Les Lays.

Par Guillaume De Machaut. (1300-1377)














TABLE DES MATIERES
Un Lay De Consolation.
Le Lay Des Dames.
Le Lay De Nostre Dame.
Le Lay De Bonne Esperance.
Le Lay De Confort.
Le Lay De Plour I.
Le Lay De Plour II.
Le Lay De L'Ymage.
Le Lay De La Rose.
Le Lay Mortel.
Le Lay De La Fonteinne.
Lay Sans Titre I.
Lay Sans Titre II.
Lay Sans Titre III.
Lay Sans Titre IV.
Lay Sans Titre V.
Lay Sans Titre VI.










Un Lay De Consolation.

Pour ce que plus proprement
Chascuns de son sentement
Parle que d'autrui pensée,
Je de ce que mon cuer sent
Vueil faire amoureusement
Un lay, Amours, si vous agrée.

Et se ce fai rudement,
De vous gracieusement
M'en soit l'euvre pardonnée,
Ma dame, si vraiement
Que mes cuers est ligement
Tous vostres sanz demourée.

Je fui, ma dame de pris,
Sanz mespris,
En qui tout bien est compris,
Par vo tres douce maniere
De vous bien amer espris
Et souspris,
Si qu'encore sui tout pris,
Quant je voy vo lie chiere.

Si ne doi estre repris,
Se j'empris
A vous amer, que je pris,
Quar Amours fine et entiere
Le m'a enjoint et apris;
S'est mes pris,
Que ne m'aiés en despris,
Ma tres doulce dame chiere.

Et quant je me senti à ce mené,
Par le pooir d'Amours qui tous cuers vaint,
Que mi penser furent tout ordené
En vous, ma dame, en qui tous mes corps maint,

Je, confians de vostre humilité,
D'ardant desir fort espris et contraint,
A vous servir de bonne volenté
M'offri, dame, moult de paour attaint.

Et vous, ma dame honnorée,
De franchise enluminée,
D'humilité renommée
Et de toute honnour parée,
Disant grant mercis
De maniere asseürée,
Par semblant enamourée,
Si fistes estre doublée
L'ardour est renouvelée,
Où j'estoie mis.

Dont ma coulour fu muée
Et ma vigour tresalée,
Comme se chose facée
M'eüst troublé à journée
Tous mes espris.
Helas! doulce desirée,
Gaires... aprestée
Attainte ne apprisée
De la peine à moy donnée
Pour vostre doulz vis.

Ainsi departant,
Ma dame vaillant,
Fui de vous; maiz tant
Me senti engrant
De vers vous retraire
Que tous jours present
Estoie et tendant
A vo doulz semblant
Et gent corps plaisant,
Pour y retour faire.

Si me mis avant
Par maintes fois, quant
Vers vous esbatant,
Juant et bourdant,
On se pouoit traire,
La doulçour si grant
Estoie sentant
En vous regardant
Que mieux n'en vivant
Ne me peüst plaire.

Et ce m'a tenu en joie
Si grande que ne vouloie
Greignour bien ne ne queroie
Que la douçour où j'estoie,
En trestout me delitoie
Et sanz grevance faisoie
Tout ce que de cuer pensoie
Comment n'y failloie.

Quant aucune part aloie,
Si tres legiers me sentoie
Que a mon avis je voloie;
Et ainsi mon temps passoie,
Ne nul courroux ne tenoie,
Puis qu'à penser m'atournoie
A vous doulce, simple et coie,
A cui tous mes cuers s'ottroie.

Helas! celle douce vie,
Renvoisie
Et jolie,
M'a pou tenu compaignie,
Dont je me dueil fort.
Par malvaise genglerie,
Par envie
Commencie,
Diex Malebouche maldie
Et dont elle a port!

Quar la perverse pourrie,
Ennemie
Renoiie,
Defait contre moy partie
Et me greve à tort
Tant que jour, nuit ne demie
N'est partie
Ne faillie
Ma doulour ne amenrie
Dont j'ay pis que mort.

Quar ce que j'ay plus doubté que mourir
M'est avenu; bien doy l'eure haïr.
C'est qu'il me faut, et par force, abstenir
D'aler parler et aussi d'envoier
Vers ma dame que j'aim, craing et desir
Plus que chose que Dieux ait fait venir.
Helas! comment pourraie je ce souffrir?
Je le sçay, se Dieux me vueille aider.

Si n'en peüst qu'à moy seul mesvenir,
Je fusse tous conseillés de choisir;
Maiz ma dame en pourroit grant mal sentir
Et sanz raison son oïr reprochier,
Et ce mes cuers ne pourroit consentir.
Ainsi me doint Amours de li joïr,
Qu'onques vers lui n'oi cuer fait ne desir
Ne pensée pour s'onnour empirier.

Et elle est, à dire voir,
Pleinne de si grant savoir
Et si bien vuet son devoir
Faire leur elle est tenue
Qu'on ne lui pourroit mouvoir
A mal ne li decevoir;
Tant est pour tout parcevoir
Sage et de bien pourveüe.

Chascun scet bel recevoir
Dont sa bonté apparoir
Se fait et ramentevoir
Tant que bien est congneüe.
Dont je me doy bien doloir
Et avoir cuer triste et noir,
Quant de si plaisant miroer
M'est couverte la veüe.

Je ne sçay
Que verray,
Où iray
Ne que devenray.
Mais, comment qu'il aille,
Et Ameray,
Serviray,
Cremiray
Et obeiray
Ma dame sanz faille.

Pour esmay,
Se je l'ay,
Et maltray
Je ne laisseray
Bon grain pour le paille,
Ains aray
Cuer tres vray
Et feray
Ce que deveray,
Et vaille que vaille.

Ma tres doulce dame excellente,
Pour ce que vo loyaux cuer sente
Et sache le bien et dolour
Que bonne Amours en mon cuer sente
Pour vous, que on doit dire vraie ente
De tout bien et de toute honnour.

En ce lay faire ay mis m'entente
Et compris, sans ce que je mente,
Ma vie, attains de vostre amour.
Si veulliés, s'on le vous presente,
A l'oïr lire estre presente
Et ne le tenés à labour.

"Amis, tieng certainnement
Qu'il me desplaist grandement
De la peinne à toy livrée;
Maiz il faut souffrir souvent
La choze qui bonnement
Tost ne puet estre amendée.

Vif en espoir liement
Et serf Amours loialment,
Quar toudis n'ara durée
Chis temps, et aucunement
Verras que pour toy briefment
Sera joie recouvrée."















Le Lay Des Dames.

Amis, t'amour me contreint
Si qu'il me convient descrire
Le martyre
Qui empire
Mon corps et mon cuer esteint
Et de grieés si m'enseint
Que je ne saroie eslire
Le meins pire;
Dont matire
N'ay qui à joie me meint.

Et mes cuers toudis se pleint
Que nulle fois ne desire
Gieu ne rire,
Eins soupire,
Quant mors ma vie n'esteint;
Ne les cent pars de son pleint
Cuer penser ne bouche dire
N'à l'escrire
Mains souffire
Ne porroit. Tant se compleint,

Qu'a toute heure
Li las pleure:
S'en devient plus noirs que meure,
Ne solas n'est et son plour,
Qui aqueure
Ne labeure
Pour li, si qu'on le sequeure
De confort en sa dolour.

Ce l'espleure
Et deveure
Si fort qu'en li ne demeure
Vigour, sanc n'autre liquor.
S'en saveure
Mort qui seure
Me courra pour ta demeure,
Dous amis, et pour t'amour,

Se je ne voy temprement
Ton faitis corps gent;
Car, vraiement,
Longuement
En ce point durer ne puis
Pour desir qui si griefment
M'assaut et esprent
Qu'en mon dolent
Cuer souvent
Morte m'esperence truis,

Quant souvenirs ne me rent
Nul aligement
Fors grief torment
Qui m'aprent
Haïr mes jour et mes nuis,
Et je de toy fermement
Croy que nullement
D'esbatement
N'as talent
Et quant riens ne te deduis.

C'est ce dont plus me demente,
Car je croy,
Dous amis, que tes cuers sente
Tel anoy
Pour moy com je l'ay pour toy.
Lasse! chetive, dolente,
Bien haïr ma vie doy,
Quant je voy
Que tous ces maus nous presente
Bonne foy.

Car je t'aim en vraie entente
Et tu moy,
Et pour ce einsi nous tourmente
Le desroy
De Fortune qui n'a loy
Que m'eslongne ta jouvente,
Dont tous les jours en requoy,
Sans arroy,
En guises plus de cinquante
Me desvoy.

Amis, je soloie
Avoir tant de joie,
Quant je te veoie;
Plus ne demandoie
Ne plus ne voloie:
Souffisance avoie;
C'estoit quanque je queroie.
Jolie en estoie,
Gaie en devenoie,
Plus simple et plus quoie;
Tant en amendoie
Que ne le saroie
Dire ne porroie,
Quant ton gent corps remiroie.

Lasse! or n'est il voie
Qui mon oueil avoie
Comment je te voie
Ne comment j'envoie
Vers toy, si que j'oie
Ce que je voudroie,
C'est bien de toy qui m'esjoie.
Pour ce adès larmoie
Mes cuers qui se noie
En plours et renoie
Tous gieus. Qu'en diroie?
Quanque voy m'anoie,
Homme n'en croirie,
Qu'avoir bien loing de toy doie.

Très dous amis,
Ce m'ont tramis
Et en moy mis
Amour vraie et entiere,
Tes corps faitis,
Lons et traitis,
Tes cuers gentils
Et ta douce maniere.

Qu'a mon avis
Yes assevis,
A droit devis,
De riche honneur et chiere,
Et de ton vis,
Qu'à veoir devis,
Fu, ce m'est vis,
Nature bonne ouvriere.

Si qu'amis, n'aiés pensés
Que pour longue demourée,
Pour Fortune, la dervée,
Ne pour creature née
Te mette en oubli,
Qu'à tous jours, sans decevrée,
Est m'amour en toy fermée,
Com suer, amie et amée,
Ne tant com j'aray durée
N'aray autre amy.

Oublie ta destinée
Et pense à ta retournée,
Que joie guerredonnée,
Par honneur prise et donnée,
T'iert sans lonc detri,
Et comment riens ne m'agrée
Sans toy. Dont j'ay esplourée
La face et descoulourée;
Ce n'est pas chose celée:
Bien il pert à my.

Amis, ne doubter
Que les bois aler,
Les mons avaler,
Les bestes parler,
Les poissons voler
Verras, quant je te lairay;
Le temps arrester,
Une loy garder,
Envie finer,
Seinne retourner
Et tarir la mer,
Quant seur tout ne t'ameray.

Si dois conforter
Ton cuer et donter,
Et considerer,
Comment, sans fausser,
T'aim et vueil amer
De loyal cuer fin et vray,
Et laissier ester
Tout ce qu'amender
Ne pues, et penser
Que face muer
En dous amis amer,
Amis, quant je te verray.

Amis, encor bien dire l'os
Qu'oncques Tristans ne Lancelos,
Paris, Guenevre, Yseult ne Heleinne
N'ensuïrent si le pourpos
De loyauté et les esclos
Comme je fais, n'à tant de peinne.

Car joie n'ay, pais ne repos
Pour toy, n'onques ne me repos,
Amis, quant je te sui lonteinne
Et quant einsi te voy enclos.
Mais je te promet à briès mos
Que loyal te sui et certeinne.

Pren confort
En amer fort,
En tous cas,
Et au port
De desconfort
Ne va pas:
Se tu y vas,
S'i verras
Son effort,
Que le solas
En aras
De la mort.

Se ton sort
Et ton ressort
En li as,
Meint deport
Et meint emport
Y penras;
Plus ne diras,
Chetis, las:
"Amours dort,"
Car en ses las
Nulz n'est mas,
S'il n'a tort.

Bien croy que le grant desir
Que tu as de revenir
A fait bersaut
De ton cuer et qu'il l'assaut
Par grant aïr,
Et qu'il trait pour li honnir,
Dont il tressaut,
Garros de froit et de chaut
Par souvenir.

Ce te fait teindre et palir,
Dementer, plourer, gemir
Et en tressaut
Faire meint tour et meint saut
Et meint soupir.
Bien m'en sçay à quoy tenir,
Car tel assaut
Tous les jours souffrir me faut
Et soustenir.

Ce bruist mon cuer et teint;
Car tout aussi com la cire
Fondre et frire,
Tire à tire,
Fait li feus, quant il ateint,
T'amour, qui en moy remaint,
Fait mon cuer fondre et desfrire,
Diex l'i mire,
Ni faut mire
For li qui me fait mal meint.

Car desirs ne se refreint,
Eins me cuide desconfire:
Si m'atire
Et martire.
Mais esperence le veint.
Or pri Dieu que tes cuers m'eint,
Si qu'à fausseté ne tire
Pour ocire
Le mien d'ire,
Et qu'à joie te rameint.














Le Lay De Nostre Dame.

Contre ce dous mois de may,
Pour avoir le cuer plus gay,
Et plus joli,
Et pour celle &grave; qui m'ottri,
Vueil faire un lay.
Mais comment je le feray,
Moult m'esbahi,
Car trop petit sens en my
Pour le faire ay;

Ne suis dignes, bien le say,
De li loer: c'est le ray
Qui embeli
Nous ha tous et esclarcy
Dou soleil vray,
Si que ma fience avray
Si ferme en li
Toudis qu'à s'onneur einsi
Commenseray:

Dame, digne d'estre honnourée
Et par excellence aourée
Dessus toute dames passée,
A venir ou presente,
De toutes estes separée,
Si qu'autre à vous n'est comparée,
Ne plus qu'est au feu la fumée,
Tant est bele et gente.

Dame, Vierge et Mere appellée,
En ciel, en terre, en mer loée,
En gloire de Dieu couronnée,
De joie adresse et sente,
Fleur de tous biens enluminée
Estes, dont nostre vie est née.
Beneoite soit la journée
Que porta fruit tele ente.

Estes vous, tres bele,
Qui estes l'entele
Flourie et nouvelle,
Mere, où Dieu, vierge et pucelle,
Par deduit,
Einsi le cuit,
S'engendra, quant Gabriel
Vous dist la nouvelle
Qui "ave" s'apelle.
Ce nous renouvelle,
Par vous, Mere, à Dieu ancelle,
Car destruit
Estiemmes tuit
Dou pechié le pere Abel,

N'estoit cils ou celle,
Donsiaus ou donselle,
Dame ou demoiselle,
Qui n'alassent pelle melle,
A grant bruit,
Où riens ne luit:
C'est enfer, sans riens de bel,
Où Sathan revelle,
Qui par sa cautelle
Et par sa favelle
Fist perdre nostre querelle,
Quant dou fruit
De vie enduit
Adam le cruel morsel.

