aba de chien
Ne de reching d'azne anciien
C'il n'est coars;

Il n'a garde de toutes pars),
Carbonculus et garcelars,
Qui sunt tuit ynde,
Herbes aport des dezers d'Ynde
Et de la Terre Lincorinde,
Qui siet seur l'onde
Elz quatre parties dou monde
Si com il tient à la raonde,
Or m'en creeiz.

Vos ne saveiz cui vos veeiz;
Taiziez vos et si vos seeiz:

Veiz m'erberie.
Je vos di par sainte Marie
Que ce n'est mie freperie
Mais granz noblesce.
J'ai l'erbe qui les veiz redresce
Et cele qui les cons estresce
A pou de painne.
De toute fievre sanz quartainne
Gariz en mainz d'une semainne,
Ce n'est pas faute;
Et si gariz de goute flautre,
Ja tant n'en iert basse ne haute,
Toute l'abar.
Ce la vainne dou cul vos bat,
Je vos en garrai sanz debat,
Et de la dent
Gariz je trop apertement
Par .I. petitet d'oignement
Que vos dirai:
Oeiz coument jou confirai;
Dou confire ne mentirai,
C'est cens riote.
Preneiz dou saÿn de marmote,
De la merde de la linote
Au mardi main,
Et de la fuelle dou plantain,
Et de l'estront de la putain
Qui soit bien ville,
Et de la pourre de l'estrille,

Et dou ruÿl de la faucille,
Et de la lainne
Et de l'escorce de l'avainne
Pilei premier jor de semainne,
Si en fereiz
Un amplastre. Dou jus laveiz
La dent; l'amplastre metereiz
Desus la joe;
Dormeiz un pou, je le vos loe:
S'au leveir n'i a merde ou boe,
Diex vos destruie!
Escouteiz, c'il ne vos anuie:
Ce n'est pas jornee de truie
Cui poeiz faire.
Et vos cui la pierre fait braire,
Je vos en garrai sanz contraire
Ce g'i met cure.
De foie eschauffei, de routure
Gariz je tout a desmesure
A quel que tort.
Et ce vos saveiz home xort,
Faites le venir a ma cort;
Ja iert touz sainz:
Onques mais nul jor n'oÿ mains,
Ce Diex me gari ces .II. mains,
Qu'il orra ja.
Or oeiz ce que m'encharja
Ma dame qui m'envoia sa.
Bele gent, je ne sui pas de ces povres prescheurs, ne de ces povres herbiers qui 
vont par devant ces mostiers a ces povres chapes maucozues, qui portent boites 
et sachez, et si estendent un tapiz: car teiz vent poivre et coumin qui n'a pas 
autant de sachez com il ont. Sachiez que de ceulz ne sui je pas, ainz suis a une 
dame qui a non ma dame Trote de Salerne, qui fait cuevrechié de ces oreilles, et 
li sorciz li pendent a chaainnes d'argent par desus les espaules. Et sachiez que 
c'est la plus sage dame qui soit enz quatre parties dou monde. Ma dame si nos 
envoie en diverses terres et en divers païs: en Puille, en Calabre, en 
Tosquanne, en terre de Labour, en Alemaingne, en Soissonie, en Gascoingne, en 
Espaigne, en Brie, en Champaingne, en Borgoigne, en la forest d'Ardanne, por 
ocirte les bestes sauvages et por traire les oignemenz, por doneir medecines a 
ceux qui ont les maladies es cors. Ma dame si me dist et me commande que en 
queil que leu que je venisse, que je deïsse aucune choze, si que cil qui fussent 
entour moi i preïssent boen essample. Et por ce que le me fist jureir seur sainz 
quant je me departi de li, je vos apanrai a garir dou mal des vers, se vos le 
voleiz oïr. Voleiz l'oïr?
Aucune genz i a qui me demandent dont les vers viennent. Je vos fais a savoir 
qu'il viennent de diverses viandes reschauffees et de ces vins enfuteiz et 
boteiz, si se congrient es cors par chaleur et par humeur: car si con dient li 
philosophe, toutes chozes en sunt criees. Et por ce si viennent li ver es cors, 
qui montent juqu'au cuer et font morir d'une maladie c'on apele mort sobitainne. 
Seigniez vos: Diex vos en gart touz et toutes!
Por la maladie des vers garir - a vos iex la veeiz, a vos piez la marchiez - la 
meilleur herbe qui soit elz quatre parties dou monde ce est l'ermoize. Ces fames 
c'en ceignent le soir de la saint Jehan et en font chapiaux seur lor chiez, et 
dient que goute ne avertinz ne les puet panre n'en chief, n'en braz, n'en pié, 
n'en main. Mais je me merveil quant les testes ne lor brisent et que li cors ne 
rompent par mi, tant a l'erbe de vertu en soi. En cele Champeigne ou je fui 
neiz, l'apele hon marreborc, qui vaut autant com "la meire des herbes". De cele 
herbe panrroiz troiz racines, .V. fuelles de sauge, .IX. fuelles de plantaing. 
Bateiz ces chozes en .I. mortier de cuyvre a un peteil de fer. Desguneiz vos dou 
jus par .III. matins. Gariz sereiz de la maladie des vers.
Osteiz vos chaperons, tendeiz les oreilles, regardeiz mes herbes, que ma dame 
envoie en cest païs. Et por ce qu'ele wet que li povres i puist ausi bien avenir 
coume li riches, ele me dist que j'en feïsse danrree: car teiz a .I. denier en 
sa bor/ce qui n'a pas .V. sols. Et me dist et me conmanda que je preïsse un 
denier de la monoie qui corroit el païs et en la contree ou je vanroie: a Paris 
un parisis, a Orliens un orlenois, au Mans un mansois, a Chartres un chartain; a 
Londres en Aingleterre un esterlin, por dou pain, por dou vin a moi, por dou 
fain, por de l'avainne a mon roncin: car ceil qui auteil sert d'auteil doit 
vivre.
Et je di que c'il estoit si povres, ou hom ou fame, qu'il n'eüst que doner, 
venist avant: je li presteroie l'une de mes mains por Dieu et l'autre por sa 
Meire, ne mais que d'ui en un an feïst chanteir une messe de Saint Esperit, je 
di noumeement por l'arme de ma dame qui cest mestier m'aprist, que je ne fasse 
ja trois pez que li quars ne soit por l'arme de son pere et de sa mere en 
remission de leur pechiez.
Ces herbes, vos ne les mangereiz pas: car il n'a si fort buef en cest païs ne si 
fort destrier que, c'il en avoit ausi groz com un pois sor la langue, qu'il ne 
morust de male mort, tant sont fors et ameires; et ce qui est ameir a la bouche, 
si est boen au cuer. Vos les me metreiz .III. jors dormir en boen vin blanc. Se 
vos n'aveiz blanc, si preneiz vermeil; se vos n'aveiz vermeil, preneiz de la 
bele yaue clere: car teiz a un puis devant son huix qui n'a pas .I. tonel de vin 
en son celier. Si vos en desgeunereiz par .XIII. matins. Ce vos failleiz a un, 
preneiz autre: car ce ne sont pas charaies. Et je vos di par la paission dont 
Diex maudist Corbitaz (f° 82 r° 1) le juif qui forja les .XXX. pieces d'argent 
en la tour d'Abilent, a .III. liues de Jherusalem, dont Diex fu venduz, que vos 
sereiz gariz de diverses maladies et de divers mahainz, de toutes fievres sanz 
quartainne, de toutes goutes sanz palazine, de l'enfleüre dou cors, de la vainne 
dou cul c'ele vos debat. Car ce mes peres et ma mere estoient ou peril de la 
mort et il me demandoient la meilleur herbe que lor peüsse doneir, je lor 
donroie ceste.
En teil meniere venz je mes herbes et mes oignemens. Qui vodra, si en preigne; 
qui ne vodra, si les laist!
 

Ci encoumence la desputisons de Charlot et dou Barbier de Meleun 


I
L'autrier .I. jor joeir m'aloie

Devers l'Ausuerrois saint Germain
Plus marin que je ne soloie,
Qui ne lief pas volentiers main.
Si vis Charlot enmi ma voie
Qui le Barbier tint par la main,
Et bien monstroient toute voie
Qu'il n'ierent pas couzin germain.

II

Il se disoient vilonie
Et se getoient gas de voir:
"Charlot, tu vas en compaignie
Por crestientei desouvoir.
C'est traÿsons et felonie,
Ce puet chacuns aparsouvoir.
La toie lois soit la honie!
Tu n'en as point, au dire voir."

III
- Barbier, foi que doi la banlive
Ou vos aveiz votre repaire,

Vous aveiz une goute vive:
Jamais n'iert jors qu'il ne vous paire.
Sains Ladres at rompu la trive,
Si vos at feru ou viaire.
Pour ce que ciz maux vous eschive,
Ne requireiz mais saintuaire."

IV
- Challot, foi que doi sainte Jame,

Vos aveiz oan fame prise:
Est ce celonc la loi esclame
Que Caÿphas vos at aprise?

Vos creez autant Notre Dame,
Ou virginitez n'est maumise,
Com je croi c'uns asnes ait arme.

Vous n'amez Dieu ne sainte Eglise."

V
- Barbier sens rasoir, cens cizailles,
Or ne seiz raoignier ne reire.
Tu n'as ne bacins ne toailles
Ne de quoi chauffeir yaue cleire.

Il n'est riens nee que tu vailles
Fors a dire parole ameire.
S'outre meir fuz, ancor i ailles,
Et fai proesce qu'il i peire."

VI
- Charlot, tu as toutes tes lois:
Tu iez et juis et crestïens,
Tu iez chevaliers et borjois,
Et, quant tu veus, clers arciens.
Tu iez maqueriax chacun mois.
Ce dient bien li ancien,
Tu faiz sovent en ton gabois
Joindre .II. cus a .I. lien."

VII
- Barbier, or est li tanz venuz
De mauparleir et de maudire,
Et vo seroiz ansois chenuz
Que vos laissiez ceste matire.
Mais vos morreiz povres et nuz,
Quar vous devenez de l'empire.
Se sui por maqueriaux tenus,
L'en vous retient a va-li-dire."

VIII
- Charlot, Charlot, biaux dox amis,
Tu te faiz aux enfans le roi.
Se tu i iez, qui t'i a mis?
Tu i iez autant comme a moi.
De sembler fol t'iez entremis,
Mais, par les iex dont je te voi,
Teiz t'a argent en paume mis
Qui est asseiz plus fox de toi."

IX
- Barbier, or vienent les grozeles:
Li grozelier sunt borjonei.
Et je vos raport les noveles
Qu'el front vos sunt li borjon nei.
Ne sai se se seront ceneles
Qui ce vis ont environnei.
El seront vermeilles et beles
Avant que on ait messonei."

X
- Ce n'est mie mezelerie,
Charlot, anseis est goute roze.
Foi que je doi sainte Marie,
Que vos n'ameiz de nule choze,

Vos creez miex en juierie,
Qui la verité dire en oze,
Qu'en Celui qui par seignorie
A la porte d'enfer descloze.

XI
Et nequedant, ce Rutebués,
Qui nos connoit passei .X. ans,

Voloit dire .II. motez nuez,
Meis qu'au dire fust voirs disans,
Ne contre toi ne a mon oez,
Mais par le voir ce fust mis ans,
Je le wel bien, ce tu le wes,
Que le milleur soit eslisans."

XII
- Seigneur, par la foi que vos doi,
Je ne sai le meillor eslire.
Le mains piour, si com je croi,

Vos eslirai je bien dou pire.
Charlot ne vaut ne ce ne quoi,
Qui la veritei en wet dire.

Il n'a ne creance ne foi
Nes c'uns chiens qui charoigne tire.

