Le Premier Livre Des Sonnets Pour Hélène. (1578) Par Pierre De Ronsard (1524-1585). TABLE DES MATIERES I Ce premier jour de May, Helene, je vous jure... II Quand à longs traits je boy l'amoureuse estincelle... III Ma douce Helene, non, mais bien ma douce haleine... IV Tout ce qui est de sainct, d'honneur et de vertu... V Helene sceut charmer avecque son Nepenthe... VI Dedans les flots d'Amour je n'ay point de support... VII Quand je devise assis aupres de vous... VIII Amour abandonnant les vergers de Cytheres... IX Tu ne dois en ton coeur superbe devenir... X L'autre jour que j'estois sur le haut d'un degré... XI Ce siecle, où tu nasquis, ne te cognoist, Heleine... XII Le Soleil l'autre jour se mit entre nous deux... XIII Deux Venus en Avril (puissante Deité)... XIV Soit que je sois hay de toy, ma Pasithee... XV Trois ans sont ja passez que ton oeil me tient pris... XVI De voz yeux tout-divins, dont un Dieu se paistroit... XVII Te regardant assise aupres de ta cousine... XVIII De toy ma belle Grecque, ainçois belle Espagnole... XIX Je fuy les pas frayez du meschant populaire... XX Chef, escole des arts, le sejour de science... XXI Si j'estois seulement en vostre bonne grace... XXII De vos yeux, le mirouer du Ciel et de Nature... XXIII L'arbre qui met à croistre, a la plante asseuree... XXIV Ostez vostre beauté, ostez votre jeunesse... XXV De vostre belle, vive, angelique lumiere... XXVI Nous promenant tous seuls, vous me dites, Maistresse... XXVII Cent et cent fois le jour l'Orange je rebaise... XXVIII Tousjours pour mon sujet il faut que je vous aye... XXIX Vous me distes, Maistresse, estant à la fenestre... XXX Voicy le mois d'Avril, où nasquit la merveille... XXXI D'autre torche mon coeur ne pouvoit s'allumer... XXXII Agathe, où du Soleil le signe est imprimé... XXXIII Puis que tu sçais, helas ! qu'affamé je me pais... XXXIV Cest amoureux desdain, ce Nenny gracieux... XXXV J'avois, en regardant tes beaux yeux, enduré... XXXVI Comme une belle fleur assise entre les fleurs... XXXVII Doux desdains, douce amour d'artifice cachee... XXXVIII Pour voir d'autres beautez mon desir ne s'appaise... XXXIX Coche cent fois heureux, où ma belle Maistresse... XL Ton extreme beauté par ses rais me retarde... XLI D'un solitaire pas je ne marche en nul lieu... XLII Bien que l'esprit humain s'enfle par la doctrine... XLIII En choisissant l'esprit vous estes mal-apprise... XLIV Amour a tellement ses fleches enfermees... XLV Dessus l'autel d'Amour planté sur vostre table... XLVI J'errois à la volee, et sans respect des lois... XLVII Maistresse, quand je pense aux traverses d'Amour... XLVIII Bienheureux fut le jour, où mon ame sujette... XLIX Plus estroit que la Vigne à l'Ormeau se marie... L Helas ! voicy le jour que mon maistre on enterre... LI Je sens de veine en veine une chaleur nouvelle... LII Si c'est aimer, Madame, et de jour et de nuict... LIII Amour est sans milieu, c'est une chose extrême... LIV Ma fievre croist tousjours, la vostre diminue... LV Je sens une douceur à conter impossible... LVI Ne romps point au mestier par le milieu la trame... LVII J'attachay des bouquets de cent mille couleurs... LVIII Madame se levoit un beau matin d'Esté... LIX Je ne veux point la mort de celle qui arrête... LX Si j'ay bien ou mal dit en ces Sonets, Madame... I Ce premier jour de May, Helene, je vous jure... Ce premier jour de May, Helene, je vous jure Par Castor, par Pollux, voz deux freres jumeaux, Par la vigne enlassee à l'entour des ormeaux, Par les prez, par les bois herissez de verdure, Par le Printemps sacré, fils aisné de Nature, Par le sablon qui roule au giron des ruisseaux, Par tous les rossignols, merveille des oiseaux, Qu'autre part je ne veux chercher autre avanture. Vous seule me plaisez: j'ay par election, Et non à la volée, aimé vostre jeunesse: Aussi je prens en gré toute ma passion. Je suis de ma fortune autheur, je le confesse: La vertu m'a conduit en telle affection: Si la vertu me trompe, adieu belle Maistresse. II Quand à longs traits je boy l'amoureuse estincelle... Quand à longs traits je boy l'amoureuse estincelle Qui sort de tes beaux yeux, les miens sont esblouys: D'esprit ny de raison, troublé, je ne jouys, Et comme yvre d'amour, tout le corps me chancelle. Le coeur me bat au sein: ma chaleur naturelle Se refroidit de peur: mes sens esvanouys Se perdent dedans l'air, tant tu te resjouys D'acquerir par ma mort le surnom de cruelle. Tes regards foudroyans me percent de leurs rais Tout le corps, tout le coeur, comme poinctes de trais Que je sens dedans l'ame: et quand je me veux plaindre, Ou demander mercy du mal que je reçois, Si bien ta cruauté me reserre la vois, Que je n'ose parler, tant tes yeux me font craindre. III Ma douce Helene, non, mais bien ma douce haleine... Ma douce Helene, non, mais bien ma douce haleine, Qui froide rafraischis la chaleur de mon coeur, Je prens de ta vertu cognoissance et vigueur, Et ton oeil, comme il veut, à son plaisir me meine. Heureux celuy qui souffre une amoureuse peine Pour un nom si fatal: heureuse la douleur, Bien-heureux le torment, qui vient pour la valeur Des yeux, non pas des yeux, mais des flames d'Helene. Nom, malheur des Troyens, sujet de mon souci, Ma sage Penelope, et mon Helene aussi, Qui d'un soin amoureux tout le coeur m'envelope: Nom, qui m'a jusqu'au ciel de la terre enlevé, Qui eust jamais pensé que j'eusse retrouvé En une mesme Helene une autre Penelope? IV Tout ce qui est de sainct, d'honneur et de vertu... Tout ce qui est de sainct, d'honneur et de vertu, Tout le bien qu'aux mortels la Nature peut faire, Tout ce que l'artifice icy peut contrefaire. Ma maistresse, en naissant, dans l'esprit l'avoit eu. Du juste et de l'honneste à l'envy debatu Aux escoles des Grecs: de ce qui peut attraire A l'amour du vray bien, à fuyr le contraire, Ainsi que d'un habit son corps fut revestu. La chasteté, qui est des beautez ennemie (Comme l'or fait la Perle) honore son Printemps, Un respect de