Bien fut celée à nature
Ceste engendreüre,
Ceste porteüre,
Ceste vierge enfanteüre,
Pour ce que la Deïté
Prist lors humainne figure
En vous, Vierge pure;
C'est chose seüre,
Car Dieu et homme figure
En une seule unité.

Mais onques mais creature
N'endura n'endure
Dolour si tres dure
Com vous, quant mors si obscure
Ot pour nous l'umanité
Dou vray Dieu, car toute injure
Et toute laidure
Ot contre droiture;
Mais sa mort crueuse et sure
Nous ha tous ressuscité.

Mais après ce desconfort,
Dame de pris,
Heüstes vray reconfort,
Quant Jhesu Cris,
Fu ressuscitez et vis
De ceste mort,
Où juis l'avoient mis
Faussement et à grant tort.

Lors Lucifer qui ne dort
Fu esbahis,
Pluto, Cerberus le fort
Et Lachesis,
Quant Diex prist ses bons amis
Par son effort
Et d'enfer en paradis
Les mist en joieus deport.

Mais un escript
Truis qui descript
De Jhesu Crit
Qu'il convenoit que il souffrist
Pour entrer en sa gloire,
Et qu'il venist
Et descendist
Et qu'il preïst,
Dame, en vous nostre humain habit.
Certes, c'est chose voire.

Car il le fit
Sans nul despit,
A tel profit
Qu'onques mais homs si grant ne vit;
Et sa noble victoire
Nous embelist,
Nous esclarcist,
Nous enrichist,
Si que à joie mors et vis
Mist; tout hom le doit croire.

Bien say que sa grief passion
Vous mist en desolation.
Or aviés consolation
Pris, quant vous fist turbation
D' "ave" la salutation,
Car ce fust l'incarnation
De Dieu et sa conception,
Singuliere à droit ditte.
Et de Herode l'evasion,
De vo chier fil l'invention,
Quant par sa disputation
Mis juis à confusion;
D'eaue en vin la mutation
Fist à vo supplication;
De digne resurrection
N'est pas joie petite.
Encor vous fist sa nation,
Tres vierge et sans corruption,
Joie et la visitation
Des pastours de la region,
Des iij rois l'adoration,
Vostre purification
Et aussi la destruction
Des ydoles d'Egypte.

Son admirable ascention,
D'Esperit Saint la mission,
Vo glorieuse assumption
Et vostre coronation
Dont j'espoir ma redemption
Monstrent en ma conclusion
Qu'estes, par droite affection,
De Dieu le pere eslite.

Si que li juif, par folour,
Vivent en trop grant errour,
D'une pierre sans liquour.
Moÿses faisoit
Yaue issir qui decourit,
Dont un peuple soustenit;
Sa verge en serpent muoit;
Ce scevent plusour.

Ne porta fruit, fueille et flour
Une verge sans humour,
Toute seche et sans verdour,
Qu'Aaron tenoit:
Ce contre nature estoit.
Aussi Diex naistre voloit
De vous Vierge et si feroit
Bien chose gringnour.

Et pour ce, sans prendre fin,
Cherubin
Et seraphin,
Tuit ange et archange
Dou commandement divin,
Sans declin,
Sont tuit enclin,
A vostre loange,

Et de Dieu tout li affin,
De cuer fin,
Soir et matin.
Pour ce à vous me range
Que ne soie, se je fin,
Par l'engin
Mis en hutin
De Sathan l'estrange.

Hé! Vierge roÿne,
Estoile de mer,
Qui tout enlumine,
Vous doy bien clamer,
Qu'à joieus termine
Comment terminer
Qui à vo doctrine
Se vuet doctriner;
De grace enterine,
Douce sans amer,
De bonté racine,
Flour qu'on doit amer,
Amour vraie et fine,
Qui ne puet finer
Et qui ne decline
Ne puet decliner.

Fruit et medecine
Pour tous maus curer,
Par tel vertu qui ne
Porroit empirer,
Fonteinne divine
Pour pechiés laver,
Rose sans espine,
Douce à oudourer,
Vous estes la mine
Qu'on ne puet miner,
Quar qui plus y mine,
Plus a à miner;
Qui à vous s'encline
Et vuet enciner,
Il faut que bien fine,
S'il ha à finer.

De grace riviere et puis
Qu'espuisier
Homs par puisier
Ne puet nullement,
Et de nostre sauvement
Le sourt et la duiz,
Bien est duis
Qui ses deduis
Prent de cuer entier
En vous servir et prier
Tres devotement
Et souvent,
Car vraiement
Plus ne voy ne truis.

Vierge, vo grace ne puis
Esprisier
Ne trop prisier,
Car en un moment
Ce mil fois plus en descent,
Plus de vous ce muis.
S'en suis vuis,
Je sui destruis,
Car, à droit jugier,
Vos chiers Fils ame n'a chier
Sans li; et briefment,
Pour ce prent
M'ame humblement
A vous ses refuis.

Et se vostre grace n'ay,
Dont je suis en grant esmay,
Vierge, mar vi
Le terme que je nasqui.
Las! où iray,
Que feray, que devenray?
Tout en fermi,
Car pas ne l'ay desservi;
Pour ce m'esmay.

Secondement, mors seray,
Se je y fail; mais je metteray
Tout en oubli
Pour vous que j'ay po servi.
Je penserai
A vous et vous serviray,
Se Diex plaist, si
Qu'il avra pité de mi,
Quant je morray.
















Le Lay De Bonne Esperance.

Longuement me sui tenus
De faire lais,
Car d'amours estoie nus;
Mais dès or mais
Feray chans et virelais:
G'i sui tenus,
Qu'en amours me sui rendus
A tous jours mais.

S'un petit ay esté mus,
Je n'en puis mais,
Car pris sui et retenus
Et au cuer trais
Tout en un leu de ij trais
D'un yex fendus,
Varis, dous, poingnans, ses et agus,
Rians et gais.

Car ma dame, que Diex gart,
Par un dous riant regart,
D'ardant desir fist un dart
Et un d'esperence.
Mais mort m'eüst, sans doubtance,
Desirs, et sans deffiance,
S'espoirs où j'ay ma fiance
Ne fust de ma part.

Quar quant je senti l'espart
Dou regart qui mon cuer art,
Ne perdi, à tiers n'à quart,
Sens et contenence,
Mais tout: maniere et puissance.
Lors me fist penre plaisence
En ma jolie souffrence
Espoirs par son art.

Mais ce durement m'esmaie,
Que ne say
Se ceste amoureuse plaie
Qu'au cuer ay
Vient d'amours ou de cuer vray,
Car dous regars maint cuer plaie,
Qu'ailleurs dame amy a gay.
S'en morray,
S'einsi m'est; mais d'amour vraie
L'ameray.

Ne voloir que m'en retraie
Ja n'aray
Pour doleur que mes cuers traie,
Eins seray
Vrais et de cuer serviray
Ma dame plaisant et gaie,
Et quant mes jours fineray,
Sans delay
Mon cuer, que s'amour deplaie,
Li laray.

Ne savoie,
Quant fui pris,
Se j'estoie
Mors ou vis;
N'entendoie
Gieu ne ris,
Eins sambloie
Homs ravis;
Ne queroie
Paradis,
Autre joie
N'autre pris;
Ne sentoie
Riens, tandis
Que veoie
Son cler vis
Qui m'a de s'amour espris.

Toute voie
Je repris
En la coie
Mon avis,
A qui proie,
Com sougis,
Qu'elle m'oie,
Quar envis
Gariroie,
S'escondis
Me trouvoie
A toudis:
Faut que soie
Ses amis.
Or soit moie;
Ne devis
Plus: si seroie assevis.

Ne say, se je dor ou veil,
Quant son riant oueil,
Son gent corps qui n'a pareil
Et son dous accueil
Voy et son cointe appareil,
Simple et sans orgueil,
Et son vis blanc et vermeil
Plus que fleur en brueil,
A qui d'amer me conseil,
Dont maint plaisant mal recueil.

Son chief d'or samble au soleil,
Et s'a bel acueil.
Pour ce avoir autre conseil
Ja ne quier ne vueil,
Einsois dou tout m'appareil
A faire son vueil
Et à li servir m'esveil,
Qu'en li tel bien cueil
Dont je me seingne et merveil,
Car tous vices en despueil.

Ne fait il bon tel dame amer
Et desirer
Et honnourer
Où homs trouver
Ne puet amer
Fors douceur fine à savourer?
Tres noble destinée
Ha cils qui s'i puet assener
Sans dessevrer,
Qu'elle n'a per,
Eins est nomper;
Et, sans doubter,
On ne puet milleur regarder
Ne si tres bele née.

Dont doy je bien s'onneur garder
Et sans cesser
Ymaginer
A li porter
Foy, sans fausser,
Et là tout mon scens appliquer
Sans villeinne pensée.
Mais miex vorroie estre outre mer
Sans retourner
Qu'entroublier
Son dous vis cler
Ne que penser
Chose qui peüst empirer
Sa bonne renommée.

Certes, j'ay si grant deport,
Quant je voy son noble port
Et quant, sans vilein raport,
J'oy que chascuns son effort
Fait de li prisier tres fort
Dessus toute creature,
Que je n'ay pensée obscure,
Tristece, mal ne pointure
Ne chose qui me soit dure,
Eins ay une envoiseure
Si tres douce et si tres pure
Qu'elle vaut mercy au fort.

Qu'en li veoir me deport,
En li servir me confort,
En li amer pren confort
Et l'espoir qui me fait fort
Contre desir qui me mort;
Mais riens ne doubt sa morsure,
Et s'on dist qu'elle m'est dure
Ou qu'elle n'a de moy cure,
Ne m'en chaut, qu'en sa figure
Preng si douce norriture
Que ne doubt riens que j'endure
Mal d'amour ne desconfort.

Et quant je puis vivre einsi,
Liement et sans sousci,
Trop grant folour
Seroit de rouver s'amour
Ou sa mercy,
Car je n'ay pas desservi
Si grant honnour
Et si n'en sui, par nul tour,
Dignes aussi.

Tost m'aroit di: "va de cy."
Helas! se ce avoie oÿ
De sa douçour,
Bien seroit la joie plour
Dou cuer de my,
Car il partiroit par mi.
Pour ce demour
En souffrence et en cremour,
Subjés a li.

La sont mis tuit mi plaisir,
Là m'ottroy,
Là porter foy
Vueil bonnement;
Là vueil amoureusement
Vivre et morir;
Là me tir,
Là mi desir
Sont, là m'employ,
Là meint tous le cuers de moy
Entierement,
Doucement
Et humblement,
Pour li servir.

D'amer ne me puis tenir,
Quant je voy
Le meinteing coy
De son corps gent,
A qui je sui ligement,
Sans retollir,
Sans partir,
Sans repentir.
Faire le doy,
Car cent mille biens reçoy
Contre un tourment;
Autrement,
Certeinnement,
N'ay à souffrir.

Si n'est vie
Si jolie
Com de desirer amie
En Espoir
Qui chastie
Et maistrie
Desir, si qu'il n'ait maistrie
Ne pooir,

Qu'il detrie
Vie lie,
Quant Espoirs ne s'amolie.
Pour ce avoir,
Quoy qu'on die,
Sans partie,
Vueil d'Espoir la compaingnie
Main et soir.

Car je fusse, lonc temps ha, mors,
S'il ne fust à martire,
Par l'ueil qui trait a en mon corps
De desir une vire,
Qui ja n'en sera traite hors,
Se m'amour ne l'en tire
Ou bons Espoirs qui m'a dès lors
Viset&eactue; com dous mire
Et conforté mes desconfors
Doucement, Diex li mire.

C'est mes chastiau, c'est mes ressors,
C'est ce qui estaint m'ire;
C'est li avoirs, c'est li tresors
Dont homs ne puet mesdire;
C'est de ma vie li drois pors,
C'est ma joie, à droit dire.
Tous li argens et tous li ors
De France et de l'Empire
Ne vaut pas l'un de ses confors
Où Desespoirs s'aïre.

Et quant à ce sui venus
Qu'amis sui vrais
Et d'espoir bien pourveüs,
Un joli fais
Gracieus et plein de pais
M'est accreüe,
Qui ne sera mis en sus
De mi ja mais.

Car se je amoie assés plus
Que je ne fais
Et se heüsse plus que nus
Pris en tous fais,
Si suis je norris, refais
Et pourveüs
Largement, et bien peüs
De ses bienfais.

















Le Lay De Confort.

S'onques dolereusement
Sceus faire ne tristement
Lay ou chanson
Ou chant à dolereus son
Qui sentement
Ait de plour et de tourment,
Temps et saison
Ay dou faire et occoison
Presentement.

Qu'en terre n'a element
Ne planette en firmament
Qui de pleur don
Ne me face et, sans raison,
Mon cuer dolent;
Et Fortune m'a dou vent
D'un tourbillon
Tumé jus de sa maison
En fondement.

Et si ne m'a que d'un oueil
Resgardé,
Mais tant grevé,
Se Diex me gart,
M'a de son demi-regart
Que trop m'en dueil
Qu'à son vueil
Me met en dueil
Sa cruauté
Et me tient contre mon gré,
Par son faus art,
Main et tart,
Plus c'un poupart
En un bersueil.

Tout desvuet quanque je vueil
Sa durté
Qui m'a miné;
Se n'ay regart
Que tel joie me regart
Comme avoir sueil,
Eins recueil
Par son orgueil
Toute grieté,
Quant je voy en haut degré
Maint grant paillart,
Maint coquart
Et main couart
Par son escueil.

Ainsi Fortune se chevist
Que l'un morrist,
L'autre amaigrist,
L'un enrichist,
L'autre apovrist;
Se l'un en pleure, l'autre rist.
En tels fais se delite.
Se l'un fait grant, l'autre amenrist
Par droit despist,
Son fait honnist;
Autre apetist,
N'autre delist
N'a: je ne prise son profit
Une troée mite.

Elle se boute en maint abist;
Se l'un garist,
L'autre mourdrist,
Quanqu'elle dist
Tantost desdist.
Adès est contraire à son dist
La fausse, l'ypocrite
M'a si blecié en l'esperist
Que ja decrist
N'iert par escrist.
Einsi languist
Mes cuers et vist
En grief qui n'est pas plus petist
Des x plaies d'Egypte.