XIII
Li Barbiers connoit bone gent,
Et si les sert et les honeure
Et met en euz cors et argent,
Poinne de servir d'eure en heure.
Si seit son mestier bel et gent,
Se besoing li recorroit seure.
Et s'at en lui si bel sergent,
Que com plus vit et plus coleure."
Explicit
 

Ci encoumence de Charlot le juif qui chia en la pel dou lievre 

Qui menestreil wet engignier
Mout en porroit mieulz bargignier;
Car mout soventes fois avient
Que cil por engignié se tient
Qui menestreil engignier cuide,
Et s'en trueve sa bource vuide.
Ne voi nelui cui bien en chiee.
Por ce devroit estre estanchiee
La vilonie c'om lor fait
Garson et escuier sorfait
Et teil qui ne valent deus ciennes.
Por ce le di qu'a Aviceinnes
Avint, n'a pas un an entier,
A Guillaumes le penetier.
Cil Guillaumes dont je vos conte,
Qui est a mon seigneur le conte
De Poitiers, chassoit l'autre jour
Un lievres qu'il ert a sejour.
Li lievres, qui les chiens douta,
Molt durement se desrouta,
Asseiz foï et longuement,
Et cil le chassa durement;
Asseiz corrut, asseiz ala,
Asseiz guenchi et sa et la,
Mais en la fin vos di ge bien
Qu'a force le prirent li chien.
Pris fu sire Coars li lievres.
Mais li roncins en or les fievres,
Et sachiez que mais ne les tremble:
Escorchiez en fu, ce me cemble.
Or pot cil son roncin ploreir
Et metre la pel essoreir.
La pel, se Diex me doint salu,
Couta plus qu'ele ne valu.
Or laisserons esteir la pel,
Qu'il la garda et bien et bel
Jusqu'a ce tens que vos orroiz,
Dont de l'oïr vos esjorroiz.
Par tout est bien choze commune,
Ce seit chacuns, ce seit chacune,
Quant un hom fait noces ou feste
Ou il a genz de bone geste,
Li menestreil, quant il l'entendent,
Qui autre choze ne demandent,

Vont la, soit amont soit aval,
L'un a pié, l'autres a cheval.
Li couzins Guillaume en fit unes
Des noces, qui furent commmunes,
Ou asseiz ot de bele gent,
Dont mout li fu et bel et gent:
Se ne sai ge combien i furent.
Asseiz mangerent, asseiz burent,
Asseiz firent et feste et joie.
Je meïmes, qui i estoie,
Ne vi piesa si bele faire
Ne qui autant me peüst plaire,
Se Diex de ces biens me reparte.
N'est si grans cors qui ne departe:
La bone gent c'est departie.
Chacuns s'en va vers sa partie.
Li menestreil, trestuit huezei,
S'en vindrent droit a l'espouzei;
Nuns n'i fut de parleir laniers:
"Doneiz nos maitres ou deniers,
Font il, qu'il est droiz et raisons,
S'ira chacuns en sa maison."
Que vos iroie je dizant
Ne mes paroles esloignant?
Chacun ot maitre, nes Challoz,
Qui n'estoit pas moult biauz valloz.
Challoz ot a maitre celui
Qui li lievres fist teil anui.
Ces lettres li furent escrites,
Bien saellees et bien dites;
Ne cuidiez pas que je vos boiz.
Challoz en est venuz au bois:
A Guillaume ces lettres baille.
Guillaumes les resut cens faille,
Guillaumes les commance a lire,
Guillaumes li a pris a dire:
"Challot, Challot, biauz dolz amis,

Vos estes ci a moi tramis
Des noces mon couzin germain;
Mais je croi bien par saint Germain
Que vos cuit teil choze doneir,
Que que en doie gronsonneir,
Qui m'a coutei plus de cent souz,
Se je soie de Dieu assouz!"
Lors a apelei sa maignie
Qui fu sage et bien enseignie:
La pel dou lievre rova querre
Por cui il fist maint pas de terre.
Cil l'aportent grant aleüre,
Et Guillaumes de rechief jure:
"Charlot, se Diex me doint sa grace
Ne se Diex plus grant bien me face,
Tant me cousta com je te di."
- Hom n'en avroit pas samedi,
Fait Charlos, autant au marchié,
Et s'en aveiz mainz pas marchié:
Or voi ge bien que marcheant
Ne sont pas toz jors bien cheant."
La pel prent que cil li tendi.
Onques graces ne l'en rendi,
Car bien saveiz n'i ot de quoi.
Pencis le veïssiez et quoi;
Pencis s'en est issus la fuer,
Et si pence dedens son cuer,
Se il puet, qu'il li vodra vendre.
Et il li vendi bien au rendre!
Porpenceiz c'est que il fera
Et comment il li rendera.
Por li rendre la felonie
Fist en la pel la vilonie,
(Vos saveiz bien ce que vuet dire).
Arier vint et li dist: "Biau sire,
Se ci a riens, si le preneiz.
- Or as tu dit que bien seneiz?
- Oïl, foi que doi Notre Dame.
- Je cui c'est la coiffe ma fame
Ou sa toaille ou son chapel:
Je ne t'ai donei que la pel."
Lors a boutei sa main dedens.
Eiz vos l'escuier qui ot gans
Qui furent punais et puerri
Et de l'ouvrage maitre Horri.
Ensi fu deus fois conchïez:
Dou menestreil fu espïez,
Et dou lievres fu mal bailliz,
Que ces chevauz l'en fu failliz.
Rutebuez dit, bien m'en sovient:
Qui barat quiert, baraz li vient.
Explicit.
 

Un dist de Nostre Dame 

De la tres glorieuse Dame
Qui est salus de cors et d'ame
Dirai, que tere ne m'en puis.
Més l'en porroit avant un puis
Espuisier c'on poïst retrere
Combien la Dame est debonaire.
Por ce si la devons requerre
Qu'avant qu'elle chaïst sor terre
Mist Diex en li humilité,
Pitié, dousor et charité,
Tant que ne sai ou je commance:
Besoignex sui par abondance.
L'abondance de sa loange
Remue mon corage et change
Si qu'esprover ne me porroie,
Tant parlasse que je voudroie.
Tant a en li de bien a dire
Que trop est belle la matiere.
Se j'estoie bons escrivens,
Ains seroie d'escrire vains
Que je vous eüsse conté
La tierce part de sa bonté
Ne la quarte ne redeïsme:
Se set chacuns par lui meïsme.
Qui orroit comment elle proie
Celui qui de son cors fist proie
Por nous toz d'enfer despraer
C'onc ne vost le cors despraer,
Ainz fu por nos praez et pris,
Dou feu de charité espris!
Et tot ce li ramentoit elle
...
...
La douce Vierge debonaire:
"Biaus filz, tu sivis fame et home,
Quant il orent mors en la pome,

Il furent mort par le pechié
Don Maufez est toz entachiez,
En enfer il dui descendirent
Et tuir cil qui d'enfer yssirent.
Biax chiers fis, il t'en prist pitiez
Et tant lor montras d'amistiez
Que pour aus decendis des ciaus.
Li dessandres fu bons et biax:
De ta fille feïs ta mere,
Tiex fu la volanté dou Pere.
De la creche te fit on couche:
Sans orguel est qui la se couche.
Porter te covint en Egypte.
La demorance i fu petite,
Car aprés toi ne vesqui gaires
Tes anemis, li deputaires
Herodes, qui fist decoler
Les inocens et afoler
Et desmenbrer par chacun menbre,
Si com l'Escriture remenbre.
Aprés ce revenis arriere;
Juï te firent belle chiere,
Car tu lor montroies ou Temple
Maint bel mot et maint bel example.
Mout lot plot canques tu deïs
Juqu'a ce tens que tu feïs
Ladre venir de mort a vie.
Lors orent il sor toi envie,
Lors fu d'aus huiez et haïz,
Lors fu enginiez et traïz
Par les tiens et a aus bailliez,
Lors fus penez et travillez
Et lors fus lïez a l'estache:
N'est nus qui ne le croie et sache.
La fus batuz et deplaiez,
La fus de la mort esmaiez,
La te covint porter la croiz
Ou tu crias a haute voiz
Au Juïs que tu soif avoies.
La soif estoit que tu savoies
Tes amis mors et a malaise
En la dolor d'enfer punaise.
L'ame dou cors fu en enfer
Et brisa la porte d'enfer.
Tes amis tressis de leans,
Ainc ne remest clerc ne lai anz.
Li cors remest en la croiz mis;
Joseph, qui tant fu tes amis,
A Pilate te demanda:
Li demanders mout l'amanda.
Lors fus ou sepucre posez;
De ce fu hardiz et osez
Pilate qu'a toi garde mist,
Car de folie s'entremist.
Au tiers jor fu resucitez:
Lors fus et cors et deïtez
Ensamble sans corricion,
Lors montas a l'Ascension.
Au jor de Pentecouste droit,
Droit a celle hore et cel androit
Que li apostre erent assis
A la table, chacun pencis,
Lors envoias tu a la table
La toe grace esperitable
Dou saint Esperit enflamee,
Que tant fu joïe et amee.
Lors fu chacuns d'aus ci hardiz,
Et par paroles et par diz,
C'autant prisa mort comme vie:
N'orent fors de t'amor envie.
Biax chiers filz, por l'umain lignage
Jeter de honte et de domage
Feïs tote ceste bonté
Et plus assez que n'ai conté.
S'or laissoies si esgaré
Ce que si chier as comparé,
Ci avroit trop grant mesprison,
S'or les lessoies en prison
Entrer, don tu les as osté,
Car ci avroit trop mal hosté,
Trop grant duel et trop grant martire,
Biau filz, biau pere, biau doz sire."
Ainsi recorde tote jor
La doce Dame, sans sejor.
Ja ne fine de recorder
Car bien nous voudroit racorder
A li, don nos nos descordons
De sa corde et de ses cordons.
Or nous acordons a l'acorde
La Dame de misericorde
Et li prions que nos acort
Par sa pitié au dine acort
Son chier Fil, le dine Cor Dé:
Lors si serons bien racordé.
Explicit de Notre Dame.
 

L'Ave Maria Rustebuef 

A toutes genz qui ont savoir
Fet Rustebués bien a savoir
Et les semont:
Cels qui ont les cuers purs et mont
Doivent tuit deguerpir le mont
Et debouter,
Quar trop covient a redouter
Les ordures a raconter
Que chascuns conte;
C'est verité que je vous conte.
Chanoine, clerc et roi et conte
Sont trop aver;
N'ont cure des ames sauver,
Més les cors baignier et laver
Et bien norrir;
Quar il ne cuident par morir
Ne dedenz la terre porrir,
Més si feront,
Que ja garde ne s'i prendront
Que tel morsel engloutiront
Qui leur nuira,
Que la lasse d'ame cuira
En enfer, ou ja nel lera
Estez n'yvers.
Trop par sont les morsiaus divers
Dont la char menjuent les vers
Et en pert l'ame.
Un salu de la douce Dame,
Por ce qu'ele nous gart de blasme,

Vueil commencier,
Quar en digne lieu et en chier
Doit chascuns metre sanz tencier
Cuer et penssee.
Ave, roïne coronee!
Com de bone eure tu fus nee,
Qui Dieu porras!
Theophilus reconfortas
Quant sa chartre li raportas
Que l'Anemis,
Qui de mal fere est entremis,
Cuida avoir lacié et mis
En sa prison.
Maria, si com nous lison,
Tu li envoias garison
De son malage,
Qui deguerpi Dieu et s'ymage
Et si fist au deable hommage
Par sa folor;
Et puis li fist, a sa dolor,
Du vermeil sanc de sa color
Tel chartre escrire
Qui devisa tout son martire;
Et puis aprés li estuet dire
Par estavoir:
"Par cet escrit fet a savoir
Theophilus ot por avoir
Dieu renoié."
Tant l'ot deables desvoié
Que il estoit toz marvoié
Par desperance;
Et quant li vint en remembrance
De vous, Dame plesant et franche,
Sanz demorer
Devant vous s'en ala orer;
Del cuer commença a plorer
Et larmoier;

Vous l'en rendistes tel loier,
Quant de cuer l'oïstes proier,
Que vous alastes,
D'enfer sa chartre raportastes,
De l'Anemi le delivrastes
Et de sa route.
Gracia plena estes toute:
Qui ce ne croit, il ne voit goute
Et le compere.
Dominus li sauveres Pere
Fist de vous sa fille et sa mere,
Tant vous ama;
Dame des angles vous clama;
En vous s'enclost, ainz n'entama

Vo dignité,
N'en perdistes virginité.
Tecum par sa digne pité

Vout toz jors estre
Lasus en la gloire celestre;
Donez le nous ainsinques estre
Lez son costé.
Benedicta tu qui osté
Nous as del dolereus osté
Qui tant est ors
Qu'il n'est en cest siecle tresors
Qui nous peüst fere restors
De la grant perte
Par quoi Adam fist la deserte.
Prie a ton fil qu'i nous en terde
Et nous esleve
De l'ordure qu'aporta Eve
Quant de la pomme osta la seve,
Par quoi tes fis,
Si com je sui certains et fis,
Souffri mort et fu crucefis
Au vendredi
(C'est veritez que je vous di)
Et au tierz jor, plus n'atendi,
Resuscita
La Magdelene visita,
De toz ses pechiez la cuita
Et la fist saine.
De paradis es la fontaine,

In mulieribus et plaine
De seignorie.
Fols est qui en toi ne se fie.
Tu hez orgueil et felonie
Seur toute chose;
Tu es li lis ou Diex repose;
Tu es rosiers qui porte rose
Blanche et vermeille;
Tu as en ton saint chief l'oreille
Qui les desconseilliez conseille
Et met a voie;
Tu as de solaz et de joie
Tant que raconter n'en porroie
La tierce part.
Fols est cil qui pensse autre part
Et plus est fols qui se depart
De votre acorde,
Quar honesté, misericorde
Et pacience a vous s'acorde
Et abandone.
Hé! benoite soit la corone
De Jhesucrist, qui environe
Le vostre chief;
Et benedictus de rechief
Fructus qui soufri grant meschief
Et grant mesaise
Por nous geter de la fornaise
D'enfer, qui tant par est pusnaise,
Laide et obscure.
Hé! douce Virge nete et pure,
Toutes fames por ta figure
Doit l'en amer.
Douce te doit l'en bien clamer,
Quar en toi si n'a point d'amer
N'autre durté:
Chacié en as toute obscurté.
Par la grace, par la purté

Ventris tui,
Tuit s'en sont deable fuï;
N'osent parler, car amuï
Sont leur solas.
Quant tu tenis et acolas
Ton chier filz, tu les afolas
Et maumeïs.
Si com c'est voirs que tu deïs:
"Hé! biaus Pere qui me feïs,
Je sui t'ancele",
Toi depri je, Vierge pucele,
Prie a ton Fil qu'il nous apele
Au Jugement,
Quant il fera si aigrement
Tout le monde communement
Trambler come fueille,
Qu'a sa partie nous acueille!
Disons Amen, qu'ainsi le vueille!
Explicit l'Ave Maria Rustebuef.
 