l'honneur, une peur d'infamie, Un oeil qui fait les Dieux et les hommes contens. La voyant si parfaite, il faut que je m'escrie, Bien-heureux qui l'adore, et qui vit de son temps! V Helene sceut charmer avecque son Nepenthe... Helene sceut charmer avecque son Nepenthe Les pleurs de Telemaque. Helene, je voudroy Que tu peusses charmer les maux que je reçoy Depuis deux ans passez, sans que je m'en repente. Naisse de noz amours une nouvelle plante, Qui retienne noz noms pour eternelle foy, Qu'obligé je me suis de servitude à toy, Et qu'à nostre contract la terre soit presente. O terre, de noz oz en ton sein chaleureux Naisse une herbe au Printemps propice aux amoureux, Qui sur noz tombeaux croisse en un lieu solitaire. O desir fantastiq, duquel je me deçoy, Mon souhait n'adviendra, puis qu'en vivant je voy Que mon amour me trompe, et qu'il n'a point de frere. VI Dedans les flots d'Amour je n'ay point de support... Dedans les flots d'Amour je n'ay point de support: Je ne voy point de Phare, et si je ne desire (O desir trop hardy!) sinon que ma Navire Apres tant de perils puisse gaigner le port. Las! devant que payer mes voeuz dessus le bort, Naufrage je mourray: car je ne voy reluire Qu'une flame sur moy, qu'une Helene qui tire Entre mille rochers ma Navire à la mort. Je suis seul, me noyant, de ma vie homicide, Choisissant un enfant, un aveugle pour guide, Dont il me faut de honte et pleurer et rougir. Je ne crains point la mort: mon coeur n'est point si lasche: Je suis trop genereux: seulement je me fasche De voir un si beau port, et n'y pouvoir surgir. VII Quand je devise assis aupres de vous... Quand je devise assis aupres de vous, Tout le coeur me tressaut. Je tremble tout de nerfs et de genous, Et le pouls me defaut. Je n'ay ny sang ny esprit ny haleine, Qui ne se trouble en voyant mon Heleine, Ma chere et douce peine. Je devien fol; je perds toute raison: Cognoistre je ne puis Si je suis libre, ou captif en prison: Plus en moy je ne suis. En vous voyant, mon oeil perd cognoissance: Le vostre altere et change mon essence, Tant il a de puissance. Vostre beauté me fait en mesme temps Souffrir cent passions: Et toutesfois tous mes sens sont contents, Divers d'affections. L'oeil vous regarde, et d'autre part l'oreille Oyt vostre voix, qui n'a point de pareille, Du monde la merveille. Voyla comment vous m'avez enchanté, Heureux de mon malheur: De mon travail je me sens contenté, Tant j'aime ma douleur: Et veux tousjours que le torment me tienne, Et que de vous tousjours il me souvienne, Vous donnant l'ame mienne. Donc ne cherchez de parler au Devin, Qui sçavez tout charmer: Vous seule auriez un esprit tout divin, Si vous pouviez aimer. Que pleust à Dieu, ma moitié bien-aimee, Qu'Amour vous eust d'une fleche enflamee Autant que moy charmee. En se jouant il m'a de part en part Le coeur outrepercé: A vous s'amie il n'a monstré le dart Duquel il m'a blessé. De telle mort heureux je me confesse, Et ne veux point que le soucy me laisse Pour vous, belle Maistresse. Dessus ma tombe escrivez mon soucy En lettres grossement: Le Vendomois, lequel repose icy, Mourut en bien aimant. Comme Pâris, là bas faut que je voise, Non pour l'amour d'une Helene Gregeoise, Mais d'une Saintogeoise. VIII Amour abandonnant les vergers de Cytheres... Amour abandonnant les vergers de Cytheres, D'Amathonte et d'Eryce, en la France passa: Et me monstrant son arc, comme Dieu, me tança, Que j'oubliois, ingrat, ses loix et ses mysteres. Il me frappa trois fois de ses ailes legeres: Un traict le plus aigu dans les yeux m'eslança. La playe vint au coeur, qui chaude me laissa Une ardeur de chanter les honneurs de Surgeres. Chante (me dist Amour) sa grace et sa beauté, Sa bouche, ses beaux yeux, sa douceur, sa bonté: Je la garde pour toy le sujet de ta plume. — Un sujet si divin ma Muse ne poursuit. Je te feray l'esprit meilleur que de coustume: » L'homme ne peut faillir, quand un Dieu le conduit. IX Tu ne dois en ton coeur superbe devenir... Tu ne dois en ton coeur superbe devenir Pour me tenir captif: cela vient de Fortune. A tout homme mortel la misere est commune: Tel eschappe souvent, qu'on pense bien tenir. Tousjours de Nemesis il te faut souvenir, Qui fait nostre avanture ore blanche, ore brune. Aux Tygres, aux Lions est propre la rancune: Comme ton serf conquis tu me dois maintenir. Les Guerres et l'Amour sont une mesme chose, Où le veincu souvent le veinqueur a batu, Qui honteux de son mal fuyoit à bouche close. Soit que je sois captif sans force ny vertu, Un superbe trophée au coeur je me propose, D'avoir contre tes yeux si long temps combatu. X L'autre jour que j'estois sur le haut d'un degré... L'autre jour que j'estois sur le haut d'un degré, Passant tu m'advisas, et me tournant la veuë, Tu m'esblouys les yeux, tant j'avois l'ame esmeuë De me voir en sursaut de tes yeux rencontré. Ton regard dans le coeur, dans le sang m'est entré Comme un esclat de foudre alors qu'il fend la nue: J'euz de froid et de chaut la fiévre continue, D'un si poignant regard mortellement outré. Et si ta belle main passant ne m'eust fait signe, Main blanche, qui se vante estre fille d'un Cygne, Je fusse mort, Helene, aux rayons de tes yeux: Mais ton signe retint l'ame presque ravie, Ton oeil se contenta d'estre victorieux, Ta main se resjouyt de me donner la vie. XI Ce siecle, où tu nasquis, ne te cognoist, Heleine... Ce siecle, où tu nasquis, ne te cognoist, Heleine. S'il sçavoit tes vertus, tu aurois en la main Un sceptre à commander dessus le genre humain, Et de ta majesté la terre seroit pleine. Mais luy tout embourbé d'avarice vilaine, Qui met comme ignorant les vertus à desdain, Ne te cognut jamais: je te cognu soudain A ta voix, qui n'estoit d'une personne humaine. Ton esprit, en parlant, à moy se descouvrit, Et ce-pendant Amour l'entendement m'ouvrit Pour te faire à mes yeux un miracle apparoistre. Je tien, je le sens bien, de la divinité, Puis que seul j'ay cognu que peut ta Deité, Et