Et, certes, je ne doubt mie
Que, s'à droit m'eüst
Resgardé, ma brief vie
Fenie ne fust,
Qu'en monde n'a fer ne fust,
Force, engien ne signourie
Qui sa fureur receüst,
Ne scens qui sceüst
Eschuer sa tricherie:
Tant faire peüst.

Et se ma vie fenie
Fust, tant me pleüst
Que ja mort dont j'ai envie
Ne me despleüst;
Car plus ne me deceüst
La traïtre renoÿe
Et pitez me concreüst,
Ne plus ne y eüst
Ma crueuse maladie
En moy ne acreüst.

Einsi en grant desconfort,
Dous amis, se desconforte
Mes cuers qui t'aimme si fort
Qu'amours ne fu mais si forte,
Dont joie n'a ne deport
Pour les griés que li tiens porte.
S'en ay en moy tel remort
Que bien vorroie estre morte.

Car Fortune nous fait tort
Par diverse voie et torte;
Mais en esperence au fort
Un tres petit me conforte,
Et en cest espoir ay sort
Que Raison soit de ta sorte
Et qu'encor venras au port
D'onneur par la droite porte.

A joie me tire
Espoirs, Diex li mire;
Et si me fait rire,
Quant sui en tristour,
Car il me vient dire,
Quant mes cuers souspire:
"Lay triste matire,
Ton dueil et ton plour,
Retourne en baudour
Et lay ta folour;
Brief venra le jour
Que tes cuers desire:
C'iert ta douce amour
Qui est droite flour
De toute valour
Hors de ce martire."

Si ne doy desdire
Espoir n'escondire,
Car il fait de m'ire
Joie, quant je plour,
Et sans contredire
Doucement m'atire
Et m'est trop dous mire
Contre ma dolour,
Si que la savour
De sa grant douçour
Me tient en vigour
Et me fait despire
Fortune et son tour
Qui en grant paour
Et en grant labour
Fait maint cuer defrire.

Pren confort en ta souffrence
D'esperence
Main et soir:
Se tu le fais sans doubtance
D'esperence,
Nul pooir
N'a de toy faire grevence.
C'iert vaillence,
C'iert savoir,
C'iert joie, pais, aligence;
C'iert plaisance
De l'avoir.

Et se yre ou Despit te lance
De sa lance,
Recevoir
Dont en bonne pacience,
Ne t'avence
De mouvoir,
Car au goust de souffissance
Ta pesence
Dois avoir:
Miex vaut assez s'acointence
Que puissence
D'autre avoir.

Se le dous viaire cler
Qui n'a point d'amer,
Qu'est nomper
Et sans per,
A veoir te tarde,
C'est Desirs qui dementer
Fait et tourmenter,
Souspirer
Et plourer
Maint cuer; maus feus l'arde.

Car tant me fait endurer
Que ne puis durer.
Mais tourner
Sans cesser
Te dois à la garde
D'Espoir et de Dous Penser,
S'il te vuet grever
Pour amer
Ne doubter.
Là n'aras tu garde.

Ne say se me sui vantée
D'estre douce ou desirée;
Mais, comment qui il aille,
Ne suis pas asseürée
Que soie la miex amée.
Or vaille que vaille,
Dit l'ay; se la destinée
Chiet seur moy, forment m'agrée
Ceste devinaille,
Se de telle heure suis née
Que, sans villeinne pensée,
A t'amour ne faille.

Mais quant à ce suis menée
Que mon cuer sans dessevrée,
Tout entier, te baille,
Où vraie amour enserrée
Est, loyal, ferme et secrée,
Ce seroit, sans faille,
Pechiés d'estre si moquée;
Et pour à vois esplourée
Te pri, ne te chaille
D'autre amer, quar, qui bée
A m'amour qui t'est donnée,
En vein se travaille.

En tels deduis
Est mes cuers duis
De grieté vuis;
Et c'est conduis,
Espoir, par toy, quant seur moy luis.
Mais trop me cuis,
Car en un puis,
Où j'ay d'anuis
Plus de cent muis,
M'estuet cheoir, quant tu t'en fuis.

Là fleurs ne fruis
N'a, seule y suis;
Pour ce ne puis
De joie l'uis
Trouver. Là sont longues mes nuis,
Là me destruis,
Quant ne te truis;
Là tant me nuis
Et si me duis
Qu'à plourer est tous mes refuis.

Mais ne m'esmay,
Quant je t'ay,
Car li plaint
Et li esmay
Que je tray
Sous esteint
Ta force veint
Et seurveint,
Bien le say,
Tout ce qui teint
Et desteint
Mon cuer gay.

Si qu'en mon lay
Sans delay
Et sans plaint
M'esjoïrai
Et lairay
Mon compleint;
Et se mal meint
M'ont destreint,
D'un cuer vray
Qui en toy meint,
Que qu'i meint,
T'ameray.

Pour ce, amis, pren de ta gent
Espoir le tres biau corps gent
Et le dous nom
Qui tout veint de bon renom.
Et vraiement,
S'en toy d'eus hsa fermement
L'impression,
Tu vivras en ta prison
Joieusement.

Se tu le fais autrement,
En dolour, dolentement,
Confusion,
Pleur et lamentation
Aras souvent.
Loe Dieu devotement
Et à bas ton:
N'i voy milleur ne si bon
Esbatement.












Le Lay De Plour I.

Malgré Fortune et son tour
Mon amoureuse clamour
Publieray
Et par tout me pleinderay
De fine Amour
Qui sueffre en moy tel tristour
Et tel esmay
Que jamais joie n'aray,
S'einsi demour.

Car faire vueil sans demour
De mon amoureus labour
Un piteus lay
Que je nomme et nommeray
Le lay de plour;
De mes larmes en destour
L'arrouseray,
N'autre confort ne querray
De ma dolour.

Car Fortune m'est anemie,
Amours me het, Pitez m'oublie,
Esperence s'est endormie
Et ma dame ne me vuet mie,
Quant nès dou quart
De son resgart,
Nompas de la centisme part,
Ne vuet souffrir qu'enrichis soie.
N'est biens qui soit de ma partie:
Jois s'est de moy departie,
Tristece me fait compaingnie,
Doleur me gouverne et maistrie,
Qui ne se part
Ne main ne tart
De mon cuer, eins le font et art
Et puis en mes larmes le noie.

Je croy que li ciels me guerrie
Et que Fortune a grant envie
De moy tollir honneur et vie
Pour plaire à ma dame jolie;
Mais se l'espart
Seur moy s'espart
De ses dous yex, je n'ay resgart
De mort pour mal qu'Amours m'envoie;
Et s'il li plaist que je devie
De l'amoureuse maladie,
Je ne puis, à meins que je die
Qu'onques ne fu si dure amie
Et que le dart
Qui mon cuer art
Vient de sa biauté, que Diex gart,
Quant riens fors moy ne li anoie.

C'est ce pour quoy je me dueil.
Avec ce son riant oueil
Et son gracieus accueil
M'ont ad ce mis
Que je sui ses vrais amis
Et estre vueil;
Mais la bele sans orgueil,
Qui met en moy tout ce dueil,
Ne vuet que passe le sueil
De son pourpris
Ne que voie son cler vis,
Si com je sueil.

C'est la cause de mon dueil
Dont je pers tout mon escueil;
C'est ce pour quoy mon vis mueil,
Com vrais sougis
Qui n'ai meffait ne mespris
Contre son vueil;
Et pour ce en l'amoureus brueil,
Ce m'est vis, la verge cueil
Pour moy batre et me despueil,
Comme aprentis
Qui n'a d'avoir joie apris
Lettre ne fueil.

Biau sire Diex! comment puet ce estre
Que je sui si fort mis à mestre
Que departir,
Deguerpir
Ne fuïr
Ne puet mes cuers de son dous estre
Eins est toudis dessous sa destre
Pour li servir,
Oubeir
Et cherir?

Herbe vert ou flour de genestre
Me puet o les bues faire paistre,
A son plaisir,
Et morir,
Sans mentir.
Nulle si plaisant ne puet nestre;
C'est uns drois paradis terrestre
De li veïr
Et oïr
Et sentir.

Comment est sa douceur pure
Douce à tous et à moy sure
Et ne cure
De ma cure
Ne de la mortel pointure
Dont mes cuers est entechiés,
Et seur toute creature
L'aim d'amour ferme et seüre?
Or figure
Sa figure
En mon cuer la pourtraiture
De Mort. N'est ce grans meschiés?

Quant tres humblement l'endure,
Et si n'est chose si dure
Com m'ardure
Qui tant dure
Que je vif contre nature,
Si qu'Amours qui est mes chiés
Fait envers moy mespresure,
Qui quiert ma desconfiture
N'à mesure
Ne mesure
Ma triste pensée obscure.
Par ma foy, c'est grans pechiés.

Pour ce vous pri,
Plourez avec my,
My loyal amy;
Espandez vo plour seur mi
Pour moy faire plus doloir,
Et je vous di
Que mi anemi
Seront assevi,
S'il voient partir par mi
Mon dolent cuer sans espoir,

Qui m'a guerpi
Et mis en oubli
Pour estre à cely
Qui n'a que faire de li
Et qui ne le vuet avoir.
Si m'en defri,
Qu'onques mais ne vi
Maintieng si joli.
Or m'a de s'amour bani
Pour amer sans decevoir.

Si ne sai que faire;
Ne m'en puis retraire
Et ne li puis plaire,
Qu'Amours qui me maire
Me fait plus contraire
Qu'Alixandres ne fist Daire;
Et si ne m'os traire
Vers son dous viaire
Pour mes maus retraire,
Car miex me vaut taire
Qu'à li plus desplaire,
Qui me puet faire et deffaire.

Et la debonnaire
Qui est de bonne aire,
Blanche, blonde et vaire,
D'onneur exemplaire,
Le tres dous repaire
Me vée où elle repaire.
Si n'en puis attraire
Amoureus salaire
Pour crier ne braire;
Demourer au Quaire
Et vestir la haire
Vaudroit miex qu'estre en tel haire.

Si que pleindre
Ne compleindre
Ne me vueil plus, eins vueil feindre
Que me dolereus complaint
Soient meindre,
Puis qu'ateindre
Ne puis à riens qui esteindre
Puist m'ardeur, ne qu'elle m'aint.

Et se teindre
Et desteindre
Me fait, pour amer et creindre,
Souvent et de divers taint,
D'espoir greindre
Me doy ceindre,
Puis qu'elle scet que sans feindre
Mes cuers tous en li remaint.

Fi de desconfort
Et fi d'omme fort
Qui ne prent au fort
Vigueur et confort.
Li cisnes contre sa mort
Se reconforte en chantant.
Pour ce me confort,
Et si me deport
Es maus que je port,
Ne mauvais rapport
Ja de moy ne de mon port
N'orra celle que j'aim tant,

Se ce n'est à tort;
Qu'ennemis ne dort
Et maint cuer entort
Prennent grant deport
En mesdire et grever fort
Maint tres fin loial amant
Et font leur effort
Par mauvais enort
De mettre descort
Entre bon acort.
Or me gart Diex de leur sort
Faus, mauvais et decevant.

Et pour ce amoureusement
Endurer
Les maus d'amer
Vueil sans desroy;
Et, certes, faire le doy
Tres humblement,
Qu'autrement
Pas longuement
Ne puis durer;
Car qui vuet honneur garder
Et bonne foy
Son anoy
Sueffre en recoy,
Celeement;

Nompas si ouvertement
Souspirer
Et dementer
Sans nul arroy.
Je parole contre moy,
Car vraiement,
Le tourment,
Que j'ay, souvent,
Par desirer,
Me fait tellement parler;
Vesci pour quoy
Onques n'oy
Mercy n'ottroy
N'aligement.

Or vueil aler à confesse
De ma fole hardi hardiesse,
Repenteus et pleins d'umblesse,
A Venus qui est deesse
Et souvereinne maistresse
D'amours et de tous ses fais,
Qui moy de blamer ne cesse
Dou pechié de la rudesse
Que j'ay fait par ma simplesse
Contre Amours; si m'en confresse,
Et Vesta dira la messe
En pardon de mes meffais,

Qui des nimphes est prestesse.
Si pri Venus qu'elle adresse
Mon cuer, s'il n'est en l'adresse
D'amours, et que ma tristesse
Mue en joie et en leesse,
Et par ce sera refais;
Et qu'elle face largesse
Des biens d'amours sans promesse,
Par franchise et par noblesse,
Pour garir ce qui me blesse
Et qui me tient en destresse:
Autrement je sui deffais.

Or en face son millour,
Car, sans penser deshonnour,
La serviray
Et le gracieus corps gay
Qu'aim et aour
De cuer, de corps, de vigour,
Tant com vivray;
Ne mon cuer n'en partiray
De son sejour.

Et se doucement savour
Des biens d'amours la savour,
Garis seray,
Si qu'en chantant loeray
La grant douçour
De ma dame et son honnour,
Exausseray,
N'autre ja mais n'ameray,
Heure ne jour.















Le Lay De Plour II

Qui bien aimme à tart oublie,
Et cuers qui oublie à tart
Ressamble le feu qui art,
Qui de legier n'esteint mie;
Aussi qui ha maladie,
Qui plaist, envis se depart.
En ce point, se Dieus me gart,
Me tient Amours et maistrie.

Quar Plaisence si me lie
Que ja mais l'amoureus dart
N'iert hors trait, à tiers n'à quart,
De mon cuer, quoy que nuls die;
Car tant m'a fait compaignie
Que c'est niant dou depart
Ne que ja mais par nul art
Soit sa pointure garie,

Qu'envis peut on desraciner
Un grant arbre, sans demourer,
De la racine
Qu'on voit puis flourir et porter
Et ses branches croistre et geter
En brief termine.

Certes, einsi est il d'amer;
Car quant mes cuers se vuet enter
En amour fine,
Envis puet s'amour oublier,
Einsois adès par ramembrer
A li s'encline.

Car l'iaue qui chiet desseure
La racine qui demeure
Fait renverdir et florir
Et porter fruit;
Tout einsi mes cuers qui pleure
Parfondement à toute heure
Acroistre mon souvenir
Fait jour et nuit.

Et c'est ce qui me deveure,
C'est ce qui mon vis espleure,
C'est ce pour quoi je soupir;
A ce me duit
Vraie Amour, qui me court seure,
Et Bonté que si saveure
Qu'en moy ne puissent morir:
Ce me destruit.

Raisons et Droiture,
Plaisence et Nature
Font par leur pooir
Toute creature
De volenté pure
Tendre à mieus valoir.