C'est de Notre Dame 


I
Chanson m'estuet chantier de la meilleur
Qui onques fust ne qui jamais sera.
Li siens douz chans garit toute douleur:
Bien iert gariz cui ele garira.
Mainte arme a garie;
Huimais ne dot mie
Que n'aie boen jour,
Car sa grant dosour
N'est nuns qui vous die.

II
Mout a en li cortoizie et valour;
Bien et bontei et charitei i a.
Con folz li cri merci de ma folour:
Foloié ai, s'onques nuns foloia.
Si pleur ma folie
Et ma fole vie;
Et mon fol senz plour
Et ma fole errour
Ou trop m'entroblie.

III
Quant son doulz non reclainment picheour
Et il dient son Ave Maria,
N'ont puis doute dou Maufei tricheour
Qui mout doute le bien qu'en Marie a,
Car qui se marie

En teile Marie,
Boen mariage a:
Marions nos la,
Si avrons s'aïe.

IV
Mout l'ama cil qui, de si haute tour
Com li ciel sunt, descendi juque sa.
Mere et fille porta son creatour
Qui de noiant li et autres cria.
Qui de cuer s'escrie
Et merci li crie
Merci trovera:
Jamais n'i faudra
Qui de cuer la prie.

V
Si com hon voit le soloil toute jor
Qu'en la verrière entre et ist et s'en va,
Ne l'enpire tant i fiere a sejour,
Ausi vos di que onques n'empira
La Vierge Marie:

Vierge fu norrie,

Vierge Dieu porta,

Vierge l'aleta,

Vierge fu sa vie.
Explicit.
 

Ci encoumence la chanson de Puille 


I
Qu'a l'arme vuet doner santei
Oie de Puille l'errement!
Diex a son regne abandonei:
Li sien le nos vont presentant
Qui de la Terre ont sarmonei.
Quanque nos avons meserrei
Nos iert a la croix pardonei:
Ne refusons pas teil present.

II
Jone gent, qu'aveiz enpencei?
De quoi vos iroiz vos vantant
Quant vos sereiz en viel aei?
Qu'ireiz vos a Dieu reprouvant
De ce que il vos a donei
Cuer et force et vie et santei?

Vos li aveiz le cuer ostei:
C'est ce qu'il vuet, tant seulement.

III
Au siecle ne sons que prestei
Por veoir nostre efforcement.
Nos n'avons yver ne estei
Dont aions asseürement;
Si avons jai grant piece estei,
Et qu'i avons nos conquestei
Dont l'arme ait nule seürtei?
Je n'i voi fors desperement.

IV
Or ne soions desesperei,
Crions merci hardiement,
Car Dieux est plains de charitei
Et piteuz juqu'au Jugement.
Mais lors avra il tost contei
Un conte plain de grant durtei:
"Veneiz, li boen, a ma citei!
Aleiz, li mal, a dampnement!"

V
Lors seront li fauz cuer dampnei
Qui en cest siecle font semblant
Qu'il soient plain d'umilitei
Et si boen qu'il n'i faut noiant,
Et il sont plain d'iniquitei;
Mais le siecle ont si enchantei
C'om n'oze dire veritei
Ce c'on i voit apertement.

VI
Clerc et prelat qui aünei
Ont l'avoir et l'or et l'argent
L'ont il de lor loiaul chatei?
Lor peres en ot il avant?
Et lors que il sont trespassei,
L'avoir que il ont amassei
Et li ombres d'un viez fossei,
Ces deus chozes ont un semblant.

VII

Vasseur qui estes a l'ostei,
Et vos, li bacheleir errant,
N'aiez pas tant le siecle amei,
Ne soiez pas si nonsachant
Que vos perdeiz la grant clartei
Des cielz, qui est sans oscurtei.
Or varra hon vostre bontei:
Preneiz la croix, Diex vos atant!

VIII
Cuens de Blois, bien aveiz errei
Par desai au tornoiement.
Dieux vos a le pooir prestei,
Ne saveiz combien longuement.
Montreiz li se l'en saveiz grei,
Car trop est plainz de nicetei
Qui pour un pou de vanitei
Lairat la joie qui ne ment.

Explicit.
 

Ci encoumence li diz de Puille 


I
Cil Damediex qui fist air, feu et terre et meir,
Et qui por notre mort senti le mors ameir,

Il doint saint paradix, qui tant fait a ameir,
A touz ceulz qui orront mon dit sans diffameir!

II
De Puille est la matyre que je wel coumancier
Et dou roi de Cezile, que Dieux puisse avancier!
Qui vodrat elz sainz cielz semance semancier

Voisse aidier au bon roi qui tant fait a prisier.

III
Li boens rois estoit cuens d'Anjou et de Provance,
Et c'estoit filz de roi, freres au roi de France.
Bien pert qu'il ne vuet pas faire Dieu de sa pance
Quant por l'arme sauveir met le cors en balance.

IV
Or preneiz a ce garde, li groz et li menu,
Que, puis que nos sons nei et au siecle venu,
S'avons nos pou a vivre, s'ai je bien retenu.
Bien avons mains a vivre quant nos sommes chenu.

V
Conquerons paradix quant le poons conquerre;
N'atendons mie tant meslee soit la serre.
L'arme at tantost son droit que li cors est en terre;
Quant sentance est donee, noians est de plus querre.

VI
Dieux done paradix a touz ces bienvoillans:
Qui aidier ne li wet bien doit estre dolans.
Trop at contre le roi d'Yaumons et d'Agoulans;

Il at non li rois Charles, or li faut des Rollans.

VII
Saint Andreuz savoit bien que paradix valoit
Quant por crucefier a son martyre aloit.
N'atendons mie tant que la mors nos aloit,
Car bien serions mort se teiz dons nos failloit.

VIII
Cilz siecles n'est pas siecles, ainz est chans de bataille,
Et nos nos combatons a vins et a vitaille;
Ausi prenons le tens com par ci le me taille,
S'acreons seur noz armes et metons a la taille.

IX
Quant vanra au paier, coument paiera l'arme,
Quant li cors selon Dieu ne moissone ne same?
Se garans ne li est Dieux et la douce Dame,
Gezir l'escovanra en parmenable flame.

X
Picheour vont a Roume querre confession
Et laissent tout encemble avoir et mansion,
Si n'ont fors penitance. Ci at confusion:

Voisent un pou avant, s'avront remission.

XI
Bien est foulz et mauvais qui teil voie n'emprent
Por eschueir le feu qui tout adés emprant;
Povie est sa conciance quant de rien nou reprent;
Pou prise paradix quant a ce ne se prent.

XII
Gentilz cuens de Poitiers, Dieux et sa douce Meire

Vous doint saint paradyx et la grant joie cleire!
Bien li aveiz montrei loiaul amour de frere;
Ne vos a pas tenu Couvoitize l'aveire.

XIII
Bien li meteiz le votre, bien l'i aveiz ja mis;
Bien moustreiz au besoing que vos iestes amis.
Se chacuns endroit soi c'en fust si entremis,
Ancor oan eüst Charles mains d'anemis.

XIV
Prions por le roi Charle: c'est por nos maintenir;
Por Dieu et sainte Eglize c'est mis au couvenir.
Or prions Jhesucrit que il puist avenir
A ce qu'il a empris et son ost maintenir.

XV
Prelat, ne grouciez mie dou dizeime paier,
Mais priez Jhesucrit qu'il pance d'apaier;
Car se ce n'a mestier, sachiez sanz delaier
Hom panrra a meïmes, si porroiz abaier.
Explicit.
 

C'est la complainte d'outremer. 

Empereour et roi et conte
Et duc et prince, a cui hom conte
Romans divers por vous esbatre
De cex qui se suelent combatre
Sa en arrier por sainte Eglise,
Car me dites par queil servise

Vos cuidiez avoir paradix.
Cil le gaaignerent jadiz
Dont vos oeiz ces romans lire
Par la poinne, par le martyre
Que li cors soffrirent sus terre.

Veiz ci le tens, Diex vos vient querre,
Braz estanduz, de son sanc tainz,
Par quoi li fex vos iert estainc
Et d'enfer et de purgatoire.
Reconmenciez novele estoire,
Serveiz Deu de fin cuer entier,
Car Dieux vous moustre le sentier
De son pays et de sa marche,
Que hom cens raison le sormarche.
Por ce si devriiez entendre
A revangier et a deffendre
La Terre de Promission
Qui est en tribulacion
Et perdue, ce Diex n'em pence,
Se prochainnement n'a deffence.
Soveigne vos de Dieu le Peire,
Qui por soffrir la mort ameire
Envoia en terre son fil.
Or est la terre en grant peril
Lai ou il fut et mort et vis.
Je ne sai plus que vos devis.
Qui n'aidera a ceste empointe,
Qui si fera le mesacointe,
Pou priserai tout l'autre afaire,
Tant sache lou papelart faire,
Ains dirai mais et jor et nuit:
"N'est pas tout ors quanque reluit."
Ha! rois de France, rois de France,
La loiz, la foiz et la creance

Vat presque toute chancelant.
Que vos iroie plus celant?
Secorez la, qu'or est mestiers,
Et vos et li cuens de Poitiers,
Et li autre baron encemble.
N'atendeiz pas tant que vos emble
La mort l'arme, por Deu, seigneur!
Mais qui vorra avoir honeur
En paradix, si la deserve,
Car je n'i voi nule autre verve.
Jhesucriz dist en l'Ewangile,
Qui n'est de truffe ne de guile:
"Ne doit pas paradix avoir
Qui fame et enfans et avoir
Ne lait por l'amour de celui
Qu'en la fin iert juges de lui."
Asseiz de gens sunt mout dolant
De ce que hom trahi Rollant
Et pleurent de fauce pitié,
Et voient ax ieux l'amistié
Que Deux nos fist, qui nos cria,
Qui en la sainte Croix cria
Aus Juÿs que il moroit de soi.
Ce n'ert pas por boivre a guersoi,
Ainz avoit soi de nos raiembre.
Celui doit hon douteir et criembre,
Por teil seigneur doit hom ploreir
Qu'ensi se laissat devoreir,
Qu'il ce fist percier le costei
Por nos osteir de mal hosteil.
Dou costei issi sancz et eigue,
Qui ces amis netoie et leive.
Rois de France, qui aveiz mis.
Et vostre avoir et voz amis
Et le cors por Dieu en prison,
Ci aurat trop grant mesprison
Ce la sainte Terre failhez.
Or covient que vos i ailliez
Ou vos i envoiez des gent,
Cens apairgnier or et argent,
Dont li droiz Dieu soit chalangiez.
Diex ne wet faire plus lons giez
A ces amis ne longue longe,
Ansois i wet metre chalonge
Et wet cil le voisent veoir
Qu'a sa destre vauront seoir.
Haÿ! prelat de saint Eglise,
Qui por gardeir les cors de byse
Ne voleiz leveir aux matines,

Messires Joffrois de Sergines

Vos demande dela la mer.
Mais je di: cil fait a blameir
Qui nule riens plus vos demande
Fors boens vins et boenne viande
Et que li poivres soit bien fors.
C'est votre guerre et votre effors,
C'est vostre Diex, c'est votre biens.