qu'un autre avant moy ne l'avoit peu cognoistre. XII Le Soleil l'autre jour se mit entre nous deux... Le Soleil l'autre jour se mit entre nous deux, Ardent de regarder tes yeux par la verriere: Mais luy, comme esblouy de ta vive lumiere, Ne pouvant la souffrir, s'en-alla tout honteux. Je te regarday ferme, et devins glorieux D'avoir veincu ce Dieu qui se tournoit arriere, Quand regardant vers moy tu me dis, ma guerriere, Ce Soleil est fascheux, je t'aime beaucoup mieux. Une joye en mon coeur incroyable s'en-volle Pour ma victoire acquise, et pour telle parolle: Mais longuement cest aise en moy ne trouva lieu. Arrivant un mortel de plus fresche jeunesse (Sans esgard que j'avois triomphé d'un grand Dieu) Tu me laissas tout seul pour luy faire caresse XIII Deux Venus en Avril... Deux Venus en Avril (puissante Deité) Nasquirent, l'une en Cypre, et l'autre en la Saintonge: La Venus Cyprienne est des Grecs la mensonge, La chaste Saintogeoise est une verité. L'Avril se resjouyst de telle nouveauté, Et moy qui jour et nuict d'autre Dame ne songe, Qui le fil amoureux de mon destin allonge, Ou l'accourcist, ainsi qu'il plaist à sa beauté, Je suis trois fois un Dieu, d'estre nay de son âge. Si tost que je la vy, je fus mis en servage De ses yeux, que j'estime un sujet plus qu'humain. Ma Raison, sans combattre, abandonna la place, Et mon coeur se vid pris comme un poisson à l'hain: Si j'ay failly, ma faute est bien digne de grace. XIV Soit que je sois hay de toy, ma Pasithee... Soit que je sois hay de toy, ma Pasithee, Soit que j'en sois aimé, je veux suivre mon cours: J'ay joué comme aux detz mon coeur et mes amours: Arrive bien ou mal, la chance en est jettee. Si mon ame de glace et de feu tormentee Peut deviner son mal, je voy que sans secours, Passionné d'amour, je doy finir mes jours, Et que devant mon soir se clorra ma nuictee. Je suis du camp d'Amour pratique Chevalier: Pour avoir trop souffert, le mal m'est familier: Comme un habillement j'ay vestu le martire. Donques je te desfie, et toute ta rigueur: Tu m'as desja tué, tu ne sçaurois m'occire Pour la seconde fois: car je n'ay plus de coeur. XV Trois ans sont ja passez que ton oeil me tient pris... Trois ans sont ja passez que ton oeil me tient pris. Je ne suis pas marry de me voir en servage: Seulement je me deuls des ailes de mon âge, Qui me laissent le chef semé de cheveux gris. Si tu me vois ou palle, ou de fiévre surpris, Quelquefois solitaire, ou triste de visage, Tu ne dois imputer ta faute à mon dommage: L'Aurore ne met point son Thiton à mespris. Si tu es de mon mal seule cause premiere, Il faut que de mon mal tu sentes les effects: C'est une sympathie aux hommes coustumiere. Je suis (j'en jure Amour) tout tel que tu me fais: Tu es mon coeur, mon sang, ma vie et ma lumiere: Seule je te choisy, seule aussi tu me plais. XVI De voz yeux tout-divins, dont un Dieu se paistroit... De voz yeux tout-divins, dont un Dieu se paistroit, (Si un Dieu se paissoit de quelque chose en terre) Je me paissois hier, et Amour qui m'enferre, Ce-pendant sur mon coeur ses fleches racoustroit. Mon oeil dedans le vostre esbahy rencontroit Cent beautez, qui me font une si douce guerre, Et la mesme vertu, qui toute se reserre En vous, d'aller au Ciel le chemin me monstroit. Je n'avois ny esprit ny penser ny oreille, Qui ne fussent ravis de crainte et de merveille, Tant d'aise transportez mes sens estoient contens. J'estois Dieu, si mon oeil vous eust veu davantage: Mais le soir qui survint, cacha vostre visage, Jaloux que les mortels le vissent si long temps. XVII Te regardant assise aupres de ta cousine... Te regardant assise aupres de ta cousine, Belle comme une Aurore, et toy comme un Soleil, Je pensay voir deux fleurs d'un mesme teint pareil, Croissantes en beauté sur la rive voisine, La chaste, saincte, belle et unique Angevine, Viste comme un esclair, sur moy jetta son oeil: Toy comme paresseuse, et pleine de sommeil, D'un seul petit regard tu ne m'estimas digne. Tu t'entretenois seule au visage abaissé, Pensive tout à toy, n'aimant rien que toymesme, Desdaignant un chascun d'un sourcil ramassé, Comme une qui ne veut qu'on la cherche ou qu'on l'aime J'euz peur de ton silence, et m'en-allay tout blesme, Craignant que mon salut n'eust ton oeil offensé. XVIII De toy ma belle Grecque, ainçois belle Espagnole... De toy ma belle Grecque, ainçois belle Espagnole, Qui tires tes ayeuls du sang Iberien, Je suis tant serviteur, qu'icy je ne voy rien Qui me plaise, sinon tes yeux et ta parole. Comme un mirouer ardent, ton visage m'affole. Me perçant de ses raiz, et tant je sens de bien En t'oyant deviser, que je ne suis plus mien, Et mon ame fuitive à la tienne s'en-vole. Puis contemplant ton oeil du mien victorieux, Je voy tant de vertuz, que je n'en sçay le conte, Esparses sur ton front comme estoilles aux Cieux. Je voudrois estre Argus; mais je rougis de honte Pour voir tant de beautez, que je n'ay que deux yeux, Et que tousjours le fort le plus foible surmonte. XIX Je fuy les pas frayez du meschant populaire... Je fuy les pas frayez du meschant populaire, Et les villes où sont les peuples amassez: Les rochers, les forests desja sçavent assez Quelle trampe a ma vie estrange et solitaire. Si ne suis-je si seul, qu'Amour mon secretaire N'accompagne mes pieds debiles et cassez: Qu'il ne conte mes maux et presens et passez A ceste voix sans corps, qui rien ne sçauroit taire. Souvent plein de discours, pour flatter mon esmoy, Je m'arreste, et je dy: Se pourroit-il bien faire Qu'elle pensast, parlast, ou se souvint de moy? Qu'à sa pitié mon mal commençast à desplaire? Encor que je me trompe, abusé du contraire, Pour me faire plaisir, Helene, je le croy. XX Chef, escole des arts, le sejour de science... Chef, escole des arts, le sejour de science, Où vit un intellect, qui foy du Ciel nous fait, Une heureuse memoire, un jugement parfait, D'où Pallas reprendroit sa seconde naissance: Chef, le logis d'honneur, de vertu, de