Et je m'asseüre
Que, tant com je dure,
Ne porray veoir
Amour si seüre,
Bonté si meüre
Na tant de savoir.

Aussi voit en clerement
Que li cuer qui loyaument
Et sans folour
Aimment de tres fine amour
Cuident souvent
Qu'en milleur et en plus gent
Aient sejour,
Car plaisence et sa vigour
Ce leur aprent.

Or say je certeinnement
Que mienne estoit ligement
La droite flour
De ceaus qui ont plus d'onnour,
Quar toute gent
Disoient communement,
Et le millour,
Qu'il avoit toute valour
Entierement.

Et quant si bon me millour ne plus cointe
N'est, ne si bel ne d'onneur si acointe,
A droit jugier,
Mervillier
Ne se doit
Nulz, se ne vueil par l'amoureuse pointe
Nouvellement d'autre amour estre pointe.
Pour ce changier
Ne me quier;
Et j'ay droit.

Qu'en mon cuer est si tres ferme et si jointe
L'amour de li qu'estre n'en puet dejointe,
Car cuer entier
Qui trichier
Ne saroit
Par souvenir vuet que dou tout m'apointe,
Si qu'autre amour n'entrepreingne n'acointe,
Qu'autre acointier
Empirer
Me feroit.

Dont le bon recort
Qui de li recort
Fait qu'à ce m'acort
Que ja ne soie en acort
D'avoir autre amy;
Mais en desconfort,
Sans nul reconfort,
De tout mon effort
Vueil pleindre et plourer sa mort
En disant einsi.

"Amis, mi confort,
Mi joieus deport,
Ma pais, mi ressort
Et tuit mi amoureus sort
Estoient en ty.
Or ay un remort
De toy, qui me mort
Et point si tres fort
Qu'o toy sont tuit mi bien mort
Et ensevely.

Dous amis, tant fort me dueil,
Tant te plaint,
Tant te complaint
Le cuer de moy,
Tant ay grief que, par ma foy,
Tout mal recueil;
Dont mi oueil
Que souvent mueil
Et cuer estreint,
Viaire pali et taint,
Garni d'effroy
Et d'anoy,
Sans esbanoy,
Monstrent mon dueil.

Dous amis, seur ton sarcueil
Sont mi plaint
Et mi complaint;
Là m'esbanoy
Par pensée, là te voy
Plus que ne sueil,
Là me vueil,
Là sont mi vueil,
Là mes cuers maint.
La Mort pri que là me maint,
Car là m'ottroy,
Là, ce croy,
De la mort doy
Passer le sueil.

Là souspire,
Là s'aïre
Mes cuers qui tant a martyre
Et de mortel peinne
Et tant d'ire
Qu', à voir dire,
Son mal ne porroit descrire
Creature humeinne.

Là s'empire,
Tire à tire,
Là ne fait que fondre et frire,
Là son dueil demeinne,
Là sans rire
Se martire,
Là se mourdrist, là desire
Qu'il ait mort procheinne.

Dous amis, tant ay grevence,
Tant ay grief souffrance,
Tant ay dueil tant ay pesence,
Quant ja mais ne te verray,
Que doleur me point et lance
De si mortel lance
Au cuer qu'en desesperence
Pour toy mes jours fineray.

En toy estoit m'esperence
Toute et ma fiance,
Ma joie, ma soustenance.
Lassette! or perdre les ay.
Bien pert à ma contenence
Et à ma loquence,
Car maniere ne puissance
N'ay; tant me dueil et esmay.

A cuer pensis
Regret et devis
Ton haut pris
Que tant pris;
Einsi le convient.
Et vis à vis
Te voy, ce m'est vis,
Dous amis,
Et toudis
De toy me souvient.

Mes esperis
Et mes paradis
Estient mis
Et assis
Et toy; s'apartient
Que soit fenis
Mes cuers et peris,
Qu'est chetis
Et remis,
Quant vie ne le tient.

Amis, je fusse moult lie,
S'eüsses cuer plus couart:
Mieus vausist à mon esgart
Que volenté si hardie.
Mais honneur, chevalrie
Et tes renons qui s'espart
Par le monde en mainte part
Ont fait de nous departie.

Ta mort tant me contralie
Et tant de maus me repart,
Amis, que li cuers me part.
Mais einsois que je devie,
Humblement mes cuers supplie
Au vray Dieu qui nous regart
De si amoureuse regart
Qu'en livre soiens de vie."














Le Lay De L'Ymage.

Ne say comment commencier
Un tres dous lay
Pour bon Amour mercier
De l'espoir qu'ay
Et pour ma dame au corps gay
Glorefier
Et loer,
Car trop po sçay
Pour telle ouevre edefier.

Pour ce leur vueil supplier
D'umble cuer vray
Que me vueillent ottrier,
Sans lonc delay,
Leur grace, car je n'aray
Bon jour entier
Jamais, se
D'elles ne l'ay,
Où tous me vueil emploier.

Car je ne saroie
Ne porroie
Bien savoir
N'onques valoir,
Se je ne l'amoie.
Je vorroie,
Bien pour voir,
Mort recevoir;
Ne souhaideroie
Ne querrioe
Plus avoir
De tout avoir.
Or pri Dieu qu'en joie
S'arai joie,
Main et soir,
Par leur voloir.

Qu'autrement nul bien ne vueil,
S'il ne vient par leur escueil
Et par leur gracieus vueil,
A cui je sui plus sougis
C'un chiennet devant l'orgueil
D'un lyon, quant il ha dueil
Qu'il n'a pasture en son breuil
Pour ses faonnés petis.

Car il m'ont par bel acueil
Et par un dous riant oueil
Navré, dont pas ne me dueil,
Ains en sui gais et jolis,
Et si liement recueil
Adès, plus que je ne sueil,
Que par souffrir les fleurs cueil
Dont j'espoir estre garis:

C'est bonne esperance,
C'est obeissance,
C'est douce plaisence,
C'est jolie pacience,
C'est deduis, se Diex me gart,
C'est douce aligence,
C'est ma souffisance,
C'est la congnoissance
De la tres noble puissance
D'amour fine et de son art.

N'il n'est desplaisence
Que j'aie ou grevance
En ceste souffrance,
Ains me plaist tant, sanz doubtance,
Que de joie me repart.
C'est ma contenance,
C'est ma soustenance,
Quant fais reverence
A la douce remembrance
Qui de mon cuer ne se part.

Si me fi tant en leur bonté
Et en leur debonnaireté
Que, s'en mon lay qu'ay ordené
Riens mesavient,
De ligier sera pardonné;
Et se croy qu'il prenront en gré
De moy la bonne volenté:
Bien le convient.

Et puis qu'il m'ont tant honnouré
Qu'il m'ont si fort enamouré
Que cuer et corps leur ay donné,
Bien apartient
Que du sens que Dieu m'a presté
Les mercie, qu'en verité
Honnour, joie, pais et senté
D'ellez me vient.

Pour ce, bon Amour,
Par humble clamour,
De cuer, de vigour,
Com mon souverain seignour,
Vous merci
Et remerci
Et vous fais hommage
Quant à vostre honnour
Sers, crien et aour
La rose et la flour
De biauté et de douçour,
Tout en mi
Le cuer de my,
Com vo douce ymage,

Qui là fait demour
Et son dous sejour,
Com tresors en tour;
Et là sa haute valour
Ay servi
Et obeÿ
D'amoureus courage,
Et ser nuit et jour.
Là sont mi retour,
Là sont tuit mi tour,
Là sont mi penser grignour,
Là m'ottri,
Li seule tri,
Là sui en savage.

Mais vous estes tresoriere,
Claseniere
Et portiere
De ceste ymagette chiere
Et de ce righe tresor
Que port à painne legiere.
N'est priere
Qui li quiere
Fors tant que sa grace acquiere,
Car je ne l'ay pas encor.

Nature en fu bonne ouvriere:
Trop l'ay chiere,
Quant sa chiere
Et sa doucete maniere
Resplent plus qu'en soleil or.
De tous biens est coustumiere;
N'est doubliere,
Mais entiere;
N'i faut riens qu'à dame affiere,
Et s'a chief blont, crespe et sor.

Si me vueil de sa biauté taire,
Pour ce que retraire
A point, sans meffaire,
Son gent corps et son bon affaire
Ne porroie en cinc cens mil ans,
Car Nature ne scet mais faire
Un si doulz viaire.
S'i prent exemplaire;
Mais ne fist puis que contrefaire
Qu'elle la fist: tant est plaisans!

Le soleil, qui le monde esclaire
De son luminaire,
A meürté traire
Fait tous biens et les fleurs parfaire,
Tant les petitez com les grans;
Tout ainsi chascun qui repaire
En tres doulz repaire
De la debonnaire,
Il li convient à bien attraire:
Tant soit de faire mal engrans.

Si me doy moult conforter
Et doucement esperer
Joie et deport
De cest ymage que port
Et vueil garder
En mon cuer, servir, loer
Jusqu'à la mort;
Et après seront mi sort
En li amer.

Et quant par li regarder
Voy les milleurs amender,
Ce seroit tort,
Puis que de tout mon effort
La vueil loer
Et dessus tous aourer,
S'aucun confort
N'avoie pour amer fort
Et desirer.

Mais n'endure
Chose dure;
Qu'Esperance la seüre
Doucement
M'asseüre
Qu'en sa cure
Me prendra ma dame pure,
Et briefment.

Ce figure
Sa figure
En mon cuer, si qu'elle y dure
Tellement
Que laidure,
Mespresure
N'i a fors sa pourtraiture
Proprement.

Riens ne desir
Tant com li servir
A plaisir.
Mi desir
Sont là jour et nuit,
Pour desservir,
En lieu de merir,
Li veir,
Li oïr:
A ce Amours me duit.

Miex vueil languir
Pour li, sans mentir,
Et morir
Que joïr
D'autre; c'est le fruit
Dont soustenir
Me vueil et norir.
Là merir,
Là querir
Vueil tout mon deduit;

Si que de son dous dangier
Jamais n'istray,
Car miex ne puis souhaidier.
Pour ce y morray
Et mon temps y useray,
Sans li changier,
N'autre ja mais n'ameray,
Car moult m'en puis avancier.

Or li vueille Amours noncier
Que porteray
Dedens mon cuer sans trichier
Et serviray
Sa douce ymage et l'aray
Plus que moy chier,
Et tant com durer porray,
Ne feray autre mestier.














Le Lay De La Rose.

Pour vivre joliement,
Nettement, joieusement
Et sans souscy
Ne faut qu'espoir de mercy,
Tant seulement;
Et je l'ay si fermement
Que j'en mercy
Amours et ma dame aussi
Tres humblement.

Je l'ay si fermement
Et si amoureusement
Lonc temps nourri
Tout en mi le cuer de my
Que vraiement
Il me promet bonnement
Et sens nul sy
Que j'aray le nom d'amy
Procheinnement.

Si ne puis nul mal avoir,
Tant comme j'ay cest espoir
Qui me fait vivre et valoir,
Ne je n'ay pesence,
Anoy, grieté ne souffrance;
Et se desirs trop s'avance,
Douce et jolie plaisance
M'est, à dire voir.

Si me merveil, quant doloir
Et complaindre main et soir
Voy maint amant et manoir
En desesperence.
L'un muert d'amoureuse lance
Et l'autre ha toute grevance;
L'autre languist en doubtance
De pis recevoir.

Ce dient; mais le contraire
Tieng le croy;
Car quant le plaisant viaire
Simple et coy,
Le gent corps, le bel arroy
De ma dame debonaire
A loisir remir et voy,
Par me foy,
Riens n'est qui me puist desplaire
Tant m'esjoy.

Et si me convient retraire
Loing de soy,
Ja pour ce ne m'en faut traire
Grief n'anoy,
Car Dous Pensers en recoy
De sa biauté l'exemplaire
Doucement me monstre au doy.
C'est pourquoy
Loing et près toudis repaire
Joye en moy.

Et s'ay l'espoir de joïr
Et dous souvenir
Sens partir,
Car guerpir
Ne me puellent près ne loing,
Eins gouvernent mon desir,
Si qu'à riens ne tir
Qu'à servir
Et cherir
Ma dame, à qui tous me doing.

Dont cil glorieus martir
Qu'amours fait palir
Et languir
Et morir
Devroient avoir grant soing
De les avoir et tenir
Pour leurs maus garir
Et tarir,
Car venir
Les voy toudis au besoing.

Mais dame sage et seüre,
Qui de s'onnour cure,
Voit sens couverture
S'il quierent laidure,
Si que bien se gardera
De leur desir, plein l'ardure
Et de desmesure,
Où scens ne mesure,
Honneur ne droiture,
Amour, bien ne raison n'a.

Comment ose creature
Dire qu'amour pure
Li est si tres sure
Qu'à desconfiture
Ou en desespoir sera,
S'elle ne le prent en cure?
Et dit qu'il endure
Doleur si tres dure
Que, s'elle li dure,
Son grant desir l'ocirra.

C'est pensée
Forcenée,
D'un fol desir engendrée,
Qui tue honneur et deffait
Honnourée,
Renommée,
Ne ja n'iert bien dame amée
D'amant qui ce pense out fait,

Ne celé
Ne gardé.
Mal an et male journé
Puist avoir cilz qui meffait,
Tant qu'il bée
Qu'empirée
Soit dame et deshonnourée
Ou blasmée par son fait.

Comment puet estre vrais amis
Amans tristez et desconfis,
Merencolieus et pensis,
Qui dist que demeure toudis
En doleur et en rage!
A son mal est si ententis
Qu'il entroublie le cler vis,
Par qui il est en ce point mis,
Si qu'il vorroit estre banis
De l'amoureus servage.

De son cuer et ses corps haÿs,
De toute joie est anemis,
Si qu'en cuer qui est si chetis
Ja mais Amours, j'en sui tous fis,
Ne feroit son mainnage.
Mais quant amans est vray sougis,
Countes, joieus, gais et jolis,
Amours en fait son paradis.
S'en doit avoir, se m'est vis,
De mercy l'avantage.

Or laissons ceste matiere
Et venons à la premiere
De ma douce dame chiere,
Où raison maint et maniere,
Douçour et valour,
Qu'est de mes v sans portiere
Et de mon cuer tresoriere
Et de mes yeulx la lumiere;
C'est celle où gist toute entiere
M'amour et m'onnour.