Votre Peires i trait le fiens.
Rutebués dit, qui riens ne soile,
Qu'assez aureiz d'un poi de toile,
Se les pances ne sont trop graces.
Et que feront les armes lasses?
Elz iront la ou dire n'oze.
Diex iert juge de ceste choze.
Quar envoiez le redeïsme
A Jhesucrist du sien meïsme,
Se li fetes tant de bonté,
Puisqu'il vous a si haut monté!
Haï! grant clerc, grant provendier,
Qui tant estes grant vivendier,
Qui faites Dieu de votre pance,
Dites moi par queil acointance

Vos partireiz au Dieu roiaume,
Qui ne voleiz pas dire .I. siaume
Dou sautier, tant estes divers,
Fors celui ou n'a que .II. vers:
Celui dites aprés mangier.
Diex wet que vos l'aleiz vengier
Sanz controuver nule autre essoinne,
Ou vos laissiez le patrimoinne
Qui est dou sanc au Crecefi.
Mal le teneiz, jou vos afi.
Se vos serveiz Dieu a l'eglise,
Dieux vos resert en autre guise,
Qu'il vos paist en votre maison.
C'est quite a quite par raison.
Mais ce vos ameiz le repaire
Qui sanz fin est por joie faire,
Achateiz le, car Diex le vent.
Car il at mestier par couvent
D'acheteours, et cil s'engignent
Qui orendroit ne le bargignent,
Car teil fois le vorront avoir
C'om ne l'aurat pas por avoir.
Tornoieur, et vos que dirois
Qui au jor dou Juïse irois?
Devant Dieu que porroiz respondre?
Car lors ne se porront repondre
Ne genz clergies ne gens laies,
Et Dieux vous monterra ces plaies.
Ce il vos demande la terre
Ou por vos vout la mort soffere,
Que direiz vos? Je ne sai quoi.
Li plus hardi seront si quoi
C'om les porroit panrre a la main.
Et nos n'avons point de demain,
Car li termes vient et aprouche
Que la mort nos clourat la bouche.
Ha! Antioche, Terre sainte,
Con ci at delireuze plainte
Quant tu n'as mais nuns Godefrois!
Li feux de charitei est frois
En chacun cuer de crestiien,
Ne jone home ne ancien
N'ont por Dieu cure de combatre.
Asseiz se porroit ja debatre
Et Jacobins et Cordeliers
Qu'il trovassent nuns Angeliers,
Nuns Tangreiz ne nuns Bauduÿns.
Ansois lairont aux Beduÿns
Maintenir la Terre absolue
Qui par defaut nos est tolue,
Et Dieux l'at ja d'une part arse.
D'autre part vienent cil de Tarse,
Et Coramin et Chenillier
Revanrront por tot escillier.
Ja ne serat qui la deffande.
Ce mes sires Joffrois demande
Secours, si quiere qui li fasse,
Car je n'i voi nulle autre trasce.
Car com plus en sarmoneroie,
Et plus l'afaire empireroie.
Cils siecles faut: qui bien fera,
Aprés la mort le trovera.
Explicit.
 

Ci encoumence la complainte dou conte huede de nevers 


I
La mors, qui toz jors ceulz aproie
Qui plus sont de bien faire en voie,
Me fait descovrir mon corage
Por l'un de ceulz que plus amoie
Et que mieux recembleir vodroie
C'oume qui soit de nul langage.
Huedes ot non, preudome et sage,
Cuens de Nevers au fier corage,
Que la mors a pris en sa proie.
C'estoit la fleurs de son lignage;
De sa mort est plus granz damage
Que je dire ne vos porroie.

II
Mors est li cuens, Diex en ait l'ame!
Sainz Jorges et la douce Dame

Vuellent prier le sovrain maitre
Qu'en cele joie qui n'entame,
Senz redouteir l'infernal flame,
Mete le boen conte a sa destre!
Et il i doit par raison estre,
Qu'il laissa son leu et son estre
Por cele glorieuze jame
Qui a non la joie celestre.
Mieudres de li ne porra nestre,
Mien esciant, de cors de fame.

III
Li cuens fu tantost chevaliers
Com il en fu poinz et mestiers,
Qu'il pot les armes endureir;
Puis ne fu voie ne sentiers
Ou il n'alast mout volentiers
Se on s'i pot aventureir,
Si vos puis bien dire et jureir,
C'il peüst son droit tenz dureir,
C'onques ne fu mieudres terriers,
Tant se seüst amesureir
Au boenz, et les fauz forjureir:
Auz unz dolz et auz autres fiers.

IV
Ce pou qu'auz armes fu en vie,
Tuit li boen avoient envie
De lui resambleir de meniere.
Se Diex n'amast sa compaignie,
N'eüst pas Acre desgarnie
De si redoutee baniere
La mors a mis l'afaire ariere
D'Acre, dont nuns mestiers n'en iere;
La Terre en remaint esbahie.
Ci a mort delireuze et fiere
Que nuns hom n'en fait bele chiere,
Fors cele pute gent haïe.

V
Ha! Terre plainne de noblesce,
De charitei et de largesce,
Tant aveiz fait vilainne perde!
Ce morte ne fust Gentilesce
Et Vaselages et Proesce,

Vos ne fussiez pas si deserte.
Haï! haï! genz mal aperte,
La porte des cielz est overte:
Ne reculeiz pas por peresce.
En brief tanz l'a or Diex offerte
Au boen conte par sa deserte,
Qu'il l'a conquise en sa jonesce.

VI
Ne fist mie de sa croix pile,
Si com font souvent teil dis mile
Qui la prennent par grant faintize;
Ainz a fait selonc l'Ewangile,
Qu'il a maint borc et mainte vile
Laissié, por morir au servize
Celui Seigneur qui tot justize.
Et Diex li rent en bele guize
(Ne cuidiez pas que se soit guile),
Qu'il fait granz vertuz a devize:
Bien pert que Diex a s'arme prise
Por metre en son roial concile.

VII
Encor fist li cuens a sa mort
Qu'avec les plus povres s'amort:
Des plus povres vot estre el conte.
Quant la mors un teil home mort,
Que doit qu'ele ne ce remort
De mordre si tost un teil conte?
Car, qui la veritei nos conte,
Je ne cuit pas que jamais monte
Sor nul cheval, feble ne fort,
Nuns hom qui tant ai doutei honte
Ne mieulz seüst que honeurs monte:
N'a ci doleur et desconfort?

VIII
Li cuers le conte est a Citiaux,
Et l'arme la sus en sains ciaux,
Et li cors en gist outre meir.
Cist departirs est boens et biaux:
Ci a trois precieulz joiaux
Que tuit li boen doivent ameir.
La sus elz cielz fait boen semeir:
N'estuet pas la terre femeir
Ne ne c'i puet repaitre oiziaux.
Quant por Dieu se fist entameir,
Que porra Diex sor li clameir
Quant il jugera boens et maux?

IX
Ha! cuens Jehan, biau tres dolz sire,
De vos puisse hon tant de bien dire
Com hon puet dou conte Huede faire!
Qu'en lui a si bele matyre
Que Diex c'en puet joer et rire
Et sainz paradix s'en resclaire.
A iteil fin fait il bon traire,
Que hon n'en puet nul mal retraire;
Teil vie fait boen eslire.
Doulz et pitouz et debonaire
Le trovoit hon en tot afaire:
Sages est qu'en ses faiz ce mire.

X
Messire Erart, Diex vos maintiegne
Et en bone vie vos tiegne,
Qu'il est bien mestiers en la Terre:
Que, c'il avient que tost vos preigne,
Je dout li païs ne remeigne
En grant doleur et en grant guerre.
Com li cuers el ventre vos serre
Quant Diex a mis si tost en serre
Lou conte a la doutee enseigne!
Ou porroiz teil compaignon querre?
En France ne en Aingleterre
Ne cuit pas c'om le vos enseingne.

XI
Ha! rois de France, rois de France,
Acre est toute jor en balance:
Secoreiz la, qu'il est mestiers.
Serveiz Dieu de vostre sustance,
Ne faites plus ci remenance,
Ne vos ne li cuens de Poitiers.
Diex vos i verra volentiers,
Car toz est herbuz li santiers
C'on suet batre por penitance.
Qu'a Dieu sera amis entiers

Voit destorbeir ces charpentiers
Qui destorbent notre creance!

XII
Chevalier, que faites vos ci?
Cuens de Blois, sire de Couci,
Cuens de Saint Pol, fils au boen Hue,
Bien aveiz avant les cors ci;
Coument querreiz a Dieu merci
Se la mors en voz liz vos tue?

Vos veeiz la Terre absolue
Qui a voz tenz nos ert tolue,
Dont j'ai le cuer triste et marri.
La mors ne fait nule atendue,
Ainz fiert a massue estandue.
Tost fait nuit de jor esclarci.

XIII
Tornoiëur, vos qu'attendeiz,
Qui la Terre ne deffendeiz
Qui est a votre Creatour?

Vos aveiz bien les yex bandeiz
Quant ver Dieu ne vos desfendeiz
N'en vos ne meteiz nul atour.
Pou douteiz la parfonde tour
Dont li prison n'ont nul retour,
Ou par peresce descendeiz.
Ci n'a plus ne guanche ne tour
Quant la mors vos va si entour:
A Dieu cors et arme rendeiz.

XIV
Quant la teste est bien avinee,
Au feu, deleiz la cheminee,
Si nos croizonz de plain eslaiz.
Et quant vient a la matinee,
Si est ceste voie finee:
Teil coutume a et clers et lais;
Si lait sales, maisons, palais,
A doleur, a fort destinee;
Lai s'en va ou n'a nul relais.
De l'avoir rest il bone pais
Quant gist mors desus l'echinee!

XV
Or prions au Roi glorieux,
Qui par son sanc esprecieulz f.43 r°2
Nos ota de destrucion,
Qu'en son regne delicieuz,
Qui tant est doulz et gracieuz,
Faciens la nostre mansion
Et que par grant devocion
Ailliens en cele region
Ou Diex soffri la mort crueulz.
Qui lait en teil confusion
La Terre de promission
Pou est de s'arme curieulz.
Explicit.
 

Ci encoumence li diz de la voie de tunes 


I
De corrouz et d'anui, de pleur et de pitié
Est toute la matiere dont je tras mon ditié.
Qui n'a pitié en soi bien at Dieu fors getié:

Ver Dieu ne doit trouveir amour ne amistié.

II
Ewangelistre, apostre,/ martyr et confesseur
Por Jhesucrit soffrirent de la mort le presseur;
Or vos i gardeiz bien, qui estes successeur,
C'on n'at pas paradyx cens martyre pluseur.

III
Onques en paradix n'entra nuns fors par poinne;
Por c'est il foulz cheitis qui por l'arme ne poinne.
Cuidiez que Jhesucris en paradyx nos mainne
Por norrir en delices la char qui n'est pas sainne?

IV
Sainne n'est ele pas, de ce ne dout je point:
Or est chaude, or est froide; or est soeiz, or point;
Ja n'iert en un estat ne en un certain point.
Qui sert Dieu de teil char mainne il bien s'arme a point?

V
A point la moinne il bien a cele grant fornaize
Qui est dou puis d'enfer, ou ja nuns n'avra aise.
Bien se gart qui i vat, bien se gart qui i plaise,
Que Dieux ne morra plus por nule arme mauvaise.

VI
Dieux dist en l'Ewangile: "Se li preudons seüst
A queil heure li lerres son suel chaveir deüst,

Il veillast por la criente / que dou larron eüst,
Si bien qu'a son pooir de rien ne li neüst."

VII
Ausi ne savons nos quant Dieuz dira: "Veneiz!"
Qui lors ert mal garniz moult iert mal aseneiz,
Car Dieux li sera lors com lions forseneiz.

Vos ne vos preneiz garde, qui les respis preneiz.

VIII
Li rois ne les prent pas, cui douce France est toute,
Qui tant par ainme l'arme que la mort n'en redoute,
Ainz va par meir requerre cele chiennalle gloute.
Jhesucriz, par sa grace, si gart lui et sa route!

IX
Prince, prelat, baron, por Dieu preneiz ci garde.
France est si grace terre, n'estuet pas c'om la larde:
Or la wet cil laissier qui la maintient et garde,
Por l'amor de Celui qui tout a en sa garde.

X
Des or mais se deüst li preudons sejourneir
Et toute s'atendue a sejour atourneir:

Or wet de douce France et partir et torneir.
Dieux le doint / a Paris a joie retorneir.