prudence, Ennemy capital du vice contrefait: Chef, petit Univers, qui monstres par effait Que tu as du grand Tout parfaite cognoissance: Et toy divin esprit, qui du Ciel es venu, En ce chef comme au Ciel sainctement retenu, Simple, sans passions, comme icy bas nous sommes, Mais tout prompt et subtil, tout rond et tout en toy, Puis que tu es divin, ayes pitié de moy: Il appartient aux Dieux d'avoir pitié des hommes. XXI Si j'estois seulement en vostre bonne grace... Si j'estois seulement en vostre bonne grace Par l'erre d'un baiser doucement amoureux, Mon coeur au departir ne seroit langoureux, En espoir d'eschauffer quelque jour voste glace. Si j'avois le portrait de vostre belle face, Las! je demande trop! ou bien de vos cheveux, Content de mon malheur je serois bienheureux, Et ne voudrois changer aux celestes de place. Mais je n'ay rien de vous que je puisse emporter, Qui soit cher à mes yeux pour me reconforter, Ne qui me touche au coeur d'une douce memoire. Vous dites que l'Amour entretient ses accords Par l'esprit seulement: hé! je ne le puis croire: Car l'esprit ne sent rien que par l'ayde du corps. XXII De vos yeux, le mirouer du Ciel et de Nature... De vos yeux, le mirouer du Ciel et de Nature, La retraite d'Amour, la forge de ses dards, D'où pleut une douceur, que versent voz regards Au coeur, quand un rayon y survient d'aventure, Je tire pour ma vie une douce pasture, Une joye, un plaisir, que les plus grands Cesars Au milieu du triomphe, entre un camp de soudars, Ne sentirent jamais: mais courte elle me dure. Je la sens distiller goutte à goute en mon coeur, Pure, saincte, parfaite, angelique liqueur, Qui m'eschaufe le sang d'une chaleur extrême. Mon ame la reçoit avec un tel plaisir, Que tout esvanouy, je n'ay pas le loisir Ny de gouster mon bien, ny penser à moymesme. XXIII L'arbre qui met à croistre, a la plante asseuree... L'arbre qui met à croistre, a la plante asseuree: Celuy qui croist bien tost, ne dure pas long temps: Il n'endure des vents les souflets inconstans. Ainsi l'amour tardive est de longue duree. Ma foy du premier jour ne vous fut pas donnee: L'Amour et la Raison, comme deux combatans, Se sont escarmouchez l'espace de quatre ans: A la fin j'ay perdu, veincu par destinee. Il estoit destiné par sentence des cieux, Que je devois servir, mais adorer voz yeux: J'ay, comme les Geans, au ciel fait resistance Aussi je suis comme eux maintenant foudroyé, Pour resister au bien qu'ils m'avoient ottroyé, Je meurs, et si ma mort m'est trop de recompense. XXIV Ostez vostre beauté, ostez votre jeunesse... Ostez vostre beauté, ostez votre jeunesse, Ostez ces rares dons que vous tenez des cieux, Ostez ce bel esprit, ostez moy ces beaux yeux, Cest aller, ce parler digne d'une Deesse: Je ne vous seray plus d'une importune presse Fascheux comme je suis: voz dons si precieux Me font, en les voyant, devenir furieux, Et par le desespoir l'ame prend hardiesse. Pource si quelquefois je vous touche la main, Par courroux vostre teint n'en doit devenir blesme: Je suis fol, ma raison n'obeyt plus au frein, Tant je suis agité d'une fureur extrême. Ne prenez, s'il vous plaist, mon offence à desdain, Mais, douce, pardonnez mes fautes à vous-mesme. XXV De vostre belle, vive, angelique lumiere... De vostre belle, vive, angelique lumiere, Le beau logis d'Amour, de douceur, de rigueur, S'eslance un doux regard, qui me navrant le coeur, Desrobe loin de moy mon ame prisonniere. Je ne sçay ny moyen, remede ny maniere De sortir de voz rets, où je vis en langueur: Et si l'extreme ennuy traine plus en longueur, Vous aurez de ce corps la despouille derniere. Yeux qui m'avez blessé, yeux mon mal et mon bien, Guarissez vostre playe. Achille le peut bien. Vous estes tout-divins, il n'estoit que pur homme. Voyez, parlant à vous, comme le coeur me faut! Hélas! je ne me deuls du mal qui me consume: Le mal dont je me deuls, c'est qu'il ne vous en chaut. XXVI Nous promenant tous seuls, vous me dites, Maistresse... Nous promenant tous seuls, vous me dites, Maistresse, Qu'un chant vous desplaisoit, s'il estoit doucereux: Que vous aimiez les plaints des chetifs amoureux, Toute voix lamentable, et pleine de tristesse. Et pour (disiez vous) quand je suis loin de presse, Je choisis voz Sonets qui sont plus douloureux: Puis d'un chant qui est propre au sujet langoureux, Ma nature et Amour veulent que je me paisse. Vos propos sont trompeurs. Si vous aviez soucy De ceux qui ont un coeur larmoyant et transy, Je vous ferois pitié par une sympathie: Mais vostre oeil cauteleux, trop finement subtil, Pleure en chantant mes vers, comme le Crocodil, Pour mieux me desrober par feintise la vie. XXVII Cent et cent fois le jour l'Orange je rebaise... Cent et cent fois le jour l'Orange je rebaise, Et le palle Citron qui viennent de ta main, Doux present amoureux, que je loge en mon sein, Pour leur faire sentir combien je sens de braise. Quand ils sont demy-cuits, leur chaleur je r'appaise, Versant des pleurs dessus, dont triste je suis plein: Et de ta mauvaistié avec eux je me plain, Qui cruelle te ris de me voir à mal-aise. Oranges et Citrons sont symboles d'Amour: Ce sont signes muets; que je puis quelque jour T'arrester, comme fit Hippomene Atalante. Mais je ne le puis croire: Amour ne le veut pas, Qui m'attache du plomb pour retarder mes pas, Et te donne à fuyr des ailes à la plante. XXVIII Tousjours pour mon sujet il faut que je vous aye... Tousjours pour mon sujet il faut que je vous aye: Je meurs sans regarder voz deux Astres jumeaux, Voz yeux, mes deux Soleils, qui m'esclairent si beaux, Qu'à trouver autre jour autre part je n'essaye. Le chant du Rossignol m'est le chant d'une Orfraye, Roses me sont Chardons, de l'ancre les ruisseaux, La Vigne mariee à l'entour des Ormeaux, Et le Printemps sans vous m'est une dure playe. Mon plaisir en ce mois c'est de voir les Coloms S'emboucher bec à bec de baisers doux et longs, Dés l'aube jusqu'au soir que le Soleil se plonge. O bienheureux