Ja soit ce qu'à moy n'affiere,
Mais sa douce et simple chiere,
Qui n'est estrange ne fiere,
Vuet que mes cuers preingne et quiere
Sejour et demour
En dous espoir dont mais n'iere
Que tous siens, sans parsonniere.
Or doint Diex que ne requiere
Chose à li, de quoy j'aquiere
Dolour ou tristour.

Et par ma foy, tres bien garderay,
Qu'en li garder
Honnourer
Et loer
Cuer, corps, pooir, scens, temps, vie et penser,
Tant com vivray,
Metteray,
Qu'empris l'ay,
Si que ja mais mon temps n'emploieray
Qu'en desirer
Et amer
Sans fausser.
Son bien, sa pais, s'onneur et son vis cler
Aoureray,
Serviray
De cuer vray.

Et se Diex plaist, je sui telz et seray
Que dementer,
Souspirer
Et plourer
Ne me faurra, pour ce que senz cesser
Obeyray
Son corps gay
Et feray
Que, se je puis, par son gré l'ameray.
Plus demander
Ne rouver
N'esperer
Ne vueil ne quier, pour ce qu', à droit parler,
Plus ne vorray
Ne querray,
Quant ce aray.

Et se senz trichier,
De fin cuer entier
La ser et tieng chier,
Doulz espoir me fait cuidier
Que j'aray amie
Qu'on ne puet prisier
Assez n'esprisier;
Et pour ce eslongier
Ne vueil mon cuer n'estrangier
De sa signourie.

Dont partir ne quier,
Car, à droit jugier,
On voit de legier
Que hors sui de tout dangier,
Ne melancolie
Ne m'ose aprochier
Pour joie empechier
Ne je n'ay mestier
De riens qu'on puist souhaidier.
N'est ce bonne vie?

Pourroit on penser ne dire
Ou eslire,
Ymaginer ne descrire
Vie de si grant deport
Que je n'y truis courrous n'ire
N'à redire
Fors jouer, chanter et rire,
Honneur et tres bon acort?

Dame à qui sui ligement,
Vostre doulz viaire gent,
A qui m'ottry,
M'a d'esperence garny
Si richement
Que ne me puet nullement
Mettre en oubly,
Eins est en moy et je en li
Parfaitement.

Et se servi longuement
Vous ay, dame, et loyaument,
Senz nul ottry,
Se j'ay par vo gré servi,
Certeinnement,
Mon service hautement
M'avez mery
Et mon desir acomply
Tres doucement.
















Le Lay Mortel.

Un mortel la vueil commencier
Et à tous amans anoncier
Comment Amours me vuet traitier
Et mettre de joie en misere,
Par Fortune qui detaillier
Fait mon cuer et en plours baingnier
Par un faus traitre murtrier
Qui de tous maus faire se pere:

C'est Mesdis qui mon sens changier
Vuelt et tous biens de moy chacier
Et moy si mortelment playier
Que jamais n'ier qu'à moy ne pere.
Et si n'en ose l'euil drecier,
Pités ne Loyautés groucier;
Mais Franchise se va mucier:
S'en muir de grief mort et amere.

Car mes biens et mes effors,
Mes dous espoirs, mes confors,
Ma joie et l'onneur de my,
Mon cuer, m'amour, mes depors
Et mes amoureus tresors
M'ont de leur grace bani,

Par faus et mauvais rapors
Et par envieus enors
Qui m'ont faussement trahy.
Dont je sui perdus et mors,
Et vous pri: Venés au corps,
Mi bon et loyal ami,

Pour moy plourer tendrement
Et parfondement
Et pour monstrer qu'à tourment
Dolereusement
Muir pour ma tres douce dame
Qu'ai si amoureusement
Et si nettement
Servi qu'onques vraiement
Je n'os pensement
Fors à s'onneur sans nul blame.

Et pour ce que toute gent
Voient clerement
Que pour amer loyaument
Sui mors tellement,
Ce lay mettés sur ma lame.
Ne fais autre testament
Fors tant que humblement
Ma dame mon cuer present;
Et s'elle le prent,
Li diex d'amours ara l'ame.

Mais il m'est avis
Que, quant dou cler vis
De ma douce dame chiere
Me voy escondis,
Qu'il n'est paradis
N'autre bien qu'à moy affiere;

Ains doit estre mis
Avec les chetis
Et hors de toute priere,
Et mes esperis
Doit estre peris,
Quant ire est de moy murtriere.

"Dolans cuer las,
Di moy que feras,
Que diras,
Où iras
Ne que devenras,
Quant tu verras
Qu'on ne te vuet pas?
Plus n'aras
De soulas
Que de dire: "helas!"

Bien mis seras
De si haut si bas;
Là plourras
Les maus qu'as,
Dolereus et mas;
Là creveras
Où tu partiras.
S'en morras
Sans respas
En l'amoureus las."

La seront mi grief compleint
Et me pleint,
Mi grief souspir et mi plour.
Tost ploure et petit plaint;
Ce estaint
En moy sens, joie et vigour
Et coulour;
Car c'est ce qui mon vis taint,
C'est ce qui à mort m'ataint,
C'est le pis de ma dolour.

Qu'en monde n'a riens tant meint
Qui m'amaint
Confort fors dueil et tristour;
Ne riens nulle ne me plaint,
Ains on maint
Grant joie, quant plus fort plour,
Car tenrour
Ne pité en euls ne maint
De la rage qui m'estraint
Pour ma dame que j'aour.

Quar se Pité, qui pour moy dort,
Estoit d'acort
Qu'aucuns venist, pour mon confort,
D'une larme amoureuse
Plaindre et plourer le mal que port,
Il m'aroit mort.
Einsi fineroit, sans deport,
Ma doleur dolereuse.

Mais Amours, qui à son grant tort
Me het trop tort,
Si tost ne vuet mie ma mort
Ne ma vie joieuse,
Ains vuet que vive par son sort
Sans nul deport,
En langueur et en desconfort.
C'est chose trop crueuse.

Quant morir
Ne garir,
Esjoïr
Ne joïr
Ne me laist ne durer;
Repentir,
Departir,
Li guerpir
Ne fuïr
Ne ma dame oublier.
Mais doubter,
Aourer,
Desirer,
Honnourer
Le me fait et servir;
Li garder,
Li celer,
Li amer
Sans fausser.
Là sont tuit mi desir.

S'en souspir
Maint souspir
Et m'aïr
D'un aïr
Trop dur à endurer,
Quant souffrir
N'obeir
Ne querir
Son plaisir
Ne m'i font que grever.
Mais plourer,
Souspirer,
Dementer,
Desesperer,
Moy haïr, moy oïr,
Refuser,
Debouter
Et donner,
Tout amer
Sont en lieu de merir.

Mais la mortel rage
Et les meschiés qu'ay
Viennent de l'outrage
Que je commensai,
Quant onques penser osay
N'avoir regart
A ma dame, que Diex gart.

Qu'en son douls servage,
Sans partir entray,
Quant sa douce ymage
Premiers resgardai;
Si qu'adont je me navray
Dou mortel dart
Qui de mon cuer ne se part.

Si prent la venjence
De m'outrecuidence
Amours qui me lance
De mortel fer de sa lance;
C'est desesperence
En lieu d'esperance,
Et ce que deffense
D'estre en sa presence
Me fait en lieu d'aligence.

Ne je n'ay fiance
Qu'en ma grief souffrance
Soit nuls qui s'avance,
Se ce n'est pour ma grevance.
Mais riens n'a puissance
Que sa grant vaillance,
Sa douce samblance
Ne sa contenance
N'aie adès en ramenbrance.

Tant a bonté,
Tant a biauté,
Humilité,
Jolieté,
Grace, honnesté
Et gaieté,
Scens, douceur, debonnaireté,
Que c'est l'arbre de vie
Et de santé;
Et, à mon gré,
De loyauté,
De verité
A tout passé
Et sormonté
Et tout le monde enluminé
D'onneur, de courtoisie.

Mais tant pité
N'i ai trouvé
Qu'en m'orphanté
M'ait viseté
Ne conforté
De sa clarté
Les tenebres ne l'obscurté
De la grief maladie
Où j'ai esté
Par maint esté;
Ne pour grieté,
Qu'aie porté
Ne enduré,
N'ay esprouvé
Que d'un seul regart ma durté
Par li soit adoucie.

L'estoile est qui puet adrecier
Les desvoiés et ravoier;
Helas! or me fait desvoier.
C'est la fontainne douce et clere
Qui puet dou dout assasier
L'ardant soif de mon desirer
Et tous mes griés maus alegier;
Mais trop m'en est amours avere.

Car ce m'art et me fait sechier,
Qu'adès la voy, dont plus l'ai chier,
Et goute n'en puis essaier.
Pour ce à Tantale me compere;
S'en chant en mon jour darrenier:
"Dame, mort m'ont, sans menacier,
Vostre dous oueil, vostre dangier
Et vostre amour que chier compere."












Le Lay De La Fonteinne.

Je ne cesse de prier
A ma dame chiere
Que mes maus vueille aligier.
Mais si se tient chiere
Et tant la truis dure et fiere,
Sans amolliier,
Qu'adoucir de ma priere
Ne puis son dangier.

S'en vueil une autre acointier
Que joie pleniere
M'otriera de ligier
Et à bonne chiere,
Sans fin, sans amour legiere,
Sans amenuisier;
Ne joye qu'à li s'affiere
Ne puet homs trier.

Et où porroit on querir
La joie qui amenrir
Ne puet ne finer
Et qui ne fait que doubler
En joieus plaisir?
Tous li mondes, sans mentir,
N'en porroit finer,
Sans la dame qui n'a per
Amer et chierir.

Mais ame ne puet perir
N'à dampnation venir
Qui son temps user
En li servir et loer
Vuet sans repentir;
Car qui siens, sans retollir,
Vuet tous demourer,
Et gloire l'estuet regner
Qui ne puet faillir.

C'est celle qui par ordenance
De parole et par la puissance
D'Esperit Saint, qui ouvra en ce,
Et par devine pourveance,
Fait au commandement dou Pere,
Conçut vierge, sans violence,
Porta vierge, sans desplaisence,
Enfanta vierge, sans grevence,
Li fil Dieu qui prist no samblance
Pour nous tous geter de misere.

Mais n'i ha point de difference,
Car cil iij font toute une essance,
Une vertus, une substance,
Un pooir, une sapience:
Ci ha trop mervilleus mistere.
Et si n'en fais nulle doubtance,
Car c'est ma foy, c'est ma creance,
C'est ma vie et ma soustenance,
Par celle qui par excellence
Est fille au pere et dou fil mere.

Ces iij un à po de peinne,
Assez prouver puis:
Considere une fonteinne,
Le ruissel, la duis;
Ce sont iij, mais ces iij truis
Tout un, soit petite ou pleine,
Soit par pintes ou par muis:
Par tous ces conduis
Est yaue d'un goust certeinne;
Tous seürs en suis.

Hé! roÿne souvereinne,
Qui suer toutes luis
Plus cler que la tresmonteinne
Es obscures nuis,
Aussi l'iaue et li dous fruis
De vie prist char humeinne
Et fourme en tes costés vuis.
S'est bien hors d'anuis
Et de fortune mondeinne
Cils que tu conduis.

Et qui de ceste yaue prendroit
Et la mettroit
Par un temps froit
En un vaissel, elle prendroit
Et jaleroit,
Si qu'on feroit
De la glace une ymage;
Mais ja son goust n'en perderoit
Ne mueroit,
Qu'adès seroit
Eaue et nature d'eaue aroit.
Chascuns le voit
Et aperçoit
Par le temps yvernage.

L'iaue de vie einsi venoit
Et descendoit
En tes flans droit,
Que Sains Esperis amenoit
Et conduisoit,
Dont il formoit
Le bel, le bon, le sage,
Qui Fils de Dieu le Pere estoit,
Qui consentoit
Et qui voloit
Que fourme et char humeinne aroit
Et qu'il morroit
Et getteroit
D'enfer l'umein lignage.

Mais ceste trinité
Est en eternité,
En possibilité
Et en toute autre chose,
En scens, en qualité,
En gloire, en verité,
Une seule unité
En Dieu le Pere enclose,

Qui par douce pité,
Par vraie humilité
Nous ha tous respité,
Quant en toy, douce rose,
Prist nostre humanité
Li Fils par amité.
Ce nous ha tous getté,
Dont Sathans ne repose.

De la dus le Pere nomme,
De la fonteinne le Fil
Qui vient dou Pere et fu homme,
Dou ruissel cler et gentil
Saint Esperit; c'est la somme.
Dou Pere et dou Fil vien il.
Ces vj song iij, qui bien somme
A entendement soutil.

Mais miex vorroit estre à Romme
Outre mer en essil
Ou getés dedens la Somme,
En flun Jourdain ou en Nil
Que croire riens que predomme
Ne puist croire sans peril;
Car tout vaut il une pomme
Sans Dieu? je di que nennil.

Et pour ce di que cil troy
De no foy
Te firent droit fondement,
Quant li Fils se mist en toy.
Car j'en voy
Parfait le Vieil Testament
Et fait le Saint Sacrement.
Ce m'aprent
Que la duis de nostre loy
Yes et de no sauvement
Proprement
La fonteinne, ainsi le croy,

Où chascuns boit qui ha soy,
Sans anoy;
Et qui pardurablement
Vuet vivre aveuc le grant roy
Lave soy
En ruissel qui en descent.
C'est ta grace vraiement
Qui se estent
A tous ceus qui en recoy
Pleurent et plaingnent souvent.
Tendrement
De leurs pechiés le desroy.

Pour ce te pri,
Vierge, oy mon depri,
Car po cri,
Po descri,
Po pleur les pechiés
Qui sont en mi,
Vieil et endormi.
S'en fremi,
Car en mi
Mon cuer sont fichiés.

M'ame t'otri
Et doing sans detri,
Et te tri
Seur tout tri.
Or soyes mes chiés
Et aveuc mi
Contre l'anemi,
Car ami
Ne demi
N'ay en mes meschiés.

Mais de tel confort
Com de plourer fort
Petit me confort,
Vierge, se ne me fais fort
Qu'apaiseras l'ire
De ton Fil, que au fort
Homs n'a si grant tort
Qui n'en soit ressort,
Quar à toy vie ne mort
Ne scet escondire.

Las! or sui au port
De tout desconfort,
Quant mes maus recort;
Et si fort me desconfort
Que ne le puis dire,
Car pechiés me mort;
Anemis ne dort,
Eins fait son effort
Qu'en livre de mort, moy mort,
Me puist faire escrire.