XI
Et li cuens de Poitiers, qui un pueple souztient,
Et qui en douce France si bien le sien leu tient
Que quinze jors vaut miex li leux par ou il vient,

Il s'en va outre meir, que riens ne le detient.

XII
Plus ainme Dieu que home qui emprent teil voiage
Qui est li souverains de tout pelerinage:
Le cors mettre a essil et meir passeir a nage
Por amor de Celui qui le fist a s'ymage.

XIII
Et messires Phelipes et li boens cuens d'Artois
Et li cuens de Nevers, qui sunt preu et cortois,
Refont en lor venue a Dieu biau serventois;
Chevalier qui nes suit ne pris pas un nantois.

XIV
Li boens rois de Navarre, qui lait si bele terre
Que ne sai ou plus bele puisse on troveir ne querre
(Mais hon doit tout laissier por l'amor Dieu conquerre:
Ciz voiages est cleis qui paradix desserre),

XV
Ne prent pas garde a choze qu'il ait eü a faire;
S'a il asseiz eü et anui et contraire,
Mais si con Dieux trouva saint Andreu debonaire,
Trueve il le roi Thiebaut doulz et de boen afaire.

XVI
Et li dui fil le roi et lor couzins germains,
Ce est li cuens d'Artois, qui n'est mie dou mains,
Revont bien enz dezers laboreir de lor mains
Quant par meir vont requerre Sarrazins et Coumains.

XVII
Tot soit qu'a moi bien faire soient tardif et lant,
Si ai je de pitié por eulz le cueur dolant:
Mais ce me reconforte (qu'iroie je celant?)
Qu'en lor venues vont en paradix volant.

XVIII
Saint Jehans eschuia compaignie de gent,
En sa venue fist de sa char son serjant,
Plus ama les desers que or fin ne argent,
Qu'Orgueulz ne li alast sa vie damagent.

XIX
Bien doit ameir le cors qui en puet Dieu servir,
Qu'il en puet paradix et honeur deservir:
Trop par ainme son aise/qui lait l'arme aservir,
Qu'en enfer sera serve par son fol messervir.

XX

Veiz ci moult biau sarmon: li rois va outre meir
Pour celui Roi servir ou il n'a point d'ameir.
Qui ces deus rois vodra et servir et ameir
Croize soi, voit aprés: mieulz ne peut il semeir.

XXI
Ce dit cil qui por nos out asseiz honte et lait:
"N'est pas dignes de moi qui por moi tot ne lait;
Qu'après moi vuer venir croize soi, ne delait!"
Qui aprés Dieu n'ira mal fu norriz de lait.

XXII

Vauvaseur, bacheleir plain de grant nonsavoir,
Cuidiez vos par desa pris ne honeur avoir?

Vous vous laireiz morir, et porrir votre avoir;
Et ce vos vos moreiz, Diex nou quiert ja savoir.

XXIII
Dites, aveiz vos pleges de vivre longuement?
Je voi aucun riche home faire maisonnement:
Quant il a assouvi trestout entierement,
Se li fait hon un autre, de petit coustement.

XXIV
Ja coars n'enterra en paradyx celestre,
Si n'est nuns si coars qui bien n'i vouxist estre;
Mais tant doutent mesaize et a guerpir lor estre
Qu'il en adossent Dieu et metent a senestre.

XXV
Dés lors que li hons nait, a il petit a vivre;
Quant il a quarante ans, or en a mains ou livre.
Quant il doit servir Dieu, si s'aboivre et enyvre;
Ja ne se prendra garde tant que mors le delivre.

XXVI
Or est mors: qu'a il fait,qu'au siecle a tant estei?

Il a destruiz les biens que Dieux li a prestei;
De Dieu ne li souvint ne yver ne estei.

Il avra paradix ce il l'a conquestei!

XXVII
Foulz est qui contre mort cuide troveir deffence:
Des biaux, des fors, des sages fait la mort sa despance;
La mors mort Absalon et Salemon et Sance;
De legier despit tout qu'adés a morir pance.

XXVIII
Et vos, a quoi penceiz, qui n'aveiz nul demain
Et qui a nul bien faire/ne voleiz metre main?
Se hom va au moustier, vos dites: "Je remain";
A Dieu servir dou votre iestes vos droit Romain.

XXIX
Se hom va au moustier, la n'aveiz vos que faire:
N'est pas touz d'une piece, tost vos porroit maufaire.
A ceux qui y vont dites qu'ailleurs aveiz afaire:
"Sans oïr messe sunt maint biau serf en Biaire."

XXX

Vous vous moqueiz de Dieu tant que vient a la mort,
Si li crieiz mercei lors que li mors vos mort
Et une consciance vos reprent et remort;
Si n'en souvient nelui tant que la mors le mort.

XXXI
Gardeiz dont vos venistes et ou vous revandroiz.
Diex ne fait nelui tort, n'est nuns juges si droiz;

Il est sires de loiz et c'est maitres de droiz:
Touz jors le trovereiz droit juge en toz endroiz.

XXXII
Li besoins est venuz qu'il a mestiers d'amis;

Il ne quiert que le cuer, de quanque en vos a mis.
Qui le cuer li aura et donei et promis
De resouvoir son reigne c'iert moult bien entremis.

XXXIII
Li mauvais demorront, nes couvient pas eslire;
Et c'il sunt hui mauvais, il seront demain pire;
De jor en jor iront de roiaume en empire:
Se nos nes retrouvons, si n'en ferons que rire.

XXXIV
Li Rois qui les trois rois en Belleem conduit
Conduie touz croiziez qui a mouvoir sunt duit,
Qu'osteir au soudant puissent et joië et deduit,
Si que bonnes en soient et notes et conduit!
Explicit.
 

Ci encoumence la desputizons dou croisie et dou descroisie. 


I
L'autrier entour la Saint Remei
Chevauchoie por mon afaire,
Pencix, car trop sunt agrami
La gent dont Diex at plus a faire,
Cil d'Acre, qui n'ont nul ami
(Ce puet on bien por voir retraire),
Et sont si prés lor anemi
Qu'a eux pueent lancier et traire.

II
Tant fui pancis a ceste choze
Que je desvoiai de ma voie,
Com cil qu'a li meïsmes choze,
Por le penceir que g'i avoie.
Une maison fort et bien cloze
Trouvai, dont je riens ne savoie,
Et c'estoit la dedens encloze
Une gent que je demandoie.

III
Chevaliers i avoit teiz quatre
Qui bien seivent parleir fransois.
Soupei orent, si vont esbatre
En un vergier deleiz le bois.
Ge ne me voulz sor eux embatre,
Que ce me dist uns hom cortois:
"Teiz cuide compaignie esbatre
Qui la toust", c'est or sans gabois.

IV
Li dui laissent parleir les deux,
Et je les pris a escouteir,
Qui leiz la haie fui touz seux.
Si descent por moi acouteir.
Si distrent, entre gas et geux,
Teiz moz con vos m'orreiz conter.
Siecles i fut nomeiz et Deus.
De ce pristrent a desputeir.

V
Li uns deux avoit la croix prise,
Li autres ne la voloit prendre.
Or estoit de ce lor emprise,
Que li croiziez voloit aprendre
A celui qui pas ne desprise
La croix ne la main n'i vuet tendre
Qu'il la preïst par sa maitrize,
Ce ces sans ce puet tant estendre.

VI
Dit li croisiez premierement:
"Enten a moi, biaux dolz amis.
Tu seiz moult bien entierement
Que Diex en toi le san a mis
Dont tu connois apertement
Bien de mal, amis d'anemis.
Se tu en euvres sagement,
Tes loiers t'en est ja promis.

VII
Tu voiz et parsois et entens
Le meschief de la Sainte Terre.
Por qu'est de proesse vantans
Qui le leu Dieu lait en teil guerre?
S'uns hom pooit vivre cent ans,
Ne puet il tant d'oneur conquerre
Com, se il est bien repentans,
D'aleir le Sepulchre requerre."

VIII
Dit li autres: "J'entens moult bien
Por quoi vos dites tel parole.

Vos me sermoneiz que le mien
Doingne au coc et puis si m'en vole.
Mes enfans garderont li chien,
Qui demorront en la pailliole.
Hon dit: "Ce que tu tiens, si tien!"
Ci at boen mot de bone escole.

IX
Cuidiez vos or que la croix preingne
Et que je m'en voize outre meir,
Et que les .C. soudees deingne
Por .XL. sols reclameir?
Je ne cuit pas que Deux enseingne
Que hom le doie ainsi semeir.
Qui ainsi senme, pou i veigne,
Car hom le devroit asomeir.

X
- Tu naquiz de ta mere nuz,
Dit li croisiez, c'est choze aperte.
Or iez juqu'a cet tens venuz
Que ta chars est bien recoverte.
Qu'est Dieus ne qu'est lors devenuz
Qu'a cent dobles rent la deserte?
Bien iert por mescheanz tenuz
Qui ferat si vilainne perte.

XI
Hom puet or paradix avoir
Ligierement, Diex en ait loux!
Asseiz plus, ce poeiz savoir,
L'acheta sainz Piere et sainz Poulz,
Qui de si precieux avoir
Com furent la teste et li coux
L'aquistrent, ce teneiz a voir.

Icist dui firent deus biaux coux."

XII
Dit cil qui de croizier n'a cure:
"Je voi merveilles d'une gent
Qui asseiz sueffrent poinne dure
En amasseir un pou d'argent,
Puis vont a Roume ou en Esture,

Ou vont autre voie enchergent.
Tant vont cerchant bone aventure
Qu'il n'ont baesse ne sergent.

XIII
Hom puet moult bien en cet paÿx
Gaiaignier Dieu cens grant damage.

Vos ireiz outre mer laÿs,
Qu'a folie aveiz fait homage.
Je di que il est foux naÿx
Qui se mest en autrui servage,
Quant Dieu puet gaaignier saÿx
Et vivre de son heritage.

XIV
- Tu dis si grant abusion
Que nus ne la porroit descrire,
Qui wés sans tribulacion
Gaaignier Dieu por ton biau rire.
Dont orent fole entencion
Li saint qui soffrirent martyre
Por venir a redempcion?
Tu diz ce que nuns ne doit dire.

XV
Ancor n'est pas digne la poinne
Que nuns hom puisse soutenir
A ce qu'a la joie sovrainne
Puisse ne ne doie venir.
Por ce se rendent tuit cil moinne
Qu'a teil joie puissent venir.
Hom ne doit pas douteir essoinne
C'on ait pour Dieu juqu'au fenir.

XVI
- Sire, qui des croix sermoneiz,
Resoffreiz moi que je deslas.
Sermoneiz ces hauz coroneiz,
Ces grans doiens et ces prelaz
Cui Diex est toz abandoneiz
Et dou siecle toz li solaz.
Ciz geux est trop mal ordeneiz,
Que toz jors nos meteiz es laz.

XVII
Clerc et prelat doivent vengier
La honte Dieu, qu'il ont ces rentes.

Il ont a boivre et a mangier,
Si ne lor chaut c'il pluet ou vente.
Siecles est touz en lor dangier.
C'il vont a Dieu par teile sente,
Fol sunt c'il la welent changier,
Car c'est de toutes la plus gente.

XVIII
- Laisse clers et prelaz esteir
Et te pren garde au roi de France,
Qui por paradix conquesteir

Vuet metre le cors en balance
Et ces enfans a Dieu presteir:
Li prés n'est pas en aesmance!
Tu voiz qu'il se vuet apresteir
Et faire ce dont a toi tance.

XIX
Moult a or meillor demoreir
Li rois el roiaume que nos,
Qui de son cors wet honoreir
Celui que por seignor tenons,
Qu'en crois se laissa devoreir.
Ce de lui servir ne penons,
Helas! trop avrons a ploreir,
Que trop fole vie menons.

XX
- Je wel entre mes voisins estre
Et moi deduire et solacier.

Vos ireiz outre la meir peistre,
Qui poeiz grant fais embracier.
Dites le soudant vostre meistre
Que je pri pou son menacier.
C'il vient desa, mal me vit neistre,
Mais lai ne l'irai pas chacier.

XXI
Je ne faz nul tort a nul home,
Nuns hom ne fait de moi clamour.
Je couche tost, si dor grant soume,
Et tieng mes voisins a amour.
Si croi, par saint Pierre de Roume,
Qu'il me vaut miex que je demour
Que de l'autrui porter grant soume,
Dont je seroie en grant cremour.