Pigeons, vray germe Cyprien, Vous avez par nature et par effect le bien Que je n'ose esperer tant seulement en songe. XXIX Vous me distes, Maistresse, estant à la fenestre... Vous me distes, Maistresse, estant à la fenestre, Regardant vers Mont-martre et les champs d'alentour: La solitaire vie, et le desert sejour Valent mieux que la Cour, je voudrois bien y estre. A l'heure mon esprit de mes sens seroit maistre, En jeusne et oraisons je passerois le jour: Je desfirois les traicts et les flames d'Amour: Ce cruel de mon sang ne pourroit se repaistre. Quand je vous repondy, Vous trompez de penser Qu'un feu ne soit pas feu, pour se couvrir de cendre: Sur les cloistres sacrez la flame on voit passer: Amour dans les deserts comme aux villes s'engendre. Contre un Dieu si puissant, qui les Dieux peut forcer, Jeusnes ny oraisons ne se peuvent defendre. XXX Voicy le mois d'Avril, où nasquit la merveille... Voicy le mois d'Avril, où nasquit la merveille, Qui fait en terre foy de la beauté des cieux, Le mirouer de vertu, le Soleil de mes yeux, Qui vit comme un Phenix au monde sans pareille. Les Oeillets et les Liz et la Rose vermeille Servirent de berceau: la Nature et les Dieux La regarderent naistre en ce mois gracieux: Puis Amour la nourrit des douceurs d'une Abeille. Les Muses, Apollon, et les Graces estoient Assises tout autour, qui à l'envy jettoient Des fleurs sur l'Anglette. Ah! ce mois me convie D'eslever un autel, et suppliant Amour Sanctifier d'Avril le neufiesme jour, Qui m'est cent fois plus cher que celuy de ma vie. XXXI D'autre torche mon coeur ne pouvoit s'allumer... D'autre torche mon coeur ne pouvoit s'allumer Sinon de tes beaux yeux, où l'amour me convie: J'avois desja passé le meilleur de ma vie, Tout franc de passion, fuyant le nom d'aimer. Je soulois maintenant ceste Dame estimer, Et maintenant cest'autre, où me portoit l'envie, Sans rendre ma franchise à quelqu'une asservie: Rusé je ne voulois dans les retz m'enfermer. Maintenant je suis pris, et si je prens à gloire D'avoir perdu le camp, frustré de la victoire: Ton oeil vaut un combat de dix ans d'Ilion. Amour, comme estant Dieu, n'aime pas les superbes. Sois douce à qui te prie, imitant le Lion: La foudre abat les monts, non les petites herbes. XXXII Agathe, où du Soleil le signe est imprimé... Agathe, où du Soleil le signe est imprimé (L'escrevisse marchant, comme il fait, en arriere), Cher present que je donne à toy chere guerriere, Mon don pour le Soleil est digne d'estre aimé. Le Soleil va tousjours de flames allumé, Je porte au coeur le feu de ta belle lumiere: Il est l'ame du monde, et ma force premiere. Depend de ta vertu, dont je suis animé. O douce, belle, vive, angelique Sereine, Ma toute Pasithee, essence sur-humaine, Merveille de nature, exemple sans pareil, D'honneur et de beauté l'ornement et le signe, Puis que rien icy bas de ta vertu n'est digne, Que te puis-je donner, sinon que le Soleil? XXXIII Puis que tu sçais, helas! qu'affamé je me pais... Puis que tu sçais, helas! qu'affamé je me pais Du regard de tes yeux, dont larron je retire Des rayons, pour nourrir ma douleur qui s'empire, Pourquoi me caches-tu l'oeil, par qui tu me plais? Tu es deux fois venue à Paris, et tu fais Semblant de n'y venir, afin que mon martire Ne s'allege, en voyant ton oeil que je desire, Ton oeil qui me nourrit par l'objet de ses rais. Tu vas bien à Hercueil avecque ta cousine Voir les prez, les jardins, et la source voisine De l'Antre, où j'ay chanté tant de divers accords. Tu devois m'appeler, oublieuse Maistresse: Dans ton coche porté je n'eusse fait grand presse: Car je ne suis plus rien qu'un fantaume sans corps. XXXIV Cest amoureux desdain, ce Nenny gracieux... Cest amoureux desdain, ce Nenny gracieux, Qui refusant mon bien, me reschaufent l'envie Par leur fiere douceur d'assujettir ma vie, Où sont desja sujets mes pensers et mes yeux, Me font transir le coeur, quand trop impetueux A baiser vostre main le desir me convie, Et vous, la retirant, feignez d'estre marrie, Et m'appelez, honteuse, amant presomptueux. Mais sur tout je me plains de voz douces menaces, De voz lettres qui sont toutes pleines d'audaces, De moymesme, d'Amour, de vous et de vostre art, Qui si doucement farde et sucre sa harangue, Qu'escrivant et parlant vous n'avez traict de langue, Qui ne me soit au coeur la poincte d'un poignart. XXXV J'avois, en regardant tes beaux yeux, enduré... J'avois, en regardant tes beaux yeux, enduré Tant de flames au coeur, qu'une aspre seicheresse Avoit cuitte ma langue en extreme destresse, Ayant de trop parler tout le corps alteré. Lors tu fis apporter en ton vase doré De l'eau froide d'un puits: et la soif qui me presse, Me fit boire à l'endroit où tu bois, ma Maistresse, Quand ton vaisseau se voit de ta lévre honoré. Mais le vase amoureux de ta bouche qu'il baise, En reschaufant ses bords du feu qu'il a receu, Le garde en sa rondeur comme en une fournaise. Seulement au toucher je l'ay bien apperceu. Comment pourroy-je vivre un quart d'heure à mon aise Quand je sens contre moy l'eau se tourner en feu? XXXVI Comme une belle fleur assise entre les fleurs... Comme une belle fleur assise entre les fleurs, Mainte herbe vous cueillez en la saison plus tendre Pour me les envoyer, et pour soigneuse appendre Leurs noms et qualitez, especes et valeurs. Estoit-ce point afin de guarir mes douleurs, Ou de faire ma playe amoureuse reprendre? Ou bien, s'il vous plaisoit par charmes entreprendre D'ensorceler mon mal, mes flames et mes pleurs? Certes je croy que non: nulle herbe n'est maistresse Contre le coup d'Amour envieilly par le temps. C'estoit pour m'enseigner qu'il faut dés la jeunesse, Comme d'un usufruit, prendre son passetemps: Que pas à pas nous suit l'importune vieillesse, Et qu'Amour et les fleurs ne durent qu'un Printemps. XXXVII Doux desdains, douce amour d'artifice cachee... Doux desdains, douce amour d'artifice cachee, Doux courroux enfantin, qui ne garde son coeur, Doux d'endurer