Hé! fonteinne de concorde,
La duis de misericorde,
Ruissiau qui leve et racorde
Mains pecheurs, fluns de douçour,
Oy ma clamour:
Fais que pechiés ne me morde,
Si qu'ennemis ne m'encorde
De ses craus et de sa corde,
Car en toy sont tuit mi tour
Et mi retour.

Fai tant que de li m'estorde;
Car il n'a maison ne borde
Qui vils, sale, obscure et orde
Ne soit, pleinne de puour
Et de laidour,
Et mes cuers vuet et t'acorde
Que ton dous salut recorde,
Tant que de li naisse et sorde
Une fonteinne de plour
Et de tristour,

Pour laver et nettoier
En tele maniere
Les vices qui de pechier
Me donnent matiere.
Vierge, que ta grace acquiere,
Si que trebuchier
Ne me puist en sa chaudiere
Sathans n'accrochier.

Encor te vueil supplier,
Roÿne et lumiere
Des angles, qu'à ton Fil chier
Ta douceur requiere
Que son ire ne nous fiere
Au jour darrenier,
Et la joie qu'est entiere
Nous vueille ottroier.


















Lay Sans Titre I.

Amours doucement me tente
Que m'entente,
Si que je ne m'en repente,
Mette en li servir,
Et ma douce dame gente,
Qui est l'ente
De tous biens, m'en atalente,
Et je le desir.

C'est bien drois que m'i assente
En attente
Qu'aucuns de sez dous biens sente
Dedens moy venir.
Pour ce aussi comme de rente
Li presente
Cuer, corps, pouoir et jouvente,
Penser et desir,

Si que tout premierement
Vueil devotement
Loer humblement
Et mercier hautement
Amours en mon lay,
Quant elle m'a franchement,
Sans departement,
Donné ligement
Pour ma dame loyaument
Servier de cuer vray.

Et aussi certeinnement
Bien n'avancement
N'aray nullement,
S'il ne me vient proprement
De son gent corps gay
Qui me fait mout liement
Et tres doucement
Amoureusement
Languir, sans avoir torment,
Tristesse n'esmay.

Vivre ne porroie
N'avoir bien ne joie,
Se ne la servoie
Et obeissoie
De cuer. Pour ce, où que je soie,
Tous à li m'ottroie,
Ne m'en recroiroie,
Se morir devoie.
Or doint Diex que moie
Sout s'amour; plus ne vorroie.

Ne riens ne vaurroie,
Se je ne l'amoie,
Car elle m'avoie
En la droite voie
D'onneur dont riens ne savoie.
Et je, qu'en diroie?
Sa maniere coie
Si me tient et loie
Que riens ne m'anoie
Qu'Amours me face n'envoie.

Einsi m'a doucement pris
Et mis en son dous pourpris,
Et, certes, je me rens pris,
Sans partir de sa prison,
Car nices et desapris
Sui, mais bien serai apris
Et porrai monter en pris,
Se je l'aim sans mesprison.

Car tant est douce de vis,
Bonne, belle, à mon devis,
Et s'est si bien assevis
Ses gens corps, sans meffaçon,
Que Nature, ce m'est vis,
Y mist si tout son avis
Que j'en sui pris et ravis
Plus qu'onques ne fu pris hom.

Mais trop me plein de Nature,
Quant ma cure
En si plaisant creature
Est sans partir ne mouvoir.
Or n'ay maniere meüre
Ne figure,
Grace, bonté ne mesure
Pour telle honneur recevoir.

Et ce me fait bleceüre
Grief et dure
Et me tolt envoiseüre;
Mais je ferai mon pouoir
Que me dame nette et pure
Soit seüre
Que loyaument, sans laidure,
L'aim et sers sans decevoir.

Autre confors ne sçay fors bien amer;
Et se po vail, il faut que je me peinne
De ma dame servir et honnourer
Et de valour seürs à ce me meinne.

Car se je ser ma dame sans fausser,
Tant est vaillant, franche, douce et humeinne
Que ses frans cuers ne porroit endurer,
S'elle le scet que je perde ma peinne.

Las! qu'ay je dit? ja n'iert perdue
Ne retenue,
Car à vous ce doubles rendue
M'est, sans plus, par douce esperance
Dont fine amour est soustenue
Et repeüe,
Quant de la belle ay la veüe
Qui me point d'amoureuse lance.

Et ce mout durement m'arguë,
Dont je tressue,
Et ma coulour desteint et mue;
S'en pers maniere et contenance,
Que ne suis pas de tel value
Que receüe
Soit de moy l'amour ne heüe
De dame de si grant vaillance.

C'est ma paour,
C'est m'ardour,
C'est mon plour,
C'est ma dolour,
Ma tristour,
Ma langour,
C'est ce qui pis me fait et mal atourne.
Et sa valour,
Sa coulour,
Sa douçour,
Sont gent atour,
Sans baudour
Ne folour,
Font que mes cuers en li meint et sejourne.

Et fine Amour,
Qui demour
Et sejour
Fait nuit et jour
Et moy pour
Mon millour,
Vuet que dou tout à li amer m'atourne.
Dont je l'aour,
Criem, honnour
Par honnour,
Sans deshonnour,
Et demour
En ce tour
Que riens qui soit ne voy qui m'en destourne.

Si ne me doit plas desplaire,
Mais mout plaire
Mon attraire
A li servir sans retraire;
Et se petit vail,
Son tres dous plaisant viaire
Debonnaire
Exemplaire
Me sera de tous biens faire:
Pour ce à li me bail.

Car elle est de si bonne aire
Et d'affaire
Tel que traire
Ne scet à mal ne meffaire;
Mais s'à s'amour fail,
Tuit bien me seront contraire
Et deffaire,
Sans refaire,
Convenra mon cuer et traire
De mort le travail.

Mais tost m'aroit respité
Sa bonté,
S'un samblant d'umilité,
Engendré
De fin cuer enamouré,
Faire me voloit;
Et j'espoir qu'en sa biauté
Qui navré
M'a soit pure loyauté
Et pité.
Or li doint Diex volenté
Que s'amour m'ottroit.

Si m'ara guerredonné
La santé,
Que j'ai lonc temps desiré,
Et donné
De toute joie à plenté,
Qui ne me faudroit,
Et mis en si haut degré
Qu'à mon gré,
Se quanque Diex ha formé
Et crée
M'estoit tout abandonné,
Tant ne me vaudroit.

Si ne quier
Ne requier
A Dieu, nès par souhaidier,
Fors s'amour entiere
Qui changier
De legier
Puet mes maus et aligier,
S'elle oit ma priere.

Eslongier
N'estrangier
Ne me quier de son dangier
Par nulle maniere,
Qu'avancier
Et aidier
Plus me puet que n'os cuidier
Sa tres douce chiere.

Et se pour li me tourmente
Et demente,
Quant elle ne m'est presente,
Ce fait, sans mertir,
Desirs qui me represente
Plus de trente
Pensers, voire de sexente,
D'un seul souvenir.

Car sa grant biauté la plente
D'amours plente
En moy et me met en sente
De li obeir,
Et Loyauté n'est pas lente,
Einsois l'ente
Suer foy que je li creante
Jusques au morir.














Lay Sans Titre II

Loyauté, que point ne delay,
Vuet sans delay
Que face un lay;
Et pour ce l'ay
Commencié seur ce qu'il me lie
En amours, dont si me navray
Que mon vivre ay,
Tant com vivray,
Mis, sans oster, en sa baillie.
Mais vos cuers point ne s'amollie,
Dame jolie,
Eins contralie
A chiere lie
Le mien, dont ja mais je n'avray
Joieuse vie;
Cars mors n'envie,
Dont je devie,
S'an vo gentil corps cuer n'avray.

Si ne sçay de quelle part traire,
Puis que contraire,
Pour moy detraire,
M'estes, n'attraire
Ne puis de vo plaisant attrait
Riens qui ne soit pour moy deffaire,
Qui, sans meffaire,
Vueil toudis faire
Vo service, en dit et en fait.
Las! einsi de voloir parfait
Vos cuers, qui fait
M'a, me deffait
Sans nul forfait.
Mais pour ce n'en verrés retraire
Le mien que trait
Avés d'un trait
Qui le detrait,
Si qu'à la mort m'en convient traire.

Dame, et quant dou bien me souvient
Qui de vous vient,
Et il avient
Qu'il me convient
Laissier l'aler et le venir
Vers vous, mes corps, que tous maus tient,
Ne se soustient,
N'il n'apartient
Que biens li peüst avenir,
Qu'Amours le fait tel devenir
En son venir,
Par souvenir,
Que revenir
Ne puet à li, car il devient
Com mors; n'il ne puet meintenir
Ne detenir
N'apartenir
A fausseté, qu'à li n'atient,
Eins vous sert en loyal entente,
Ma dame gente,
Qu'Amours l'en tente
En longue attente
De veoir vo viaire gent,
A qui mes las cuers se demente,
Sans ce qu'il mente,
Qui le tourmente
Souvent de l'amoureus tourment.
Et quant je vous serf loiaument
Et liement,
Tres finement,
Sans finement,
Ne voloir n'ay que m'en repente,
Certeinnement,
Petitement
Aligement
Me donnez, quant mors m'est presente.

Bien fust, se j'eüsse mespris,
Dame de pris,
Que j'aim et pris,
Vers vous qui pris
M'avez d'amer sans mespresure.
Mais onques vo vueil ne repris,
Ains ay apris,
Com bien pris,
De vous une noble apresure,
Qui telle est que ma peinne dure
Aveuc m'ardure,
Qui moult me dure,
De cuer endure,
Pour vo biauté qui m'a sourpris.
Or m'estes sure
Par amessure,
Ne n'avés cure
De moy qui à vous me rens pris.

Eymmi! tres douce creature,
Noble en faiture,
Plaisant et pure,
N'est pas droiture
Que vous m'ociés pour amer,
Quant je vous aim d'amour seüre
Et de laidure
Vous asseüre.
Or ne me daingniez reclamer;
Dont il m'estuet chetif clamer
De cuer amer,
Quant enflamer
Me voy d'amer,
N'Amours ma dolour point ne cure.
Mais nuls homs ne m'en doit blamer
Ne diffamer,
Puis qu'afamer
Me vuet d'amoureuse pasture.

Einsi loyal Amour m'ateint
Et si me teint
De divers teint
Ne point n'esteint
Ce qui me fait palir et teindre.
Et mas las dolens cuers se pleint
A moult haut plaint
Et se complaint.
Mais il se puet assez compleindre;
Car sa dure dolour remeindre
Ne puet n'estaindre,
Qu'Amours, sans feindre,
Fait en li meindre
Il desespoir qui le sourveint,
Et, pour li plus forment contreindre,
Le fait destreindre,
Sans joie atteindre,
D'un dangier, dame, qu'en vous maint.

Pour ce, dame, je me destour
De vostre atour,
Fait à droit tour,
Ne mon retour
Ne ferai, se soit retournés
Vos gentis cuers en autre tour,
Qui en destour
Fait meint estour
Au mien, dont mal sui atournés.
Helas! je sui à ce tour nés,
A mort tournés,
Que ja clamés
Amis n'amés
Ne seray de vous que j'aour.
Et se savés
Que vous m'ames
Et que donnés
Sui à vous de loyal amour.

Pour ce à vous plus que je ne seuil
Me plaing et dueil,
Quant je recueil
De vostre accueil
Semblant qui ma dolour empire.
Mais ja pour ce ne quier ne vueil
Muer mon vueil,
Comment que dueil
Aie, qui va de mal en pire;
Car puis que c'est au desconfire,
N'à vous souffire
Le grief martire,
Qui me martire,
Ne vuet, tres belle, sans orgueil,
Par escondire
Vous pri, pleins d'ire,
Que tost occire
Me vueillent vostre dous vair oueil.

J'ay droit; car, se procheinne mort
A moy s'amort,
Si que moy mort
Par son dur mort
Face, sans cuer et sans espoir,
En desconfort,
Sans reconfort,
Vos cuers moult fort
En sera liés, si com j'espoir,
Et vous pouez moult bien savoir
De ce le voir,
Que miex avoir
Que nul avoir
Vueil la mort qu'en mal que je port,
Sens miex voloir,
Par vo voloir,
Adès doloir
Moy, sans joie avoir ne deport.

N'il n'est nuls, belle bonne et sage,
En qui hommage
Sui en servage
A heritage,
Qu'estre n'amast miex mors que vis
Que languir en si dure rage
Qui n'assouage;
Car elle esrage
De moy scens, pouoir et avis.
Pour ce, frans cuers amanevis
Et assevis
De plaisant vis,
A mon devis,
Vous pri qu'aiés loyal corage;
Car je devis,
Quant je m'avis,
Comme homs ravis,
La mort, quant vous m'estes sauvage.

Et à loy de loyal amy
Pleure et gemi
Et di: "aimy,"
Quant anemi
Truis vo dur cuer à ma priere;
Et quant tuit li bien endormi
Se sont pour mi,
Mes cuers par mi
Part presques, douce dame chiere.
Belle, et comment que bien affiere
Qu'à moy soit fiere
Vo douce chiere,
Qui tant m'est chiere,
N'est drois, quant elle ha sans demi
M'amour entiere,
Sans parsonniere,
Qu'à mort me fiere,
Car ja de paour en fremi.

Ainsois vo douçour esmerée,
Dame honnouré,
Tant desirée,
D'onneur parée,
Qui mon corps teint et mon cuer art,
Deüst ma joie avoir doublée.
Or ay pensée
Desesperée,
Qui me fait languir maint et tart;
Car quant en depriant regart
Vo dous regart,
Se Diex me gart,
Je n'ay regart
De joie qu'ay tant comparée;
Car nulle part
A moy n'en part,
Eins me repart
D'ardeur à nulle comparée.

Dont il me convient dire: "helas,"
Sans nuls solas;
Mais ne sui las
D'estre en vos las,
Qu'Amours de plus en plus m'i lasse,
Sans garder raison ne compas.
Dont mon respas
N'espoire pas,
Ne temprement ne me respasse;
Car joie m'oublie et trespasse,
Done je trespasse,
Et moy depasse
Doleur qui passe
Toute autre: s'en ay, comme las,
Pensée lasse
Qui si me lasse
Qu'à moy appasse
La mort d'amer plus que le pas.

Car Amours fait de moy bersaut,
Et si m'assaut
De maint assaut
Et fait meint saut;
Dont je doubt que sa cruauté
Ne m'ocie; car en tressaut
Mes cuers tressaut,
Tramble et deffaut,
Pour ce qu'il ha toute durté.
Mais Amours ha en moy planté
Si grant plenté
De loiauté
Que fausseté
Ne feray; car, se Diex me saut,
Se despité
M'a sans pité,
Tost respité
M'ara; mais qu'elle me consaut.