XXII
- Desai bees a aise vivre:
Seiz tu se tu vivras asseiz?
Di moi ce tu ceiz en queil livre
Certains vivres soit compasseiz.
Manjue et boif, et si t'enyvre,
Que mauvais est de pou lasseiz.
Tuit sont un, saches a delivre,
Et vie d'oume et oez quasseiz.

XXIII
Laz! ti dolant, la mors te chace,
Qui tost t'avra lassei et pris.
Desus ta teste tient sa mace.

Viex et jones prent a un pris.
Tantost a fait de pié eschace,
Et tu as tant vers Dieu mespris!
Au moins enxui un pou la trace
Par quoi li boen ont loz et pris.

XXIV
- Sire croiziez, merveilles voi:
Moult vont outre meir gent menue,
Sage, large, de grant aroi,
De bien metable convenue,
Et bien i font, si com je croi,
Dont l'arme est por meilleur tenue.
Si ne valent ne ce ne quoi
Quant ce vient a la revenue.

XXV
Se Diex est nule part el monde,

Il est en France, c'est sens doute.
Ne cuidiez pas qu'il se reponde
Entre gent qui ne l'ainment goute,
J'aing mieux fontainne qui soronde
Que cele qu'en estei s'esgoute,
Et vostre meir est si parfonde
Qu'il est bien droiz que la redoute.

XXVI
- Tu ne redoutes pas la mort,
Si seiz que morir te couvient,
Et tu diz que la mers t'amort!
Si faire folie dont vient?
La mauvaistiez qu'en toi s'amort
Te tient a l'ostel, se devient.
Que feras se la mors te mort,
Que ne ceiz que li tenz devient?

XXVII
Li mauvais desa demorront,
Que ja nuns boens n'i demorra.
Com vaches en lor liz morront:
Buer iert neiz qui delai morra.
Jamais recovreir ne porront,
Fasse chacuns mieux qu'il porrat.
Lor peresce en la fin plorront
Et s'il muerent, nuns nes plorra.

XXVIII
Ausi com par ce le me taille
Cuides foïr d'enfer la flame,
Et acroire et metre a la taille,
Et faire de la char ta dame.
A moi ne chaut, coument qu'il aille,
Mais que li cors puist sauver l'ame,
Ne de prison, ne de bataille,
Ne de laissier enfans ne fame.

XXIX
- Biaux sire chiers, que que dit aie,

Vos m'aveiz vaincu et matei.
A vos m'acort, a vos m'apaie,
Que vos ne m'aveiz pas flatei.
La croix preing sans nule delaie,
Si doing a Dieu cors et chatei,
Car qui faudra a cele paie,
Mauvaisement avra gratei.

XXX
En non dou haut Roi glorieux
Qui de sa fille fist sa meire,
Qui par son sanc esprecieux
Nos osta de la mort ameire,
Sui de moi croizier curieux
Por venir a la joie cleire.
Car qui a s'ame est oblieux,
Bien est raisons qu'il le compeire."
Explicit.
 

Ci encoumence li diz de l'Universitei de Paris 

Rimeir me couvient d'un contens
Ou l'on a mainz deniers contens
Despendu et despendera:
Ja siecles n'en amendera.
Li clerc de Paris la citei
(Je di de l'Universitei,
Noumeement li Arcien,
Non pas li preudome ancien)
On empris .I. contans encemble:
Ja biens n'en vanrra, ce me cemble,
Ainz en vanrra mauz et anuiz,
Et vient ja de jors et de nuiz.
Est or ce bien choze faisant?
Li filz d'un povre païsant

Vanrra a Paris por apanre;
Quanque ces peres porra panrre
En un arpant ou .II. de terre
Por pris et por honeur conquerre
Baillera trestout a son fil,
Et il en remaint a escil.
Quant il est a Paris venuz
Por faire a quoi il est tenuz
Et por mener honeste vie,
Si bestorne la prophecie:
Gaaig de soc et d'areüre
Nos convertit en armeüre.
Par chacune rue regarde
Ou voie la bele musarde;
Partout regarde, partout muze;
Ces argenz faut, sa robe uze:
Or est tout au recoumancier.
Ne fait or boen ci semancier.
En Quaresme, que hon doit faire
Choze qui a Dieu doie plaire,
En leu de haires haubers vestent
Et boivent tant que il s'entestent;
Si font bien li troi ou li quatre
Quatre cens escoliers combatre
Et cesseir l'Universitei:
N'a ci trop grant aversitei?
Diex! ja n'est il si bone vie,
Qui de bien faire auroit envie,
Com ele est de droit escolier!

Il ont plus poinne que colier
Por que il wellent bien aprendre;

Il ne puent pas bien entendre
A seoir aseiz a la table:
Lor vie est ausi bien metable
Com de nule religion.
Por quoi lait hon sa region
Et va en estrange païs,
Et puis si devient foulz naïz
Quant il i doit aprendre sens,
Si pert son avoir et son tens
Et c'en fait a ces amis honte?
Mais il ne seivent qu'oneurs monte.
Explicit.
 

C'est la complainte dou roi de Navarre 

Pitiez a compleindre m'enseigne
D'un home qui avoit seur Seinne
Et sor Marne maintes maisons;
Mais a teil bien ne vint mais hons
Com il venist, ne fust la mors
Qui en sa venue l'a mors:
C'est li rois Thiebauz de Navarre.
Bien a sa mort mis en auvarre
Tout son roiaume et sa contei
Por les biens c'on en a contei.
Quant li rois Thiebaus vint a terre,

Il fut asseiz qui li mut guerre
Et qui mout li livra entente,
Si que il n'ot oncle ne tente
Qui le cuer n'en eüst plain d'ire.
Mais je vos puis jureir et dire
Que, c'il fust son eage en vie,
De li cembleir eüst envie
Li mieudres qui orendroit vive,
Que vie si nete et si vive
Ne mena nuns qui soit ou monde.
Large, cortois et net et monde
Et boens au chans et a l'ostei:
Teil le nos a la mors ostei.
Ne croi que mieudres crestiens,
Ne jones hom ne anciens,
Remansist la jornee en l'ost;
Si ne croi mie que Dieux l'ost
D'avec les sainz, ainz l'i a mis,
Qu'il at toz jors esté amis
A sainte Eglize et a gent d'Ordre.
Mout en fait la mors a remordre
Qui si gentil morsel a mors:
Piesa ne mordi plus haut mors.
Jamais n'iert jors que ne s'en plaigne
Navarre et Brië et Champaingne.
Troie; Provins et li dui Bar,
Perdu aveiz votre tabar,
C'est a dire votre secours.
Bien fustes fondei en decours
Quant teil seigneur aveiz perdu.
Bien en deveiz estre esperdu.
Mors desloauz, qui rien n'entanz,
Se le laissasses soissante anz
Ancor vivre par droit aage,
Lors s'en preïsses le paage,
Si n'en peüst pas tant chaloir.
Or estoit venuz a valoir:
N'as tu fait grant descouvenue
Quant tu l'as mort en sa venue?
Mors desloiax, mors deputaire,
De toi blameir ne me puis taire
Quant il me sovient des bienz faiz
Que il a devant Tunes faiz,
Ou il a mis avoir et cors.
Li premiers issuz estoit fors
Et retornoit li darreniers.
Ne prenoit pas garde au deniers
N'auz garnizons qu'il despandoit;
Mais saveiz a qu'il entendoit?
A viseteir les bones genz.
Au mangier estoit droiz serjens;
Aprés mangier estoit compains
De toutes bones teches plains,
Pers auz barons, auz povres peires,
Et auz moiens compains et freres,
Boens en consoil et bien meürs,
Auz armes vistes et seürs
Si qu'en tout l'ost n'avoit son peir.
Douz fois le jor faisoit trampeir
Por repaistre les familleuz.
Qui deïst qu'il fust orguilleuz
Et il le veïst au mangier,

Il se tenist por mensongier.
Sa bataille estoit bone et fors,
Car ces semblanz et ces effors
Donoit aux autres hardiesse.
Onques home de sa jonesse
Ne vit nuns contenir si bel
En guait, en estour, en cembel.
Qui l'ot en Champaigne veü
En Tunes l'ot desconneü,
Qu'au besoig connoit hon preudome;
Et vos saveiz, ce est la soume,
Qui en pais est en son païs
Tenuz seroit por foux naÿx
C'il s'aloit auz paroiz combatre.
Par ceste raison vuel abatre

Vilonie, s'on l'en a dite,
Que sa vaillance l'en aquite.
Quant l'aguait faisoit a son tour,
Tout ausi com en une tour
Estoit chacuns asseüreiz,
Car touz li oz estoir mureiz.
Lors estoit chacuns a seür,
Car li siens gaiz valoit un mur.
Quant il estoient retornei,
Si trovoit hon tot atornei:
Tables et blanches napes mises.
Tant avoit laians de reprises
Donees si cortoisement,
Et roi de teil contenement,
Qu'a aise sui quant le recorde,
Por ce que nuns ne c'en descorde
Et que chacuns le me tesmoingne
De ceulz qui virent la besoigne,
Que n'en truis contraire nelui
Que tout ce ne soit voïrs de lui.
Rois Hanrris, freres au bon roi,
Dieux mete en vos si bon aroi
Com en roi Thiebaut votre frere:
Ja fustes vos de si boen peire.
Que vos iroie delaiant
Ne mes paroles porloignant?
A Dieu et au siecle plaisoit
Quanque li rois Thiebauz faisoit.
Fontainne estoit de cortoisie;
Toz biens i ert sanz vilonie.
Si com j'ai oï et apris:
De maitre Jehan de Paris,
Qui l'amoit de si bone amour
Com preudoms puet ameir seignor,

Vos ai la matiere descrite
Qu'em troiz jors ne seroit pas dite.
Messire Erars de Valeri,
A cui onques ne s'aferi
Nuns chevaliers de loiautei,
Diex par vos si l'avoit fait teil,
Et mieudres n'i est demoreiz
Qui au loig fust tant honoreiz.
Prions au Peire glorieuz
Et a son chier Fil precieus
Et le saint Esperit encemble,
En cui tout bonteiz s'asemble,
Et la douce Vierge pucele,
Qui de Dieu fu mere et ancele,
Qu'avec les sainz martirs li face
En paradix et lou et place.
Explicit.
 

Ci encoumence la complainte dou conte de Poitiers. 

Qui ainme Dieu et sert et doute

Volentiers sa parole escoute.
Ne crient maladie ne mort
Qu'a lui de cuer ameir s'amort.
Temptacions li cemble vent,
Qu'il a boen escu par devant:
C'est le costei son Criatour,

Qui por nos entra en l'estour
De toute tribulation
Sans douteir persecution.
De son costei fait il son hiaume,
Qu'il desirre lou Dieu roiaume,
Et c'en fait escut et ventaille
Et blanc haubert a double maille,
Et si met le cors en present
Por Celui qui le fais pesent

Vout soffrir de la mort ameire.
De legier laisse peire et meire
Et fame et enfans et sa terre,
Et met por Dieu le cors en guerre
Tant que Dieux de cest siecle l'oste.
Lors puet savoir qu'il a boen hoste
Et lors resoit il son merite,
Que Dieux et il sont quite et quite.
Ainsi fut li cuens de Poitiers
Qui toz jors fu boens et entiers,
Chevaucha cest siecle terrestre
Et mena Paradix en destre.

Veü aveiz com longuement
At tenu bel et noblement
Li cuens la contei de Tholeuze,
Que chacuns resembleir goleuze,
Par son sanz et par sa largesse,
Par sa vigueur, par sa proesse,
C'onques n'i ot contens ne guerre,
Ainz a tenu en pais sa terre.
Por ce qu'il me fist tant de biens,

Vo wel retraire .I. pou des siens.