passer un long temps en longueur, Sans me voir, sans m'escrire, et faire la faschee: Douce amitié souvent perdue et recerchee, Doux de tenir d'entree une douce rigueur, Et sans me saluer, me tuer de langueur, Et feindre qu'autre part on est bien empeschee: Doux entre le despit et entre l'amitié, Dissimulant beaucoup, ne parler qu'à moitié. Mais m'appeler volage et prompt de fantasie, Craindre ma conscience, et douter de ma foy, M'est un reproche amer, qu'à grand tort je reçoy: Car douter de ma foy c'est crime d'heresie. XXXVIII Pour voir d'autres beautez mon desir ne s'appaise... Pour voir d'autres beautez mon desir ne s'appaise, Tant du premier assaut voz yeux m'ont surmonté: Tousjours à l'entour d'eux vole ma volonté, Yeux qui versent en l'ame une si chaude braise. Mais vous embellissez de me voir à mal-aise, Tigre, roche de mer, la mesme cruauté, Comme ayant le desdain si joint à la beauté, Que de plaire à quelcun semble qu'il vous desplaise. Desja par longue usance aimer je ne sçaurois Sinon vous, qui sans pair à soymesme ressemble. Si je changeois d'amour, de douleur je mourrois. Seulement quand je pense au changement, je tremble: Car tant dedans mon coeur toute je vous reçois, Que d'aimer autre part c'est hayr, ce me semble. XXXIX Coche cent fois heureux, où ma belle Maistresse... Coche cent fois heureux, où ma belle Maistresse Et moy nous promenons raisonnans de l'amour: Jardin cent fois heureux, des Nymphes le sejour, Qui l'adorent de loin ainsi que leur Deesse. Bienheureuse l'Eglise, où je pris hardiesse De contempler ses yeux, qui des miens sont le jour, Qui ont chauds les regards, qui ont tout à l'entour Un petit camp d'amours, qui jamais ne les laisse. Heureuse la Magie, et les cheveux bruslez, Le murmure, l'encens, et les vins escoulez Sur l'image de cire: ô bienheureux servage! O moy sur tous amans le plus avantureux, D'avoir osé choisir la vertu de nostre âge, Dont la terre est jalouse, et le ciel amoureux. XL Ton extreme beauté par ses rais me retarde... Ton extreme beauté par ses rais me retarde Que je n'ose mes yeux sur les tiens asseurer: Debile je ne puis leurs regards endurer. Plus le Soleil esclaire, et moins on le regarde. Helas! tu es trop belle, et tu dois prendre garde Qu'un Dieu si grand thresor ne puisse desirer, Qu'il ne t'en-vole au ciel pour la terre empirer. La chose precieuse est de mauvaise garde. Les Dragons sans dormir, tous pleins de cruauté, Gardoient les pommes d'or pour leur seule beauté: Le visage trop beau n'est pas chose trop bonne. Danaë le sceut bien, dont l'or se fit trompeur. Mais l'or qui domte tout, davant tes yeux s'estonne, Tant ta chaste vertu le fait trembler de peur. XLI D'un solitaire pas je ne marche en nul lieu... D'un solitaire pas je ne marche en nul lieu, Qu'Amour bon artisan ne m'imprime l'image Au profond du penser de ton gentil visage, Et des mots gracieux de ton dernier Adieu. Plus fermes qu'un rocher, engravez au milieu De mon coeur je les porte: et s'il n'y a rivage, Fleur, antre ny rocher, ny forests ny bocage, A qui je ne le conte, à Nymphe, ny à Dieu. D'une si rare et douce ambrosine viande Mon esperance vit, qui n'a voulu depuis Se paistre d'autre apast, tant elle en est friande. Ce jour de mille jours m'effaça les ennuis: Car tant opiniastre en ce plaisir je suis, Que mon ame pour vivre autre bien ne demande. XLII Bien que l'esprit humain s'enfle par la doctrine... Bien que l'esprit humain s'enfle par la doctrine De Platon, qui le chante influxion des cieux, Si est-ce sans le corps qu'il seroit ocieux, Et auroit beau vanter sa celeste origine. Par les sens l'ame voit, ell'oyt, ell'imagine, Ell'a ses actions du corps officieux: L'esprit incorporé devient ingenieux, La matiere le rend plus parfait et plus digne. Or' vous aimez l'esprit, et sans discretion Vous dites que des corps les amours sont pollues. Tel dire n'est sinon qu'imagination, Qui embrasse le faux pour les choses cognues: Et c'est renouveller la fable d'Ixion, Qui se paissoit de vent, et n'amoit que de nues. XLIII En choisissant l'esprit vous estes mal-apprise... En choisissant l'esprit vous estes mal-apprise, Qui refusez le corps, à mon gré le meilleur: De l'un en l'esprouvant on cognoist la valeur, L'autre n'est rien que vent, que songe et que feintise. Vous aimez l'intellect, et moins je vous en prise: Vous volez, comme Icare, en l'air d'un beau malheur: Vous aimez les tableaux qui n'ont point de couleur. Aimer l'esprit, Madame, est aimer la sottise. Entre les courtisans, afin de les braver, Il faut en disputant Trimegiste approuver, Et de ce grand Platon n'estre point ignorante. Mais moi qui suis bercé de telle vanité, Un discours fantastiq' ma raison ne contante: Je n'aime point le faux, j'aime la verité. XLIV Amour a tellement ses fleches enfermees... Amour a tellement ses fleches enfermees En mon ame, et ses coups y sont si bien enclos, Qu'Helene est tout mon coeur, mon sang et mes propos, Tant j'ay dedans l'esprit ses beautez imprimees. Si les François avoient les ames allumees D'amour, ainsi que moy, nous serions à repos: Les champs de Montcontour n'eussent pourry noz os, Ny Dreux ny Jazeneuf n'eussent veu noz armees. Venus, va mignarder les moustaches de Mars: Conjure ton guerrier de tes benins regars, Qu'il nous donne la paix, et de tes bras l'enserre. Pren pitié des François, race de tes Troyens, A fin que nous facions en paix la mesme guerre Qu'Anchise te faisoit sur les monts Idéens. XLV Dessus l'autel d'Amour planté sur vostre table... Dessus l'autel d'Amour planté sur vostre table Vous me fistes serment, et je le fis aussi, Que d'un coeur mutuel à s'aimer endurcy Nostre amitié promise iroit inviolable. Je vous juray ma foy, vous feistes le semblable. Mais vostre cruauté, qui des Dieux n'a soucy, Me promettoit de bouche, et me trompoit ainsi: Ce-pendant vostre esprit demeuroit immuable. O jurement fardé sous l'espece d'un Bien! O perjurable autel! ta Deité n'est rien. O parole d'amour non jamais