Qu'en joie puet mon mal changier
Et aligier
Moy de legier,
Sans damagier
Vostre honneur, dame de vaillance,
Sans plus, s'elle me laist cuidier
Ou souhaidier,
Pour moy haidier,
Qu'aie encor de vous aligence.
Et la mort dont sui en balance
Par vo sanlance
Qui fiert et lance
Mon cuer sans lance
Et tient en son tres dous dangier,
Sans deffiance,
Se j'ay fiance
En esperance,
Feray de moy toute eslongier.

Et se vos gens corps lons, adroit,
Parfait à droit
En tout endroit,
Vuet orendroit
Que pour li muire sans attendre,
Certes, mes cuers miex ne vaudroit;
Et il ha droit,
Puis qu'il faudroit
Dou toutoù Amours le fait tendre,
Qu'en je vuet bien partir et fendre,
Sans li deffendre,
Puis qu'à li tendre
N'estes, n'entendre
Ne daingniés à ce qu'il faudroit
Pour li joie et garison rendre.
S'en vuet bien prendre
Mort, sans mesprendre,
Car vie riens ne li vaudroit.

Hé! dame, plus belle qu'Eleinne,
De moy souvereinne,
Mes cuers se peinne
Et met en peinne,
Par quoi li vostres soit certeins
Que j'aim sans pensée villainne
D'amour certainne,
Si que lonteinne
Me soit l'ardeur dont sui estains.
Mais quant à vous me sui complains,
Souspirs et plains
Dont je sui plains
Sont petit plains
De vous, dame, de grace pleinne.
Et quant dou mal qui m'est remains
A jointes mains
Pri qu'aie meins,
Adont Amours pis me demainne.

Car quant en vous de pité point
Ne truis, n'à point
Amours me point
D'un si dur point
Que de joie tout me despointe
Et d'un fier desdaing le cop oint,
Qui mat m'empoint,
En angle point,
Dont la mort à mon cuer s'apointe.
Mais s'Amours qui mon mal apointe
Vous eüst pointe
De telle pointe,
Tost fust desjointe
De moy l'ardeur qui s'i ajoint;
Mais vos cuers d'un refus m'acointe
Pour dure acointe,
Ma dame cointe,
Qu'Amours pour ma mort li enjoint.

Nompourquant de près et de loing
A vous me doing
Et abandoing,
Ne je n'ay soing
Fors de vous servir à toute heure,
Et vous me failliés au besoing;
Dont je tesmoing,
Et en tesmoing
Tray la vraie amour que je honneure,
Que morir m'estuet sans demeure,
S'ainsi demeure
Qu'à moy court seure
Et me deveure
Vostre refus que tant ressoing
Que mais ne pri qu'on me sequeure;
S'en plaing et pleure,
Quant je assaveure
Que pour vous à la mort me pong.

N'en riens nulle ne me delit,
Ne nul delit
Ne m'abelit,
Ne ne m'eslit
Mes cuers qui en riens ne dessert
Que vous l'ociés sans respit
Pour le despit,
Qu'il me guerpit
Pour vous qu'adès loyaument sert.
Mais vos corps qui est et appert,
Tout en appert,
Cointe et apert,
Ne me depert
Pour mal qu'aie grant ne petit,
Comment qu'il ne m'ait pas couvert,
Eins m'a ouvert
A descouvert
Que de ma mort a appetit.

Et puis qu'il ne vous plaist que je oie
Solas et joie
Qui me resjoie,
Ne que je joie
De nul bien, ains y estes joieuse
Quant pour vous si fort me desvoie
Que je m'avoie
De mort en voie,
Bien me plaist, dame savoureuse;
Car se vous estes plus crueuse
Et meins piteuse,
Dame orguilleuse,
Po amoureuse,
Vers moy, si vueil je, où que je soie,
Souffrir ma doleur dolereuse
Et perilleuse,
Qui convoiteuse
Est que pour vous morir me voie.

Si qu'Amours m'a trop deceü,
Que j'ay creü,
Quant repeü
Ne pourveü
N'a de pité m'ardeur agüe,
Eins ha ma joie descreü,
Bien l'ai sceü,
Et acreü
Le mal qui nuit et jour m'argüe.
Mais s'elle m'ocist et partue,
Point ne m'en mue,
Eins continue
Et m'esvertue
D'amer pour faire mon deü,
N'en moy, se vie m'est tolue,
N'iert ja venue
Desconvenne
Ne mon cuer pour faus congneü.

Einsi de l'amourement espine
Mon cuer espine,
Par la doctrine
Qui me doctrine
D'Amours qui par son grant engin
Met en moy de mort la racine
Et l'enracine
Sans medecine,
Celeement, en larrecin.
Et vos cuers, pour qui je m'affin,
Com dur affin,
Desir a fin
De mettre à fin
Le mien las, qui d'amer ne fine.
Mais, quant pour vous vois à declin,
Vers vous m'enclin,
Le chief enclin,
Car ma vie et mon lay define.














Lay Sans Titre III

Nuls ne doit avoir merveille
Ne penser que je desvueille
Nulle chose qu'Amours vueille,
Se souvent me pleing et dueil;
Car li maus qui me traveille
Ne dort onques ne sommeille
Ne n'amenrist, einsois veille
Toudis pour croistre mon dueil.

N'il ne vuet que je recueille
Chose de quoy meins me dueille,
N'Amours riens ne me conseille
Fors l'amer: s'aim par son vueil
Ce qui ma mort appareille,
C'est des fleurs la nompareille
Qu'on claimme blanche, vermeille,
Belle, bonne et sans orgueil.

Dessus toute fleur mondeinne
Souvereinne
Est d'odeur, et sa colour
N'est onques pale ne veinne,
Eins est pleinne
De vertu et de savour.

De tous vices est lonteinne
Et procheinne
De pris, de grace et d'onnour,
N'en li n'a tache vileinne:
Tant est sainne,
Pure et de haute valour,

Pour ce de loyal cuer fin,
Jusques à tant que je fine,
L'ameray en foy
Ne je n'en quier faire fin;
Car tant par est vraie, fine
Et de bel arroy
Qu'elle est de tous biens en soy
Fueille, fleur, fruit et racine
Et vrais estos qui ne fine
D'acroistre. Pour ce m'ottroy
A ce que tout enterine
Son bon et son vueil de moy,

Comment qu'à mon bien enclin
Ne truisse chose qui mine
Le mien à desroy.
Dont ma joie yert en declin,
S'elle à garir ne s'encline
Le mal que reçoy,
Car son plaisant maintieng coy
Par desir mon cuer affine,
Toute ensement com la mine
S'affine en feu; dont je croy
Morir dedens brief termine,
N'autre garison n'i voy.

Or ne deingne
Que j'ateigne
A nulle riens qui esteingne
Mon anuy,
Eins l'eingreingne,
S'en meheingne
Mon cuer; mais bien l'en conveingne,
Car siens sui.

Or ne creingne
Que je freingne
Ne qu'autre amour entreprengne
Vers neluy,
Einsois teingne,
Que qu'aveingne,
Que je l'aim, quel part que veingne,
Plus qu'autrui.

Helas! et elle m'atyre
De si grief martyre
Et si mal atire,
A tort, sans matire,
Pour li plus despire,
Mon cuer que la Mort le tire.
Car quant il se oit escondire
De ce qu'il desire,
Il reçoit tant d'ire
Qu', à verité dire,
Pour son mal descrire
Ne porroit langue souffire.

Einsi, pour moi desconfire,
Fait mon cuer defrire
Et en dueil confire
Qui toudis empire;
Dont li las soupire,
Quant en la bele se mire
Dont nuls ne porroit mesdire,
Qui deüst son mire
Estre. Or ne remire
Son mal; dont eslire
Vuet pour le meins pire
Mort qui tost le veingne occire.

Car Desirs me fait maint saut,
Qui est à ce duis;
Dont li las tramble et tressaut:
Tant li fait d'anuis.
Et ma dame, qui tant vaut
Que fonteinne et puis
Est d'onneur, en fait bersaut,
Ce bien dire puis,

Où tant trait lance et assaut
Que j'en sui destruis,
Ne de son mortel assaut
Garison ne truis,
Qu'en riens qui soit ne li chaut
De mon mal; et puis
Qu'il li plaist, se Diex me saut,
Tous joians en suis.

Car je vueil
Son dous vueil
Faire
De cuer, sans meffaire,
Jusques à la mort,
Qui si oueil
D'umble accueil
Traire
Me font, sans attraire
Joie ne deport.

Pour ce en dueil
Que recueil
Taire
Ne puis le contraire
Qui m'ocist à tort.
Si m'en dueil,
Quant ne sueil
Plaire,
Et me fait que desplaire.
Helas! ce m'a mort.

Si ne sçay, s'Amours m'essaie,
Qui tant me grieve et esmaie,
Ou s'il li plaist que je traie
Toudis mal qui me detraie.
Mais einsois que me retraie
D'amer, vueil morir
Pour ma dame, sans merir,

Qui par sa grant biauté vraie
Et par sa maniere gaie
Mon dolent cuer fent et plaie
De meinte amoureuse plaie,
Quant il ne li plaist que j'aie
Mon loyal desir,
C'est s'amour que dant desir.

Las! dolens, li souvient il,
Comment le regart soustil
De son viaire gentil
M'a mis et tient en essil,
Dont tous me gaste et essil?

Certes, bien croy que nennil,
Quant elle me tient si vil
Que pour li sui en peril
De morir, et si sui cil
Qui l'aim plus qu'autre cent mil.

Pour ce entrelais
Chans et lais;
Si n'en puis mais
Qu'onques mais
Nul si grief fais
Com je fais
Ne porta nuls amis vrais.

Qu'a tous essais
Sui detrais,
N'en dis n'en fais
Je n'ay pais
Et au cuer trais;
Dont en plais
Dolereus sont me souhais.

Si ne me sçay des gries maus où compleindre,
Qui font mon vis souvent palir et teindre,
Ne riens qui soit ne le porroit esteindre
Fors que ma dame
Que j'aim et serf loyaument, sans refreindre,
De cuer et d'ame.

Or ne se vuet de moy travillier feindre,
Einsois me fait tourmenter et destreindre;
Nul seul espoir ne laist en mon cuer meindre
Qu'Amours entame,
Quant je ne puis à mon desir ateindre
Qui est sans blame.

Helas! si ne puis aprendre,
Ymaginer ne tour prendre
Qu'il ne me conveingne prendre
Mort pleinne de desespoir;
Ne je ne m'en puis deffendre,
Car elle fait mon cuer fendre,
Quant elle n'est vers moy tendre;
C'est ce dont me desespoir.

Pour ce humblement, sans atendre,
Vueil pour li la mort atendre,
Quant elle ne deingne entendre
A ce qui me fait doloir.
Ne nulz ne me doit reprendre,
Se fair vueil, sans mesprendre,
De sa bele face tendre
Le dous gracieus voloir.













Lay Sans Titre IV

Par trois raisons me vueil deffendre
Qu'on ne me doit mie reprendre,
Se, selon la condition
De m'amour, qui ja mais n'iert meindre,
Vueil ma pleinte et mon lay comprendre
En triste ymagination.

L'une est qu'Amours ne vuet entendre
A ce que ma dame soit tendre
Vers moy, eins est s'entention
Que mon dolent cuer face feindre;
Joie ne deingne en moy descendre,
Et lay, c'est lamentation.

Pour ce mesprendroie,
S'en moy lay disoie
Que j'oie
De joie,
Ou se de samblant joieus
Faire le voloie,
Qu'Amours qui me loie
Desvoie
La voie
Des biens dont sui familleus.

Et quant merci proie,
La simple, la quoye
N'ottroie
Que soie
Ses sers ne ses amoureus,
Nès que je la voie.
Et pour l'amour soie
Morroie,
S'estoie
Sans vir son corps gracieus.

Si vif en trop mortel chace,
Qu'Amours me dechace,
Pour ce que je chace
L'amour de ma dame chiere
Qui ma mort quiert et pourchace,
Quant elle m'enchace
Et quant avoir grace
Ne puis de sa simple chiere.

Las! si ne say que je face;
Car sa bele face
Tout mon bien efface,
Quant envers moy seul est fiere,
Et Dangiers qui me manace
Vuet que sa manace
De fait me defface
Cuer, corps, pouoir et maniere.

Einsi detrait
Mon cuer et fait contraire
Son dous viaire;
Et son plaisant attrait
L'a si attrait
Que siens est sans retraire,
Ne pour mort traire
N'iert ja de li retrait.

Pour ce, meffait
De moy einsi deffaire,
Qui son bon faire
Vueil de cuer et de fait -
Certes, non fait,
Qu'elle ne scet meffaire.
Tant est d'affaire
Bon, loyal et parfait.

Qu'a se bonté, qui toutes enlumine,
N'est mondeinne bonté qui se compere,
Et sa biauté, qui son gent atour pere,
Plus que biauté est belle et enterine.

Car tout aussi com la rose à l'espine
En douce oudour et coulour se differe,
Seur toutes est fleur, feuille, fruit et mere
De tous les biens d'onneur, de douceur fine.

Si doi moult estre repris,
Quant j'ay dit qu'elle ha mespris,
Car tant ha scens, los et pris
Et tant est ses corps apris
De toute bonne apresure
Que c'est l'exemplaire où pris
Sont tuit li bien et compris.
Dont se de li sui espris
Et je l'aim, serf, loe et pris,
Je ne fais pas mespresure.

Car quant en mon cuer devis
Comme elle est belle de vis
Et comment, à mon devis,
Ses gens corps est assevis
De toute oeuvre de Nature,
Gens, joins et amanevis,
Par penser sui si ravis
Que je ne sçay se sui vis.
Si met je tout mon avis
A penser à sa figure.

Einsi pensant à s'amour
Maintes fois demour,
Et en ce demour
Mes cuers fait clamour,
Pleins d'umble cremour,
De sa grant tristour
Et de sa langour,
Par soupirs pleins de dolour,
A la grant valour
Ma dame d'onnour.
Mais pou de tenrour
En ha; las! s'en plour,
Et en mon grief plour
Si forment m'esplour,
Quant en mon avis retour,
Que tous me devour.