Vos saveiz et deveiz savoir:
Li commencemens de savoir
Si est c'om doit avoir paour
De correcier son Saveour
Et li de tout son cuer ameir,
Qu'en s'amitié n'a point d'ameir,
En s'amitié n'a fin ne fons.
Tant l'ama li boens cuens Aufons
Que ne croi c'onques en sa vie
Pensast un rain de vilonie.
Se por ameir Dieu de cuer fin
Dou bersuel jusques en la fin,
Et por sainte Eglize enoreir,
Et por Jhesucrist aoureir
En toutes les temptacions,
Et por ameir religions
Et chevaliers et povre gent,
Ou il a mis or et argent
C'onques ne fina en sa vie,
Ce por c'est arme en cielz ravie,
Dont i est ja l'arme le conte
Ou plus ot bien que ne vos conte.
Se que je vi puis je bien dire:
Onques ne le vi si plain d'ire
C'onques li issist de sa bouche
Choze qui tornast a reprouche,
Mais biaux moz, boenz enseignemens.
Li plus grans de ces sairemens
Si estoit: "Par sainte Garie!"
Miraours de chevalerie
Fu il tant com il a vescu.
Moult orent en li boen escu
Li povre preudome de pris.
Sire Dieux, ou estoit ce pris
Qu'il lor donoit sens demandeir?
N'escouvenoit pas truandeir
Ne faire parleir a nelui:
Ce qu'il faisoit faisoit de lui,
Et donoit si cortoisement
Selonc chacun contenement
Que nuns ne l'en pooit reprandre.
Hom nos at parlei d'Alixandre,
De sa largesce, de son sans
Et de se qu'il fist a son tans:
S'en pot chacuns, c'il vot, mentir,
Ne nos ne l'osons desmentir
Car nos n'estions pas adonc.
Mais ce por bontei ne por don
A preudons le regne celestre,
Li cuens Aufons i doit bien estre.
Tant ot en son cuer de pitié,
De charitei et d'amistié,
Que nuns nel vos porroit retraire.
Qui porroit toutes ces mours traire
El cuer a .I. riche jone home,
Hon en feroit bien .I. preudome.
Boens fu au boens et boens confors,
Maus au mauvais et terriés fors,
Qu'il lor rendoit cens demorance
Lonc le pechié la penitance.
Et il le connurent si bien
C'onques ne li meffirent rien.
Dieux le tanta par maintes fois
Por connoistre queiz est sa foi,
Si connoist il et cuer et cors.
Et par dedens et par defors:
Job le trouva en paciance.
Et saint Abraham en fiance.
Ainz n'ot fors maladie ou painne,
S'en dut estre s'arme plus sainne.
Outre meir fu en sa venue,
Ou moult fist bien sa convenue
Avoec son boen frere le roi.
Plus bel hosteil, plus bel aroi
Ne tint princes emprés son frere.
Ne fist pas honte a son boen pere,
Ainz montra bien que preudons iere
De foi, de semblant, de meniere.
Or l'a pris Diex en son voiage,
Ou plus haut point de son aage,
Que, s'on en ceste region
Feïst roi par election
Et roi orendroit i fausist,
Ne sai prince qui le vausist.
Li vilains dist: "Tost vont noveles."

Voire, les bones et les beles.
Mais qui male novele porte
Tout a tantz vient il a la porte,
Et si i vient il toute voie.
Tost fu seü que en la voie
De Tunes, en son revenir,

Vout Dieux le conte detenir.
Tost fu seü et sa et la,
Par tout la renomee ala,
Par tout en fu faiz li servizes
En chapeles et en eglizes.
Partiz est li cuens de cest siecle,
Qui tant maintint des boens la riegle.
Je di por voir, non pas devin,
Que Tolozain et Poitevin
N'avront jamais meilleur seigneur:
Aussi boen l'ont il et greigneur.
Tant fist li cuens en cestui monde
Qu'avec li l'a Diex net et monde.
Ne croi que priier en conveigne:
Prions li de nos li soveigne!
Explicit.
 

C'est de Brichemeir 


I
Rimer m'estuet de Brichemer
Qui de moi se joe a la briche.
Endroit de moi jou doi ameir,
Je nou truis a eschars ne chiche;
N'a si large jusqu'outre mer,
Car de promesses m'a fait riche:
Au fromant qu'il fera semeir
Me fera ancouan flamiche.

II
Brichemers est de bel afaire,
N'est pas .I. hom plainz de desroi:
Douz et cortois et debonaire
Le trueve hon, et de grant aroi.
Je n'en puis fors promesse traire,
Je n'i voi mais autre conroi:
Auteil atente m'estuet faire
Com li Breton font de lor roi.

III
Ha! Brichemers, biau tres dolz sire,
Paié m'aveiz cortoizement,
Que votre borce n'en empire,
Ce voit chacuns apertement.
Un pou de choze vos wel dire
Qui n'est pas de grant coustement:
Ma promesse faites escrire,
Si soit en vostre testament.
Explicit.
 

C'est le dit d'Aristotle 

Aristotles a Alixandre
Enseigne et si li fait entendre
En son livre versefié,
Enz el premier quaier lié,
Conment il doit el siecle vivre.
Et Rutebués l'a trait dou livre.
"De tes barons croi le consoil,
Ce te loz je bien et consoil.
Ja serf de deus langues n'ameir,
Qu'il porte le miel et l'ameir.
N'essaucier home que ne doies,
Et par cest example le voies
C'uns ruissiaux acreüz de pluie
Sort plus de roit et torne en fuie
Que ne fait l'iaue qui decourt:
Ausi fel essauciez en court
Est plus crueuz et plus vilains
Que n'est ne cuens ne chatelains
Qui sont riche d'ancesserie.
Si te prie por sainte Marie,
Se tu voiz home qui le vaille,
Garde qu'a ton bienfait ne faille.
N'i prent ja garde a parentei,
C'om voit de teux a grant plantei
Qui sont de bone gent estrait
Dont on asseiz de mal retrait.
Jadiz ot en Egypte un roi
Sage, large, de grant arroi,
Liez et joians, haitiez et baux,
Et ces fils fu povres ribaux;
Et conquist asseiz anemis.
Puis que Nature en l'ome a mis
Sens et valour et cortoisie,

Il est quites de vilonie.
Tex est li hons com il se fait.
Uns homs son lignage refait,
Et uns autres lou sien depiece.
Ja ne porroie croire a piece
Que cil ne fust droiz gentiz hom
Qui fausetei et traïson
Heit et eschue, et honeur ainme,
Ou je ne sai pas qui s'en clainme
Jentil ne vilain autrement.
Or n'i a plus, je te demant
En don que tu ainmes preudoume,
Car de tout bien est ce la some.
Hon puet bien regneir une piece
Par faucetei avant c'om chiece,
Et plus qui plus seit de barat.
Mais il covient qu'il se barat
Li meïsmes, que qu'il i mete,
Ne jamais nuns ne s'entremete
De bareteir, que il ne sache
Que baraz li rendra la vache.
Se tu iez de querele juges,
Garde que tu si a droit juges
Que tu n'en faces a reprandre.
Juge le droit sans l'autrui prandre:
Juges qui prent n'est pas jugerres,
Ainz est jugiez a estre lerres.
Et se il te covient doneir,
Je ne t'i vuel plus sarmoneir:
Au doneir done en teil meniere
Que miex vaille la bele chiere
Que feras, au doneir le don,
Que li dons, car ce fait preudom.
Qui at les bones mours el cuer,
Les euvres moustrent par defuer.
Seule noblesce franche et sage
Emplit de tout bien le corage
Dou preudoume loiaul et fin.
Ses biens le moinne a boenne fin.
Au mauvais pert sa mauvistiez:
Tout adés fait le deshaitiez
Quant il voit preudoume venir.
Et ce si nos fait retenir
C'on doit connoistre boens et maus
Et desevrer les boens des faus.
Murs ne arme ne puet deffendre
Rois qu'a doneir ne vuet entendre.
Rois n'a mestier de forteresce
Qui a le cuer plain de largesse.
Hauz hom ne puet avoir nul vice
Qui tant li griet conme avarice.
A Dieu te coumant qui te gart.
Prent bien a ces choses regart..."
Explicit.
 

C'est la paiz de Rutebuef 


I
Mon boen ami, Dieus le mainteingne!
Mais raisons me montre et enseingne
Qu'a Dieu fasse une teil priere:
C'il est moiens, que Dieus l'i tiengne!
Que, puis qu'en seignorie veingne,
G'i per honeur et biele chiere.
Moiens est de bele meniere
Et s'amors est ferme et entiere,
Et ceit bon grei qui le compeingne;
Car com plus basse est la lumiere,
Mieus voit hon avant et arriere,
Et com plus hauce, plus esloigne.

II
Quant li moiens devient granz sires,
Lors vient flaters et nait mesdires:
Qui plus en seit, plus a sa grace.
Lors est perduz joers et rires,
Ces roiaumes devient empires
Et tuient ensuient une trace.
Li povre ami est en espace;
C'il vient a cort, chacuns l'en chace
Par groz moz ou par vitupires.
Li flateres de pute estrace
Fait cui il vuet vuidier la place:
C'il vuet, li mieudres est li pires.

III
Riches hom qui flateour croit
Fait de legier plus tort que droit,
Et de legier faut a droiture
Quant de legier croit et mescroit:
Fos est qui sor s'amour acroit,
Et sages qui entour li dure.
Jamais jor ne metrai ma cure
En faire raison ne mesure,
Ce n'est por Celui qui tot voit,
Car s'amours est ferme et seüre;
Sages est qu'en li s'aseüre:
Tui li autre sunt d'un endroit.

IV
J'avoie un boen ami en France,
Or l'ai perdu par mescheance.
De totes pars Dieus me guerroie,
De totes pars pers je chevance:
Dieus le m'atort a penitance
Que par tanz cuit que pou i voie!
De sa veüe rait il joie
Ausi grant com je de la moie
Qui m'a meü teil mesestance!
Mais bien le sache et si le croie:
J'avrai asseiz ou que je soie,
Qui qu'en ait anui et pezance.
Explicit.
 

C'est de la povretei Rutebuef 


I
Je ne sai par ou je coumance,
Tant ai de matyere abondance
Por parleir de ma povretei.
Por Dieu vos pri, frans rois de France,
Que me doneiz queilque chevance,
Si fereiz trop grant charitei.
J'ai vescu de l'autrui chatei
Que hon m'a creü et prestei:
Or me faut chacuns de creance,
C'om me seit povre et endetei.

Vos raveiz hors dou reigne estei,
Ou toute avoie m'atendance.

II
Entre chier tens et ma mainie,
Qui n'est malade ne fainie,
Ne m'ont laissié deniers ne gages.
Gent truis d'escondire arainie
Et de doneir mal enseignie:
Dou sien gardeir est chacuns sages.
Mors me ra fait de granz damages;
Et vos, boens rois, en deus voiages
M'aveiz bone gent esloignie,
Et li lontainz pelerinages
De Tunes, qui est leuz sauvages,
Et la male gent renoïe.

III
Granz rois, c'il avient qu'a vos faille,
A touz ai ge failli sans faille.

Vivres me faut et est failliz;
Nuns ne me tent, nuns ne me baille.
Je touz de froit, de fain baaille,
Dont je suis mors et maubailliz.
Je suis sanz coutes et sanz liz,
N'a si povre juqu'a Sanliz.
Sire, si ne sai quel part aille.
Mes costeiz connoit le pailliz,
Et liz de paille n'est pas liz,
Et en mon lit n'a fors la paille.

IV
Sire, je vos fais a savoir,
Je n'ai de quoi do pain avoir.
A Paris sui entre touz biens,
Et si n'i a nul qui soit miens.
Pou i voi et si i preig pou;

Il m'i souvient plus de saint Pou
Qu'il ne fait de nul autre apotre.
Bien sai Pater, ne sai qu'est notre,
Que li chiers tenz m'a tot ostei,
Qu'il m'a si vuidié mon hostei
Que li credo m'est deveeiz,
Et je n'ai plus que vos veeiz.
Explicit.
 

Ci encoumence la nouvele complainte d'outremer 

Pour l'anui et por le damage
Que je voi en l'umain linage
M'estuet mon pencei descovrir.
En sospirant m'estuet ovrir
La bouche por mon vouloir dire,
Com hom corrouciez et plains d'ire.
Quant je pens a la sainte Terre
Que picheour doivent requerre
Ainz qu'il aient pascei jonesce,
Et jes voi entreir en viellesce
Et puis aleir de vie a mort,
Et pou en voi qui s'en amort
A empanrre la sainte voie
Ne faire par quoi Diex les voie,
S'en sui iriez par charitei;
Car sains Poulz dist par veritei:
"Tuit sons uns cors en Jhesucrit",
Dont je vos monstre par l'Escrit
Que li uns est membres de l'autre;
Et nos sons ausi com li viautre
Qui se combatent por un os!
Plus en deïsse, mais je n'oz.

Vos qui aveiz sans et savoir,
Entendre vos fais et savoir
Que de Dieu sunt bien averies
Les paroles des prophecies:
En crois morut por noz meffais
Que nos et autres avons fais;
Ne morra plus, ce est la voire:
Or poons sor noz piauz acroire.

Voirs est que David nos recorde:
Diex est plains de misericorde,
Mais veiz ci trop grant restrainture:

Il est juges plains de droiture.