asseuree! J'ay pratiqué par vous le Proverbe des vieux: Jamais des amoureux la parole juree N'entra (pour les punir) aux oreilles des Dieux. XLVI J'errois à la volee, et sans respect des lois... J'errois à la volee, et sans respect des lois Ma chair dure à donter me combatoit à force, Quand tes sages propos despouillerent l'escorce De tant d'opinions que frivoles j'avois. En t'oyant discourir d'une si saincte vois, Qui donne aux voluptez une mortelle entorce, Ta parole me fist par une douce amorce Contempler le vray bien duquel je m'esgarois. Tes moeurs et ta vertu, ta prudence et ta vie Tesmoignent que l'esprit tient de la Deité: Tes raisons de Platon, et ta Philosophie, Que le vieil Promethee est une vérité, Et qu'en ayant la flame à Jupiter ravie, Il maria la Terre à la Divinité. XLVII Maistresse, quand je pense aux traverses d'Amour... Maistresse, quand je pense aux traverses d'Amour, Qu'ores chaude, ores froide en aimant tu me donnes, Comme sans passion mon coeur tu passionnes, Qui n'a contre son mal ny tréve ny sejour: Je souspire la nuict, je me complains le jour Contre toy, ma Raison, qui mon fort abandonnes, Et pleine de discours, confuse, tu t'estonnes Dés le premier assaut, sans defendre ma tour. Non: si forts ennemis n'assaillent nostre Place, Qu'ils ne fussent veincuz, si tu tournois la face, Encores que mon coeur trahist ce qui est sien. Une oeillade, une main, un petit ris me tue: De trois foibles soudars ta force est combatue: Qui te dira divine, il ne dira pas bien. XLVIII Bienheureux fut le jour, où mon ame sujette... Bienheureux fut le jour, où mon ame sujette Rendit obeyssance à ta douce rigueur, Quand d'un traict de ton oeil tu me perças le coeur, Qui ne veult endurer qu'un autre luy en jette. La Raison pour neant au chef fit sa retraite, Et se mit au dongeon, comme au lieu le plus seur: D'esperance assaillie, et prise de douceur, Rendit ma liberté, qu'en vain je re-souhaite. Le Ciel le veult ainsi, qui pour mieux offenser Mon coeur, le baille en garde à la foy du Penser: Lequel trahit mon camp, desloyal sentinelle, Ouvrant l'huis du rempart aux soudars des Amours. J'auray tousjours en l'ame une guerre eternelle: Mes pensers et mon coeur me trahissent tousjours. XLIX Plus estroit que la Vigne à l'Ormeau se marie... Plus estroit que la Vigne à l'Ormeau se marie De bras souplement-forts, Du lien de tes mains, Maistresse, je te prie, Enlasse moy le corps. Et feignant de dormir, d'une mignarde face Sur mon front panche toy: Inspire, en me baisant, ton haleine et ta grace Et ton coeur dedans moy. Puis appuyant ton sein sur le mien qui se pâme, Pour mon mal appaiser, Serre plus fort mon col, et me redonne l'ame Par l'esprit d'un baiser. Si tu me fais ce bien, par tes yeux je te jure, Serment qui m'est si cher, Que de tes braz aimez jamais nulle aventure Ne pourra m'arracher. Mais souffrant doucement le joug de ton empire, Tant soit-il rigoureux, Dans les champs Elisez une mesme navire Nous passera tous deux. Là morts de trop aimer, sous les branches Myrtines Nous voirrons tous les jours Les Heros pres de nous avec les Heroïnes Ne parler que d'amours. Tantost nous danserons par les fleurs des rivages Sous les accords divers, Tantost lassez du bal, irons sous les ombrages Des Lauriers tousjours verds: Où le mollet Zephyre en haletant secouë De souspirs printaniers Ores les Orangers, ores mignard se jouë Parmy les Citronniers. Là du plaisant Avril la saison immortelle Sans eschange se suit: La terre sans labeur de sa grasse mammelle Toute chose y produit. D'embas la troupe saincte, autrefois amoureuse, Nous honorant sur tous, Viendra nous saluer, s'estimant bien-heureuse De s'accointer de nous. Et nous faisant asseoir dessus l'herbe fleurie De toutes au milieu, Nulle, et fust-ce Procris, ne sera point marrie De nous quitter son lieu. Non celles qui s'en vont toutes seules ensemble, Artemise et Didon: Non ceste belle Greque, à qui ta beauté semble Comme tu fais de nom. L Helas! voicy le jour que mon maistre on enterre... Helas! voicy le jour que mon maistre on enterre: Muses, accompagnez son funeste convoy. Je voy son effigie, et au dessus je voy La Mort, qui de ses yeux la lumiere luy serre. Voila comme Atropos les Majestez atterre Sans respect de jeunesse, ou d'empire, ou de foy. Charles qui fleurissoit nagueres un grand Roy, Est maintenant vestu d'une robbe de terre. Hé! tu me fais languir par cruauté d'amour: Je te sers de Prothée, et tu es mon Vautour. La vengeance du Ciel n'oublira tes malices. Un mal au mien pareil puisse un jour t'avenir, Quand tu voudras mourir, que mourir tu ne puisses. Si justes sont les Dieux, je t'en verray punir. LI Je sens de veine en veine une chaleur nouvelle... Je sens de veine en veine une chaleur nouvelle, Qui me trouble le sang et m'augmente le soing. Adieu ma liberté, j'en appelle à tesmoing Ce mois, qui du beau nom d'Aphrodite s'appelle. Comme les jours d'Avril mon mal se renouvelle. Amour, qui tient mon Astre et ma vie en son poing, M'a tant seduit l'esprit, que de pres et de loing Tousjours à mon secours en vain je vous appelle. Je veux rendre la place, en jurant vostre nom, Que le premier article, avant que je la rende, C'est qu'un coeur amoureux ne veult de compaignon. L'amant non plus qu'un Roy, de rival ne demande. Vous aurez en mes vers un immortel renom. Pour n'avoir rien de vous la recompense est grande. LII Si c'est aimer, Madame, et de jour et de nuict... Si c'est aimer, Madame, et de jour et de nuict Resver, songer, penser le moyen de vous plaire, Oublier toute chose, et ne vouloir rien faire Qu'adorer et servir la beauté qui me nuit: Si c'est aimer de suivre un bon-heur qui me fuit, De me perdre moymesme, et d'estre solitaire, Souffrir beaucoup de mal, beaucoup craindre, et me taire, Pleurer, crier mercy, et m'en voir esconduit: Si c'est aimer de vivre en vous plus qu'en moymesme, Cacher d'un front joyeux une langueur extrême, Sentir au fond de l'ame un combat inegal, Chaud, froid, comme