Si croy, pour ce que j'aour
Par si grant savour
Sa fine douçour,
Sa fresche coulour,
Son corps fait à tour,
Et son gent atour,
Qui seur tous est flour,
Qu'Amours vuet par sa rigour
Que perde vigour
Et que mi bon jour
Avuec ma baudour
Finent sans sejour.
Mais ja pour paour
De mort deshonnour
N'i penseray ne folour
Vers li que je honnour;

Ains l'ameray
Et obeiray,
Doubteray,
Serviray,
Et sans repentir,
De fin cuer vray,
Tant com je vivray,
Le feray,
Et seray
Siens sans retollir.

N'a son corps gay
Plus je jehiray
Les maus qu'ay
Ne l'esmay
Qu'il m'estuet sentir,
Fors en ce lay;
Et miex que porray
Soufferrai.
S'en lairay
Amours convenir;

Comment qu'il ne li souveingne
De moy ne ne deingne
Qu'il me veingne
Riens dont preingne
Espoir qui m'ardour esteingne,
Ne qu'à nulle joie atteingne,
Nès que je me pleingne
Ne compleingne,
Si m'enseingne,
Quant elle m'est si estreingne.

Si ne sçay que je deveingne
Qu'elle me compreingne
Et meheingne,
Dont l'enseingne
Port qu'en plour mes cuers se beingne.
Mais comment que me destreingne,
Contraingne et estraingne,
Je n'aveingne
Que me feingne
D'amer ne que m'en refreingne.

Et si n'est qui me confort,
Ne plus ne requier confort
N'aligement,
Eins endure liement
Le mal que port,
Com cilz qui vueil sans deport
Tres humblement
Languir amoureusement
Jusqu'à la mort

Pour celle que j'aim si fort
Que j'ay tant desconfort
Et de tourment
Que mors sui certeinnement,
Sans nul deport,
Se Pitié qui en li dort
Procheinnement
Ne met son cuer autrement
De mon acort.

Or soit à son ordenance,
Car fiance
Nulle part
N'ay, ressort ne esperance
D'aligence,
Par nul art,
Fors en sa douce sanlance
Qui sans lance
M'a d'un dart
Navré, dont sans apparance
Par plaisance
Mon cuer art.

Mais trop me fait de grevance
Sa presence,
Quant j'esgart
Qu'à tous est d'umble acointance
D'eloquence,
De regart.
Si m'est si grief la souffrance,
Que sueffre en ce,
Que trop tart
Muir, car j'en pers contenance
Et puissance,
Quant n'i part.

Si ne sçay le milleur tour prendre,
Car j'aim miex morir que mesprendre
Vers li que j'aim sans meffaçon,
Ne qu'ailleurs mon dolent cuer tendre,
Qui plus art que charbon sous cendre
Pour sa belle clere façon;

Eins vueil toudis à s'onnour tendre
Et tout mon temps en li despendre,
Comment qu'aie de guerredon
Pour s'amour qui en moy engendre
Voloir d'endurer et d'atendre
La mort en lieu de guerredon.













Lay Sans Titre V

Pour ce qu'on puist miex retraire
Qu'Amours pour amer m'a mort,
Je vueil faire avant me mort
Un lay dou mal qui me mort,
Si qu'à moy Mors s'en amort,
Sans mais garison attraire.

Car pour mon las cuer detraire
Sont ja mort tuit me deport,
Si qu'en riens ne me deport,
Einsois li maus que je port
Me mourdist sans nul deport,
Pour ce que j'aim sans retraire.

N'Amours pité point
N'a dou cruel point
Qui au cuer me point,
Einsois m'en scet si à point
Poindre par son art
Que mon cuer empoint
Mat en angle point.
S'en sui en tel point
Que, se Diex joie me doint,
La mort me vient tart.

Et tout pour amer
Ay je tant d'amer
Qu'Amours reclamer
Ne me deingne et enflamer
Me fait, n'un regart
Ne puis entamer,
Einsois affamer
Me fait en amer
Et dolent, chetif clamer,
Quant mes cuers ne part.

Pour ce, dame gentieus,
A qui sui ententieus,
Mes las cuers se sent tiex
Qu'il n'est maus qu'il ne sente,
Dont jamais n'iert sentieus,
Car par engiens soustieus
L'ateint de cos mortieus
Amours qui en li se ente.

Einsi li las se duet,
Mais souffrir li estuet,
Pour ce qu'Amours le vuet
Qui l'ocist et tourmente;
Ne dou mal qu'il acquet
Confort trouver ne puet,
Einsois plus qu'il ne suet
Se complaint et demente.

Mais de ce ne me merveil,
Ne ce n'est mie merveille,
S'il vit en dolour;
Quar, quant vo bel appareil,
Vo face clere et vermeille
Et vostre valour
Vit premiers par sa folour,
En vo biauté nompareille,
Qui de ma mort s'apareille,
Mist et ottria s'amour,
Ne pour mal qu'il en recueille
Ne m'en laist faire clamour;

Ja soit ce que mon grief dueil
Vuet que je me pleingne et dueille
A vous que j'aour.
Mais quant compleindre m'i vueil,
Mes las dolens cuers s'esveille
Et me livre estour
Tel que par meint divers tour
Le dire me desconseille
Et l'amer tant me conseille
Que j'aim plus de jour en jour;
Si qu'einsi, vueille ou ne vueille,
M'estuet celer ma langour.

Aveuc ce, douce anemie,
Honte me maistrie,
Paours me chastie,
Desdaing me deffie
Et Dangiers m'escrie
Que nulle chose ne die
Pour Refus qui m'assaudroit;
Et vo maniere jolie,
De douceur garnie,
M'assaut et tarie;
Vostre amours me lie
Par sa seignourie,
Si qu'en regardant m'oublie
Vo gent corps parfait, adroit.

Dont j'ai maniere esperdue
Et vigour perdue,
Car biauté, creüe
De valour, m'arguë,
Dont li scens me mue,
Si que j'en tramble et tressue,
N'en moi n'a raison ne droit,
Einsois suis com beste mue.
Dont m'ardeur arguë
Qui tant continue
Et trop s'esvertue
Fait desconvenue,
Quant elle ne me partue,
Car miex morir me vaudroit.

Morir, certez; il n'est biens ne solas
Que je vosisse avant la mort eslire,
Qu'à mon garir ne porroit pas souffire
Joie d'amours: tant sui je mis au bas.
Et seul pour ce que je ne die pas
Que ja mes cuers ait chose qu'il desire,
Mors ne me vuet penre ne deingne occire,
Dont je languis, dolans, tristes et mas.

Si morrai je mail gré li, sans respas;
Car vie est tant noble et pure, à droit dire,
Qu'en moy, qui sui si chargiés de martire
Et qui tant sui veins, dolereus et las,
Ne deingnera plus demourer, helas!
Einsi morrai dou mal qui me martyre
Malgré la Mort qui me het et m'empire,
Quant pieça n'ay passé par mi ses las.

Einsi Amours tout me deffait
Et m'oste tous les biens à fait,
Ne je n'i sçai autre forfait
Fors que je l'ay de cuer parfait
Trop amé; et s'ai sans meffaire
Longuement et loyaument fait
Son service en dit et en fait.
Si m'est vis qu'envers moy meffait,
Quant d'un regart m'eüst refait,
Se souffert le m'eüst à faire.

Nompourquant le plaisant attrait,
Qui m'art, qui m'esprent, qui m'attrait,
Qui tant me nuist, grieve et detrait
Et nulle fois ne s'en retrait,
Est grant cause de mon contraire;
Car il ha, sans menacier, trait
Mon cuer d'un si doleureus trait
Que jamais le cop n'en yert trait,
Eins nourrist en moy et pourtrait
La mort qu'il m'en conviendra traire.

Ainsi mi oueil
M'ont mis en dueil
Que je recueil,
Car par l'escueil
D'eaus grant Biauté et Dous Accueil
Que j'aim et vueil
D'amoureus vueil,
Dont je me dueil
Plus que ne sueil,
Ont de mon cuer passé le sueil.

Las! ce m'estraint,
Ce me destraint
Et mon vis taint
De divers taint,
Que biautés où nulle n'ataint
Ma joie estaint,
Au cuer m'ataint
Et en moy maint,
Dont j'ai mal maint,
Quant faire ne puis qu'elle m'aint.

Ainsi Amours, mon cuer et Loyauté,
Plaisant Attrait, Dous Accueil et Biauté
Aveuc mes yex ont mon dolereus corps
Destruit, detrait, haÿ et despité
Et de tous maus martyré sans pité,
Si qu'assés miex me vausist entre mort.

Car garison de nulle part n'espoir,
Et s'ai perdu scens, vigour et espoir,
Dont Nature est faillie toute hors
En moi qui sui si près de desespoir,
Que je sçai bien; si je m'en desespoir,
Que ce sera mes plus prochains confors.

Car tant est sure
L'arsure,
Qu'à desmesure
Me dure,
Que mais de cure
Ne cure,
Pour ce que de dur en dur
Ma dame pure
M'est dure
Et que m'oscure
Pointure
Mal gré Nature
Meüre
La more dont je m'asseüre.

Et à esture
Droiture
Com non seüre
S'oscure,
Quant vo figure
Figure
Ma mort et mon dur eür,
Par sa morsure,
L'ajure
Et de mesure
M'espure.
Mais sans laidure
L'endure
D'umble voloir franc et pur.

Et si cognoy
Qu'onques n'oy
Tant d'anoy.
Si m'en marvoy,
Quant je voy
Bien qu'avoy
N'arai n'ottroy,
Ne qu'Amours ne m'yert tendre,
Einsois perçoy
Que par soy
Mort reçoy,
Ne sçay pour quoy,
Car en foy
Plus que moy
Vous aim et croy
De fin cuer, sans mesprendre.

Ne puis qu'enpris
D'estre pris
En pourpris
De vo haut pris
Que tant pris,
Ne mespris
Ne ne repris
Vo vueil ne quier reprendre,
Car com souspris,
Desapris
D'estre espris
D'amer m'espris.
Mais compris
Et apris
Ay que je pris
La mort à l'entreprendre,

Pour ce qu'en vo dous viaire
Dont toute ma dolour sort
Ne truis secours ne confort,
Grace, pité ne acort,
Douçour n'amours fors descort
Et samblant de moy deffaire.

S'en muir, douce, debonnaire,
En dueil et en desconfort,
Par deffaut de reconfort,
N'onques de vous n'os confort.
Si pri Dieu que ciaus confort
Qui y penront exemplaire.














Lay Sans Titre VI

Qui n'aroit autre deport
En amer
Fors dous Penser
Et Souvenir
Avec l'Espoir de jïr,
S'aroit il tort,
Se le port
D'autre confort
Voloit rouver;
Car pour un cuer saouler
Et soustenir
Plus querir
Ne doit merir
Qui aimme fort.

Encor y a maint ressort:
Ramembrer,
Ymaginer
En dous plaisir
Sa dame vëoir, oïr,
Son gentil port,
Le recort
Dou bien qui sort
De son parler
Et de son dous regarder,
Dont l'entrouvrir
Puet garir
Et garentir
Amant de mort.

Et qui vorroit plus souhaidier,
Je n'os cuidier
Si fol cuidier
Que cils aimme de cuer entier
Qui de tels biens n'a souffissance;
Car qui plus quiert, il vuet trichier,
S'Amours tant chier
L'a que fichier
Deigne par l'euil de son archier
En son cuer d'eaus la congnoissance.

Et pour c'endengrée
S'est Douce Pensée
En mon cuer et enfermée
Qu'adès me souvient
De la desirée,
Dont ma joie est née
Et l'esperance doublée
Que de li me vient.

Mais quant je voy
Le trés bel arroy
Simple et coy,
Sans desroy,
De son corps, le gai,
Et que je l'oy
Parler sans effroy,
Par ma foy,
Si m'esjoy
Que toute joie ay.

Et se par Desir recueil
Aucun grief, pas ne m'en dueil,
Car son trés dous riant oueil
Tout adoucist
Le grief qui de Desir ist;
Si me plaist et abelist
Tant qu'au porter me delist,
Plus que ne sueil.

Fors tant, qu'en aucune maniere
Ma dame chiere,
Qui de mon cuer la tresoriere
Est et portiere,
Sceüst qu'elle est m'amour premiere
Et darreniere.
Et plus l'aim qu'autrui ne mon bien,
Nom pas d'amour veinne et legiere,
Mais si entiere,
Que mieus ameroie estre en biere
Qu'a parsonniere
Fust, n'en moy pensée doubliere.
Tels tousdis iere,
Comment qu'elle n'en sache rien.

Si n'est voie
Qui m'avoie
Comment descouvrir li doie
Par nul tour;
Car sans retour
Je morroie
Se j'avoie
Refus, et se je vivoie
Ma baudour
Seroit tristour.

Dont la bonne et belle,
Comment sara elle
Que de li vëoir
En mon cuer s'ostelle
Une amour nouvelle
Qui me renouvelle
Et me fait avoir
Joieuse nouvelle,

De quoy l'estincelle
Fait sous la mamelle
Mon fin cuer ardoir?
S'en frit et sautelle,
Que homs ne damoiselle,
Dame ne pucelle,
Ne le puet savoir,
Si le port et selle.

Amours que j'en pri,
Qui volt et souffri
Qu'a li, sans detri,
Quant premiers la vi, m'offri,
Li porra bien dire
Que pour s'amour fri
Sans plainte et sans cri,
Et qu'a li m'ottri,
Comme au plus trés noble tri
Que peüsse eslire,

Car ensement
Vueil liement,
Joliement
Et gaiement,
En ma dame amer loyaument
User toute ma vie
Si franchement,
Que vraiement,
Se j'ay tourment,
Aligement
N'en vueil, fors souffrir humblement
Ma douce maladie.

Car comment que Desirs m'assaille
Et me face mainte bataille
Et poingne de l'amoureus dart,
Qui souvent d'estoc et de taille
Celeement mon cuer detaille,
Certes bien en vain se travaille,
Car tous garist son dous regart

Et pour ce, sans nul descort,
Endurer
Vueil et celer
L'ardant desir
Qui vuet ma joie amenrir
Par soutil sort;
Si le port
Sans desconfort
Et vueil porter;
Car s'il fait mon cuer trambler,
Taindre et palir,
Et fremir,
A bien souffrir
Dou tout m'acort.

Il me fait par son enort
Honnourer,
Servir, doubter,
Et oubeïr
Ma dame et li tant chierir
Qu'en son effort
Me deport,
Quant il me mort
Et vuet grever,
Mais qu'a li vueille penser
Qu'aim et desir
Sans partir,
Ne repentir;
La me confort.




Source: http://www.poesies.net