Il est juges fors et poissans
Et sages et bien connoissans:
Juges que on ne puet plaissier
Ne hom ne puet sa cort laissier;
Fors, si fors fox est qui c'esforce
A ce que il vainque sa force;
Poissans, que riens ne li eschape:
Por quoi? Qu'il at tot soz sa chape;
Sages, c'on nou puet desovoir,
Se puet chacuns aparsovoir;
Connoissans, qu'il connoist la choze
Avant que li hons la propoze.
Qui doit aleir devant teil juge
Sens troveir recet ne refuge,
C'il at tort, paour doit avoir
C'il a en lui sans ne savoir.
Prince, baron, tournoieour
Et vos autre sejorneour
Qui teneiz a aise le cors,
Quant l'arme sera mise fors
Queil part porra ele osteil prendre?
Savriiez le me vos aprendre?
Je ne le sai pas; Diex le sache!
Mais trop me plaing de votre outrage
Quant vos ne penceiz a la fin
Et au pelerinage fin
Qui l'arme pecherresse afine
Si qu'a Dieu la rent pure et fine.
Prince, premier, qui ne saveiz
Combien de terme vos aveiz
A vivre en ceste morteil vie,
Que n'aveiz vos de l'autre envie,
Qui cens fin est por joie faire?
Que n'entendeiz a votre afaire
Tant com de vie aveiz espace?
N'atendeiz pas que la mors face
De l'arme et dou cors desevrance;
Ci avroit trop dure atendance,
Car li termes vient durement
Que Dieux tanrra son jugement.
Quant li plus juste d'Adam nei
Avront paour d'estre dampnei,
Ange et archange trembleront,
Les laces armes que feront?
Queil part ce porront elz repondre
Qu'a Dieu nes estuisse respondre,
Quant il at le monde en sa main
Et nos n'avons point de demain?
Rois de France, rois d'Aingleterre,
Qu'en jonesce deveiz conquerre
L'oneur dou cors, le preu de l'ame
Ains que li cors soit soz la lame,
Sans espairgnier cors et avoir,
S'or voleiz paradix avoir,
Si secoreiz la Terre sainte
Qui est perdue a seste empainte,
Qui n'a pas un an de recours
S'en l'an meïmes n'a secours
Et c'ele est a voz tens perdue,
A cui tens ert ele rendue?
Rois de Sezile, par la grace
De Dieu qui nos dona espace
De conquerre Puille et Cezille,

Remembre vos de l'Ewangile
Qui dist qui ne lait peire et meire,
Fame et enfans et suer et freire,
Possessions et manandie,
Qu'il n'a pas avec li partie.
Baron, qu'aveiz vos enpancei?
Seront ja mais par vos tensei
Cil d'Acre qui sunt en balance
Et de secorre en esperance?
Cuens de Flandres, dus de Bergoingne,
Cuens de Nevers, con grant vergoingne
De perdre la Terre absolue
Qui a voz tens nos iert tolue!
Et vos autre baron encemble,
Qu'en dites vos que il vos cemble.
Saveiz vos honte si aperte
Com de soffrir si laide perde?
Tournoiëur, vos qui aleiz
En yver, et vos enjaleiz,
Querre places a tournoier,

Vos ne poeiz mieux foloier.

Vos despandeiz, et sens raison,

Votre tens et votre saison
Et le votre et l'autrui en tasche.
Le noiel laissiez por l'escrache,
Et paradix por vainne gloire.
Avoir deüssiez en memoire
Monseigneur Joffroi de Sergines,
Qui fu tant boens et fu tant dignes
Qu'en paradix est coroneiz
Com sages et bien ordeneiz,
Et le conte Huede de Nevers,
Dont hom ne puet chanson ne vers
Dire se boen non, et loiaul
Et bien loei en court roiaul.
A ceux deüssiez panrre essample
Et Acres secorre et le Temple.
Jone escuier au poil volage,
Trop me plaing de votre folage,
Qu'a nul bien faire n'entendeiz
Ne de rien ne vous amendeiz;
Si fustes filz a mains preudoume
(Teiz com jes vi je les vos nome)
Et vos estes muzart et nice,
Que n'entendeiz a votre office.
De veoir preudoume aveiz honte.

Vostre esprevier sunt trop plus donte
Que vos n'iestes, c'est veriteiz;
Car teil i a, quant le geteiz,
Seur le poing aporte l'aloe.
Honiz soit qui de vos de loe:
Se n'est Diex ne vostre paÿs.
Li plus sages est foux naÿx.
Quant vos deveiz aucun bien faire
Qu'a aucun bien vos doie traire,
Si le faites tout autrement,
Car vos toleiz vilainnement
Povres puceles lor honeurs.
Quant ne pueent avoir seigneurs,
Lors si deviennent dou grant nombre:
C'est uns pechiez qui vos encombre.

Voz povres voizins sozmarchiez:
Ausi bien aleiz as marchiez

Vendre voz bleiz et votre aumaille
Com cele autre povre pietaille.
Toute gentilesce effaciez.

Il ne vous chaut que vous faciez
Tant que viellesce vos efface,
Que ridee vos est la face,
Que vos iestes viel et chenu.
Por ce que vos serié tenu
A Gilemeir dou parentei,
Non pas par vostre volentei,
S'estes chevalier leiz la couche
Que vous douteiz un poi reproche.
Mais se vous amissiez honeur
Et doutissiez la deshonneur
Et amissiez votre lignage,

Vous fussiez et proudome et sage.
Quant vostre tenz aveiz vescu
Qu'ainz paiens ne vit votre escu,
Que deveiz demandeir Celui
Qui sacrefice fist de lui?
Je ne sais quoi, se Diex me voie,
Quant vos ne teneiz droite voie.
Prelat, clerc, chevalier, borjois,
Qui trois semainnes por un mois
Laissiez aleir a votre guise
Sens servir Dieu et sainte Eglise,
Dites, saveiz vos en queil livre
Hom trueve combien hon doit vivre?
Je ne sai, je nou puis troveir.
Mais je vos puis par droit proveir
Que, quant li hons commence a nestre,
En cest siecle a il pou a estre
Ne ne seit quant partir en doit.
La riens qui plus certainne soit
Si est que mors nos corra seure.
La mains certainne si est l'eure.
Prelat auz palefrois norrois,
Qui bien saveiz ke li vos Rois,
Li Filz Dieu, fu en la crois mis
Por confondre ces anemis,

Vos sermoneiz aus gens menues
Et aus povres vielles chenues
Qu'elz soient plainnes d'astinence:
Maugrei eulz font eles penance,
Qu'eles ont sanz pain assé painne
Et si n'ont pas la pance plainne.
N'aiez paour: je ne di pas
Que vous meveiz ineslepas
Por la Sainte Terre deffendre;
Mais vos poeiz entor vos prendre
Asseiz de povres gentilz homes
Qui ne mainnent soumiers ne soumes,
Qui doient et n'ont de qu'il paient
Et lor enfant de fain s'esmaient:
A cex doneiz de votre avoir,
Dont par tenz porreiz pou avoir,
Ces envoiez outre la meir
Et vos faites a Dieu ameir.
Montreiz par bouche et par example
Que vous ameiz Dieu et le Temple.
Clerc aaise et bien sejournei,
Bien vestu et bien conraei
Dou patrimoinne au Crucefi,
Je vos promet et vos afi,
Se voz failliez Dieu orendroit,
Qu'il vos faudra au fort endroit.

Vos sereiz forjugié en court,
Ou la riegle faut qui or court:
"Por ce te fais que tu me faces,
Non pas por ce que tu me haces".
Diex vos fait bien; faites li dont
De cors, de cuer et d'arme don,
Si fereiz que preu et que sage.
Or me dites queil aventage

Vos puet faire votres trezors
Quant l'arme iert partie dou cors?
Li executeur le retiennent
Juqu'a tant qu'a lor fin reviennent,
Chacuns son eage a son tour:
C'est maniere d'executour.
Ou il avient par macheance
Qu'il en donent por reparlance

Vint paire de solers ou trente:
Or est sauve l'arme dolante!
Chevaliers de plaiz et d'axises
Qui par vos faites vos justices,
Sens jugement aucunes fois,
Tot i soit sairemens ou foiz,
Cuidiez vos toz jors einsi faire?
A un chief vos covient il traire.
Quant la teste est bien avinee,
Au feu deleiz la cheminee,
Si vos croiziez sens sermoneir;
Donc verriez granz coulz doneir
Seur le sozdant et seur sa gent:
Forment les aleiz damagent.
Quant vos vos leveiz au matin
S'aveiz changié votre latin,
Que gari sunt tuit li blecié
Et li abatu redrecié.
Li un vont au lievre chacier,
Et li autre vont porchacier
C'il panront un mallart ou deux,
Car de combatre n'est pas geux.
Par vos faites voz jugemens,
Qui sera votres dampnemens
Se li jugemens n'est loiaus,
Boens et honestes et feaus.
Qui plus vos done, si at droit.
Ce faites que Diex ne voudroit.
Ainsi defineiz votre vie,
Et lors que li cors se devie,
Si trueve l'arme tant a faire
Que je ne porroie retraire.
Car Diex vos rent la faucetei
Par jugement; car achatei
Aveiz enfer et vos l'aveiz.
Car ceste choze bien saveiz:
Diex rent de tout le guerredon,
Soit biens, soit maux: il en a don.
Riche borjois d'autrui sustance,
Qui faites Dieu de votre pance,
Li povre Dieu chiez vos s'aünent,
Qui de fain muerent et geünent,
Por atendre votre gragan
Dont il n'ont pas a grant lagan;
Et vos entendeiz au mestier
Qui aux armes n'eüst mestier.

Vos saveiz que morir couvient,
Mais je ne sai c'il vos souvient
Que l'uevre ensuit l'ome et la fame.
C'il at bien fait, bien en a l'arme,
Et nos trovons bien en Escrit:
"Tout va, fors l'amour Jhesucrit".
Mais de ce n'aveiz vos que faire;

Vos entendeiz a autre afaire:
Je sai toute votre atendue.
Dou bleif ameiz la grant vendue,
Et chier vendre de si au tans
Seur lettre ou seur plege ou seur nans,

Vil acheteir et vendre chier
Et uzereir et gent trichier
Et faire d'un deable deus,
Por ce que enfers est trop seux.
Juqu'a la mort ne faut la guerre.
Et quant li cors est mis en terre
Et hon est a l'osteil venuz,
Ja puis n'en iert contes tenuz.
Quant li enfant sunt lor seigneur,

Veiz ci conquest a grant honeur:
Au bordel ou en la taverne
Qui plus tost puet plus c'i governe.
Cil qui lor doit si lor demande;
Paier covient ce c'om commande.
Teiz marchiez font com vous eüstes
Quant en votre autoritei fustes.
Chacuns en prent, chacuns en oste;
En osteiz pluet, s'en vont li oste;
Les terres demeurent en friche,
S'en sunt li home estrange riche.
Cil qui lor doit paier nes daingne,
Ansois couvient que hon en daingne
L'une moitié por l'autre avoir.

Veiz ci la fin de votre avoir.
La fin de l'arme est tote aperte:
Bien est qui li rant sa deserte.
Maistre d'outre meir et de France
Dou Temple par la Dieu poissance,
Frere Guillaume de Biaugeu,
Or poeiz veioir le biau geu
De quoi li siecles seit servir.

Il n'ont cure de Dieu servir
Por conquerre saint paradis,
Com li preudome de jadiz,
Godefroiz Buemos et Tancreiz.
Ja n'iert lor ancres aencreiz
En meir por lor neis rafreschir:
De ce ce welent il franchir.
Ha! bone gent, Diex vos sequeure,
Que de la mort ne saveiz l'eure!
Recoumanciez novele estoire,
Car Jhesucrit, li Rois de gloire,

Vos wet avoir, et maugré votre.
Sovaingne vos que li apostre
N'orent pas paradix por pou.
Or vos remembre de saint Pou
Qui por Deu ot copei la teste:
Por noiant n'en fait hon pas feste.
Et si saveiz bien que sainz Peires
Et sainz Andreuz, qui fu ces freres,
Furent por Dieu en la croix mis.
Por ce fu Dieux lor boens amis,
Et li autre saint ausiment.
Que vos iroie je plus rimant?
Nuns n'a en paradix c'il n'a painne:
Por c'est cil sages qui s'an painne.
Or prions au Roi glorieux
Et a son chier Fil precieux
Et au saint Esperit ensemble,
En cui toute bonteiz s'asemble,
Et a la precieuze Dame
Qui est saluz de cors et d'arme,
A touz sainz et a toutes saintes
Qui por Dieu orent painnes maintes,
Qu'il nos otroit sa joie fine!
Rutebués son sarmon define.
Explicit.
 




Source: http://www.poesies.net