la fiévre amoureuse me traitte: Honteux, parlant à vous, de confesser mon mal! Si cela c'est aimer, furieux je vous aime: Je vous aime, et sçay bien que mon mal est fatal: Le coeur le dit assez, mais la langue est muette. LIII Amour est sans milieu, c'est une chose extrême... Amour est sans milieu, c'est une chose extrême, Qui ne veult (je le sçay) de tiers ny de moitié: Il ne faut point trencher en deux une amitié. » Un est nombre parfait, imparfait le deuxiéme. J'aime de tout mon coeur, je veux aussi qu'on m'aime. Le desir au desir d'un noeud ferme lié, Par le temps ne s'oublie, et n'est point oublié: Il est tousjours son tout, contenté de soymesme. Mon ombre me fait peur, et jaloux je ne puis Avoir un compaignon, tant amoureux je suis, Et tant je m'essentie en la personne aimee. L'autre amitié ressemble à quelque vent qui court: Et vrayment c'est aimer comme on fait à la Court, Où le feu contrefait ne rend qu'une fumee. LIV Ma fievre croist tousjours, la vostre diminue... Ma fievre croist tousjours, la vostre diminue: Vous le voyez, Helene, et si ne vous en chaut. Vous retenez le froid, et me laissez le chaut: La vostre est à plaisir, la mienne est continue. Vous avez telle peste en mon coeur respandue, Que mon sang s'est gasté, et douloir il me faut Que ma foible Raison dés le premier assaut, Pour craindre trop voz yeux, ne s'est point defendue. Je n'en blasme qu'Amour, seul autheur de mon mal, Qui me voyant tout nud, comme archer desloyal, De mainte et mainte playe a mon ame entamee, Gravant à coups de fleche en moy vostre portraict: Et à vous, qui estiez contre nous deux armee, N'a monstré seulement la poincte de son traict. LV Je sens une douceur à conter impossible... Je sens une douceur à conter impossible, Dont ravy je jouys par le bien du penser, Qu'homme ne peut escrire, ou langue prononcer, Quand je baise ta main contre Amour invincible. Contemplant tes beaux rais, ma pauvre ame passible En se pasmant se perd: lors je sens amasser Un sang froid sur mon coeur, qui garde de passer Mes esprits, et je reste une image insensible. Voila que peut ta main et ton oeil, où les trais D'Amour sont si ferrez, si chauds et si espais Au regard Medusin, qui en rocher me mue. Mais bien que mon malheur procede de les voir, Je voudrois mille mains, et autant d'yeux avoir, Pour voir et pour toucher leur beauté qui me tue. LVI Ne romps point au mestier par le milieu la trame... Ne romps point au mestier par le milieu la trame, Qu'Amour en ton honneur m'a commandé d'ourdir: Ne laisses au travail mes poulces engourdir Maintenant que l'ardeur à l'ouvrage m'enflame: Ne verse point de l'eau sur ma bouillante flame, Il faut par ta douceur mes Muses enhardir: Ne souffre de mon sang le bouillon refroidir, Et tousjours de tes yeux aiguillonne moy l'ame. Dés le premier berceau n'estoufe point ton nom. Pour bien le faire croistre, il ne le faut sinon Nourrir d'un doux espoir pour toute sa pasture: Tu le verras au Ciel de petit s'eslever. Courage, ma Maistresse, il n'est chose si dure, Que par longueur de temps on ne puisse achever. LVII J'attachay des bouquets de cent mille couleurs... J'attachay des bouquets de cent mille couleurs, De mes pleurs arrosez harsoir dessus ta porte: Les larmes sont les fruicts que l'Amour nous apporte, Les souspirs en la bouche, et au coeur les douleurs. Les pendant, je leur dy, Ne perdez point voz fleurs Que jusques à demain que la cruelle sorte: Quand elle passera, tombez de telle sorte Que son chef soit mouillé de l'humeur de mes pleurs. Je reviendray demain. Mais si la nuict, qui ronge Mon coeur, me la donnoit par songe entre mes bras, Embrassant pour le vray l'idole du mensonge, Soulé d'un faux plaisir je ne reviendrois pas. Voyez combien ma vie est pleine de trespas, Quand tout mon reconfort ne depend que du songe. LVIII Madame se levoit un beau matin d'Esté... Madame se levoit un beau matin d'Esté, Quand le Soleil attache à ses chevaux la bride: Amour estoit present avec sa trousse vuide, Venu pour la remplir des traicts de sa clarté. J'entre-vy dans son sein deux pommes de beauté, Telles qu'on ne voit point au verger Hesperide: Telles ne porte point la Deesse de Gnide, Ny celle qui a Mars des siennes allaité. Telle enflure d'yvoire en sa voute arrondie, Tel relief de Porphyre, ouvrage de Phidie, Eut Andromede alors que Persee passa, Quand il la vit liee à des roches marines, Et quand la peur de mort tout le corps luy glassa, Transformant ses tetins en deux boules marbrines. LIX Je ne veux point la mort de celle qui arrête... Je ne veux point la mort de celle qui arrête Mon coeur en sa prison: mais, Amour, pour venger Mes larmes de six ans, fais ses cheveux changer, Et seme bien epais des neiges sur sa teste. Si tu veux, la vengeance est déjà toute prête: Tu accourcis les ans, tu les peux allonger: Ne souffres en ton camp ton soudart outrager: Que vieille elle devienne, octroyant ma requeste. Elle se glorifie en ses cheveux frisés, En sa verte jeunesse, en ses yeux aiguisés, Qui tirent dans les coeurs mille pointes encloses. Pourquoi te braves-tu de cela qui n'est rien? La beauté n'est que vent, la beauté n'est pas bien: Les beauté en un jour s'en vont comme les Roses. LX Si j'ay bien ou mal dit en ces Sonets, Madame... Si j'ay bien ou mal dit en ces Sonets, Madame, Et du bien et du mal vous estes cause aussy: Comme je le sentois, j'ay chanté mon soucy, Taschant à soulager les peines de mon ame. Hà! qu'il est mal-aisé, quand le fer nous entame, S'engarder de se plaindre, et de crier mercy! Tousjours l'esprit joyeux porte haut le sourcy, Et le melancholique en soymesme se pâme. J'ay suivant vostre amour le plaisir poursuivy, Non le soin, non le dueil, non l'espoir d'une attente. S'il vous plaist, ostez moy tout argument d'ennuy: Et lors j'auray la voix plus gaillarde et plaisante. Je ressemble au mirouer, qui tousjours represente Tout cela qu'on luy monstre, et qu'on fait devant luy. Source: http://www.poesies.net